އެމްއެމްއޭއިން މަނީ ޗޭންޖަރުންނަށް ޑިޖިޓަލް ސިސްޓަމެއް
ފައިސާ މާރުކުރުމުގެ ލައިސަންސް ލިބިފައިވާ ވިޔަފާރިތަކުގެ މަސައްކަތްތައް ޒަމާނީ ޓެކްނޮލޮޖީގެ ތެރެއިން ހިންގުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން "މަނީ ޗޭންޖަރ ސިސްޓަމް" ގެ ނަމުގައި ޕްލެޓްފޯމެއް މިއަދު އިފްތިތާހުކޮށްފިއެވެ.
މި ޕްލެޓްފޯމް އިފްތިތާހުކޮށްދެއްވީ އެމްއެމްއޭގެ ޑެޕިއުޓީ ގަވަރުނަރު އައިޝަތު އަސްނާ ހަމްދީއެވެ. ފައިސާ މާރުކުރުމުގެ ދާއިރާގައި ހިންގާ އިދާރީ އަދި އޮޕަރޭޝަނަލް ކަންކަން ޑިޖިޓަލް ކުރުމުގެ މަގުސަދުގައި ފަރުމާކޮށްފައިވާ މި ސިސްޓަމް މެދުވެރިކޮށް، ލައިސަންސް އޮންނަ ފަރާތްތަކާއި އެމްއެމްއޭއާ ދެމެދު ހިންގާ މުއާމަލާތްތައް އޮޓޮމޭޓްކުރެވި، އެ ކަންކަން އިތުރަށް އަވަސްވެ ލުއިވެގެންދާނެ ކަމަށް އެ އޮތޯރިޓީން ބުނެފައިވެއެވެ.
މީގެ އިތުރުން، ގަވާއިދުން އެމްއެމްއޭއަށް ފޮނުވަންޖެހޭ މައުލޫމާތު ހިއްސާކުރުމާއި ފައިސާ މާރުކުރުމުގެ މުއާމަލާތްތަކުގެ ރިޕޯޓު ހުށަހެޅުންފަދަ ކަންކަން ވެސް މި ސިސްޓަމް ތެރެއިން ކުރެވޭނެއެވެ. އެމްއެމްއޭއިން ބުނީ މިކަމުގެ ސަބަބުން މި ދާއިރާ ސުޕަވައިޒްކޮށް ބެލެހެއްޓުން ހަރުދަނާވެ، މާލީ ނިޒާމު އިތުރަށް ވަރުގަދަވެގެންދާނެ ކަމަށެވެ.
1 ޑިސެމްބަރު 2026 އިން ފެށިގެން، މަނީ އެކްސްޗޭންޖް ލައިސަންސް އޮންނަ އެންމެހައި ފަރާތްތަކުން މުއާމަލާތްތައް ރެކޯޑުކޮށް ރިޕޯޓުކުރުމަށް މި ސިސްޓަމް ބޭނުންކުރުން ލާޒިމުވާނޭކަމަށް އެމްއެމްއޭއިން ބުނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
