މިއަހަރު ނިމުމުގެ ކުރިން އިތުރު 4000 މެންބަރުން ބޭނުން: ހަސަން ލަތީފް
މި އަހަރު ނިމުމުގެ ކުރިން ދަ ޑިމޮކްރެޓްސް އަށް އިތުރު ހަތަރު ހާސް މެންބަރުން ހަމަކުރަންޖެހޭކަމަށް އެޕާޓީގެ ރައީސްކަމަށް، އަލަށް އިންތިހާބުވެ ވަޑައިގެން ހަސަން ލަތީފް ވިދާޅުވެއްޖެއެވެ.
ޕީއެސްއެމްއިން ގެނެސްދިން ރާއްޖެ މިއަދު ޕްރޮގްރާމްގައި ވާހަކަ ދައްކަވަމުން ހަސަން ލަތީފް ވިދާޅުވީ، ގާނޫނުގައި ވާ ގޮތުގެ މަތިން އިދާރީގޮތުން ޕާޓީ ހިންގާނެ ފައިސާ ދައުލަތުގެ ބަޖެޓުން ހަމަޖެހެން އަންނަނީ ޕާޓީއަށް ޖުމުލަ ދިހަ ހާސް މެންބަރުން ހަވަވެގެންކަމަށެވެ.
ޕާޓީއަށްޓަކައި ވިވަގުތު ކުރަންއޮތް އެންމެ މުހިންމު އެއްކަމަކީ ޕާޓީއަށް އިތުރަށް މެންބަރުން އިތުރުކުރެއްވުން ކަން ފާހަގަކުރައްވާ ހަސަން ލަތީފް ވިދާޅުވީ، ވިވަގުތު ޕާޓީގައި ތިއްބެވީ ހަ ހާހެއްހާ މެންބަރުންކަމަށެވެ.
ޕާޓީގެ ފަރާތުން ވާދަކުރާނޭ އެކި އިންތިހާބުތައް ކުރިމަތިވެފައިވާކަމަށާއި، އެހެންކަމުން ޕާޓީއަށް މެންބަރުން އިތުރު ކުރުމުގެ މަސައްކަތް ވަރަށް ހަލުވިކޮށް ކުރިއަށް ގެންދަންޖެހޭކަމަށް ހަސަން ލަތީފް ވިދާޅުވިއެވެ.
މިސާލަކަށް މާލެ ސިޓީ މޭޔަރުގެ އިންތިހާބު އެބައޮތް، ދެންހަމަ އެއާއެކު ރައްޔިތުންގެ މަޖިލީހުގެ އިންތިހާބުވެސް އޮތީކީ ދުރަކު ނޫން،
ހަސަން ލަތީފް
ހަސަން ލަތީފް ވިދާޅުވީ، ރަނގަޅަށް ކަންކަން ރޭވި، ރައްޔިތުންނާއި ގުޅިގެން ކުރިއަށް ދެވިއްޖެނަމަ މި އަހަރު ނިމުމުގެ ކުރިން ބޭނުންވާ އަމާޒަށް ވާސިލް ވެވޭނޭ ކަމުގެ ފުރިހަމަ ޔަގީން އެބައޮންނެވިކަމަށެވެ. މިވަގުތު ހަ ހާހެއްހާ މެންބަރުން ޕާޓީގައި ތިބި އިރު، އިތުރަށް ހަތަރު ހާސް ސައްހަ މެންބަރުން ހޯދޭނެ ކަމަށް ވަރަށް ބޮޑަން އުންމީދު ކުރައްވާކަމަށް އޭނާ ވިދާޅުވިއެވެ.
ސިސްޓެމެޓިކް ކޮށް ކުރަންޖެހޭގޮތަށް ރޭވުންތެރިކަމާއެކީ ކޮށްފިއްޔާ އަޅުގަނޑުމެނަށް އެއީ ހާސިލް ނުކުރެވޭނެ އަދަދެއްނޫން
ހަސަން ލަތީފް
މިދިޔަ ހޮނިހިރު ދުވަހު ބޭއްވި ދަ ޑިމޮކްރެޓްސްގެ ގެ އެތެރޭގެ ފުރަތަމަ އިންތިހާބުގައި އެ ޕާޓީގެ ރައީސްކަަމަށް ވާދަކުރައްވާ، ރޭ އިއުލާންކުރި ވަގުތީ ނަތީޖާ ދައްކާގޮތުން ޖުމުލަ 1704 ވޯޓާއި އެކު ހަސަން ލަތީފް ވަނީ ޕާޓީގެ ރައީސް ކަމުގެ މަގާމަށް އިންތިހާބުވެވަޑައިގަނެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
