ފެނަކައިން ގިނަ ވަޒީފާ ދީފަހުރީ ނޮވެމްބަރު 17 އަށް ކޮންޓުރެކްޓް ހަމަވާގޮތަށް: ނަޝީދު

ފެނަކަ ކޯޕަރޭޝަނުން ގިނަ ބަޔަކަށް ވަޒީފާތައް ދީފައި ވަނީ މިއަހަރުގެ ނޮވެމްބަރު މަހުގެ 17 އަށް އެ މުވައްޒަފުންގެ ވަޒީފާގެ ކޮންޓުރެކްޓު ހަމަވާގޮތަށް ކަމަށް ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުالله (މޮސްޓާ) ވިދާޅުވެއްޖެ އެވެ.

މޮސްޓާ މިފަދައިން ވިދާޅުވެފައި ވަނީ ސިޔާސީ ނޫން ވަޒީފާތަކުން އާންމު ވަކި ނުކުރައްވާނެ ކަމަށް ވިދާޅުވެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރިޔާސީ ކެމްޕޭނުގައި ވެވަޑައިގެންނެވި ވައުދާ ޚިލާފަށް ފެނަކަ ކޯޕަރޭޝަނުން މުވައްޒަފުން ވަކިކުރަމުން ގެންދާ ކަމަށް ބުނެ ހުށައަޅާފައިވާ ކުއްލި މައްސަލައަށް ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ނެވެ.

މޮސްޓާ ވިދާޅުވީ ފެނަކައިން ދިން ގިނަ ވަޒީފާތަކަކީ އުސޫލުން ބޭރުން، އެ ކުންފުނީގެ ހިއުމަން ރިސޯސް (އެޗްއާރު) ޕޮލިސީއާއި ޚިލާފަށް ދީފައިވާ ވަޒީފާތަކެއް ކަމަށެވެ.

އޭގެ ތެރެއިން ގިނަ ވަޒީފާތަކަކީ ރިޔާސީ އިންތިޚާބާއި ދިމާކޮށް، ރައީސުލްޖުމްހޫރިއްޔާއަށް ރަށްރަށުން ތާއީދުއޮތްކަން ދެއްކުމަށްޓަކައި، ސިޔާސީ ބޭނުމުގައި ދީފައިވާ ވަޒީފާތަކެއްކަމަށް މޮސްޓާ ވިދާޅުވި އެވެ.

އެއާއެކު އޭނާ ވިދާޅުވީ އެ ވަޒީފާތައް ދީފައި ވަނީ ކޮންޓްރެކްޓު އުސޫލުން ކަމަށާއި، ގިނަ ވަޒީފާތަކުގެ ކޮންޓްރެކްޓު ކޮށްފައިވަނީ ރައީސުލްޖުމްހޫރިއްޔާކަމުގެ ޤާނޫނީ ހުވާ ޑރ މުހައްމަދު މުއިއްޒު ކުރެއްވި ދުވަސް، ނުވަތަ މިއަހަރުގެ ނޮވެމްބަރު މަހުގެ 17 އަށް ހަމަވާގޮތަށް ކަމަށެވެ.

މީ ނިމިދިޔަ ސަރުކާރުން ވަރަށް ހީލަތްތެރިކަމާއެކު ކޮށްފައިވާ ކަމެއް ކަމަށާއި، ބޭނުމަކީ ކޮންޓްރެކްޓު އުސޫލުން ދީފައިވާ ވަޒީފާތަކުން މީހުން ވަކިވާއިރު، އެ ހުރިހާ އިލްޒާމެއް ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ސަރުކާރުގައި އެޅުވުންކަމަށް މޮސްޓާ ވަނީ ވިދާޅުވެފަ އެވެ.

"ކޮންޓުރެކްޓް ހަމަވާގޮތަށް އިންނަނީ ނޮވެމްބަރު 17 ވަނަ ދުވަހާއި ހަމަޔަށް. އޭރުން ކުށްވެރިވާނީ މި ސަރުކާރުތާ. ޑރ މުއިއްޒުގެ ސަރުކާރުން މީނާ ވަޒީފާއިން ކަނޑާލައިިފި. އެކަމަކު ކޮންޓްރެކްޓް ހަމަވާގޮތަށޭ ވަޒީފާތައް ދީފައި ހުރީ"

މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު

މޮސްޓާ ވިދާޅުވީ ރިޔާސީ އިންތިޚާބުގެ ކެމްޕޭނުގެ ތެރޭގައި ރައީސުލްޖުމްހޫރިއްޔާ ޑރ މުހައްމަދު މުއިއްޒު ވައުދުވެލެއްވި ގޮތަށް، ހައްގު ގޮތުގައި ދީފައި ހުރި ދާއިމީ ވަޒީފާތަކުން އެމަނިކުފާނުގެ ސަރުކާރުގައި އެއްވެސް މީހަކު ވަކިކުރާނެ ކަމުގެ ޔަގީންކަން އޮތް ކަމަށެވެ.

ފެނަކަ ކުންފުންޏަކީ ނިމިދިޔަ ސަރުކާރުން ކޮރަޕްޝަންގެ ހާއްޔަކަށް ހަދާފައިވާ ތަނެއް ކަމަށާއި، އެ ކުންފުނިން ނާޖާއިޒް މާލީ މަންފާ ހޯދައިގެން އޭރުގެ މެނޭޖިން ޑިރެކްޓަރު މިއަދު އުޅުއްވަނީ އަގުބޮޑު ދިރިއުޅުމެއް ކަމަށް މޮސްޓާ ވިދާޅުވި އެވެ.

އެހެންކަމުން ފެނަކަ ކުންފުނީގެ މުވައްޒަފުން ވަޒީފާއިން ކަނޑަނީ މި ސަރުކާރުން ކަމަށް ބުނެ ރައްޔިތުންނަށް ބޮޑެތި އޮޅުވާލުންތައް އޮޅުވާލުމަކީ ކޮށްގެންވާނެ ކަމެއް ނޫން ކަމަށް މޮސްޓާ ވަނީ ވިދާޅުވެފަ އެވެ.