އެމްޑީޕީގެ ވެރިކަމުގެ ފަހުކޮޅު ބޮޑެތި ކުށްވެރިން ޖަލުން ނެރެފައިވޭ: އިމްތިޔާޒް

ރާއްޖޭގައި މާރާމާރީ އާއި ގޭންގްތަކުގެ މެދުގައި ތަޅާފޮޅުން އިތުރުވާތީ އެކަމާއި އެދު ކަންބޮޑުވުން ފާޅުކޮށް އިދިކޮޅު އެމްޑީޕީން ނެރުނު ނޫސް ބަޔާނަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ރައްދު ދެއްވައިފިއެވެ.

އެ ބަޔާނަށް އިމްތިޔާޒް ރައްދު ދެއްވާފައިވަނީ އެކްސް ގައި ކުރެއްވި ޓްވީޓެއްގައެވެ.

"ވެރިކަމުގެ ފަހު ދުވަހުގައި ވެސް ތިބިއްޔާ ތިބި ބޮޑެތި ކުށްވެރިން ވޯޓުގެ ބޭނުމަށް ދޫކޮށްލުމަށްފަހު ދައްކާ ވާހަކަ ދެކެބަލަ!"

އިމްތިޔާޒް ވިދާޅުވިއެވެ.

އެމްޑީޕީން ނެރުނު ނޫސް ބަޔާނުގައި ބުނެފައިވަނީ ދިރިއުޅޭ ހިޔާވަހީގެ ރައްކާތެރިކަމާއި، މަގުތަކުގެ އަމާންކަން ގައުމުގައި ގާއިމު ނުކުރެވުމަކީ މި ޕާޓީއަށް ބަލައިގަނެވޭނެ ކަމެއް ނޫން ކަަމަށާއި އެމްޑީޕީއިން ވަކާލާތު ކުރާ އަބުރުވެރި ދިރިއުޅުމަކަށް ގެދޮރުގެ ހުރުމަތް ކޮންމެ ރައްޔިތަކަށްމެ ކަށަވަރުކޮށްދޭންޖެހޭނެ ކަމަށެވެ.

ޕީޕީއެމްގެ ފުރަތަމަ ސަރުކާރުގައިވެސް މަގުތައް ނާމާންވެ، ގެދޮރުގެ ހަތަރު އިންފާރަކީ އަމިއްލަ ނަފްސުގެ ރައްކާތެރިކަން ކަށަވަރު ނުކުރެވޭ ތަންތަނަށް ވެގެންދިޔަ ފަދައިން މި ސަރުކާރުގެ އަމަލުތައްވެސް މިހިރީ އެ މަގުން ކަމަށް ބުނެ އެމްޑީޕީން ވަނީ ސަރުކާރަށް ފާޑުވެސް ކިޔާފައެވެ.

އާ ސަރުކާރުން އަދިވެސް ޕޮލިސް ކޮމިޝަނަރަކު އައްޔަންކޮށްފައި ނުވާތީ އެމްޑީޕީން ވަނީ އެކަމާ ގުޅިގެން ވެސް ކަންބޮޑުވުން ފާޅުކޮށް ކޮމިޝަނަރަކު އައްޔަނު ކުރުން ޕޮލިސް ބޯޑު މެދުވެރިކޮށް އަވަސްކުރުމަށް ސަރުކާރަށް  ގޮވާލާފައެވެ. ޕޮލިސް ކޮމިޝަނަރުގެ މަޤާމް ހުސްވީ ކުރިން ސީޕީއަކަށް ހުންނެވި މުހައްމަދު ހަމީދު މިދިޔަ މަހު މަގާމުން މުސްކުޅި ކުރެއްވުމުންނެވެ.

އެމްޑީޕީ މި ބަޔާނަށް އިމްތިޔާޒް ރައްދުދެއްވާފައިވާއިރު އެމްޑީޕީއިން ވަނީ ރިޔާސީ އިންތިޚާބާއި ދިމާކޮށް ގިނަ އަދަދެއްގެ ނުރައްކާތެރި ކުށްވެރިން މިނިވަންކޮށް މުޖުތަމައުގެ ތެރެއަށް ދޫކޮށްލާފައެވެ.

އަދި ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަން ނިމެން ފަސް ދުވަހަށް ވެފައި އޮއްވާ އެމްއެމްޕީއާރުސީގެ ޚިޔާނާތުގެ މައްސަލައިގައި ދައުވާ ކޮށްފައިވާ ކުރީގެ ނައިބު ރައީސް އަހްމަދު އަދީބާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރ ޒިޔަތަށް މަޢާފުދީ މިނިވަން ކުރިކަން ވެސް ފާހަގަ ކޮށްލަންޖެހެއެވެ.