ހިޔާ ފްލެޓުގެ ކުލި ކުޑަކުރަން ސަރުކާރުން ނިންމައިފި

ހިޔާ ފިނިޝިން މަސައްކަތަށް ރައްޔިތުންގެ ޖީބުން ކުރި ޚަރަދު އިއާދަ ކުރެއްވުމަށް ހިޔާ ފްލެޓުގެ ކުލި ބޮޑުތަނުން ކުޑަކުރުމަށް ސަރުކާރުން ނިންމައިފިއެވެ.

ރައީސް އަބްދުالله ޔާމީން އަބްދުލްގައްޔޫމުގެ ޒައާމަތުގައި ހުޅުމާލޭ ދެވަނަ ފިޔަވަހީގައި އަޅުއްވާދެއްވި ހިޔާ ފްލެޓުތަކުގެ ފިނިޝިން މަސައްކަތް އެ ފްލެޓުތައް ލިބޭ ފަރާތްތަކުން އަމިއްލަ ޖީބުން ޚަރަދުކޮށްގެން ކުރާގޮތަށް ނިމިދިޔަ ސަރުކާރުން ހަމަޖެއްސުމާއި ގުޅިގެން މާލީ ގޮތުން ބޮޑެތި ތަކުލީފުތަކެއް ގިނަބަޔަކު އުފުލަން ޖެހުނެވެ.

ރިޔާސީ އިންތިޚާބުގެ ކެމްޕޭނުގައި ރައީސުލްޖުމްހޫރިއްޔާ ޑރ މުހައްމަދު މުއިއްޒު ވަނީ ހިޔާ ފްލެޓުތަކުގެ ފިނިޝިން މަސައްކަތްކުރުމަށް ރައްޔިތުންގެ ޖީބުން ހޭދަވި އަގު ޖުމުލަކޮށް، އެ ބައި އިޔާދަކުރެވޭނެ ގޮތް ހަމަޖައްސާދެއްވާނެ ކަމަށް ވިދާޅުވެފަ އެވެ.

އެގޮތުން ފިނިޝިންއަށް ދިޔަ ޚަރަދު ޖުމްލަކުރާއިރު، ދެ ލައްކަ ރުފިޔާއަށް އަރާ ކަމަށާއި، އެ ފައިސާ އިޔާދަކޮށްދިނުމަކީ ވެރިކަމުގެ މަސްއޫލިއްޔަތުތަކާއި ރަސްމީކޮށް ހަވާލުވެވަޑައިގަތުމަށް ފަހު އެންމެ އިސްކަމެއް ދެއްވައިގެން ކުރައްވާނެ ކަމެއްގެ ގޮތުގައި އެމަނިކުފާނު ވިދާޅުވި އެވެ.

ރައީސުލްޖުމްހޫރިއްޔާ ޑރ މުހައްމަދު މުއިއްޒު އެމަނިކުފާނުގެ ކެބިނެޓާއެކު ބޭއްވި އެންމެ ފުރަތަމަ ޕްރެސް ކޮންފަރެންސްގައި ވަނީ ހިޔާ ފިނިޝިން މަސައްކަތަށް ރައްޔިތުންގެ ޖީބުން އެކްރެޖުކޮށް ކުރި ދެލައްކަ ރުފިޔާ އިޔާދަކޮށްދިނުމުގެ މަގްސަދުގައި ހިޔާ ފްލެޓުގެ ކުލި ބޮޑުތަނުން ކުޑަކުރުމަށް ނިންމާފައިވާކަން އިއުލާނު ކުރައްވާފަ އެވެ.

އެކަމުގެ ތަފްސީލުތައް ދެއްވަމުން ރައީސުލްޖުމްހޫރިއްޔާ ޑރ މުއިއްޒު ވިދާޅުވީ ހިޔާ ފްލެޓުގެ ފިނިޝިންއަށް އެވްރެޖުކޮށް ހޭދަވި އަގަކީ ދެލައްކަ ރުފިޔާކަމަށް ބަލައި އެ އަގު ފްލެޓުގެ ރައްޔިތުންނަށް ފައިދާވާ ޑިސްކައުންޓު ގޮތަކަށް ހަދައިދިނުމަށް ސަރުކާރުން ނިންމާފައިވާ ކަމަށެވެ.

އެގޮތުން ކުރިއަށް އޮތް 7 އަހަރަށް ހިޔާ ފްލެޓަށް ރައްޔިތުން ދައްކަން ޖެހޭ ކުލި 5300 ރުފިޔާއިން 3984 ރުފިޔާއަށް ކުޑަކުރުމަށް ސަރުކާރުން ނިންމާފައިވާކަމަށް ރައީސުލްޖުމްހޫރިއްޔާ ޑރ މުއިއްޒު ވިދާޅުވި އެވެ.

"މި ނިންމީ ދެ ލައްކަ ރުފިޔާއަށް ވާ ވަރަށް ފްލެޓުތަކުގެ އަގުން އުނިކުރާގޮތަށް. އެ އަގު އުނިކޮށް މިހާރު މި ދައްކަނީ 5300 ރުފިޔާ. މިހާރު އޮތް ގޮތުން ކުރިއަށް އޮތް 7 އަހަރަށް ދައްކަން އޮތީ 5300 ރުފިޔާ. އެހެންވީމަ އެ 7 އަހަރު ދުވަހަށް ދެން ދައްކަން ޖެހޭނީ މަހަކު 3984 ރުފިޔާ"

ރައީސުލްޖުމްހޫރިއްޔާ ޑރ މުއިއްޒު

ހިޔާ ފްލެޓަށް ކުރި ޚަރަދު ރިކަވާ ކުރެވޭގޮތް ހަމަޖެއްސުމަށް ކުލި ކުޑަކުރަން ސަރުކާރުން ނިންމާފައިވާއިރު، އެ ސަރަހައްދަށް ދިމާވެފައިވާ އެހެނިހެން މައްސަލަތައް ހައްލުކޮށް ހިޔާ ޓަވަރުތަކުގައި އިތުރު ހިފްޓު ހަރުކުރުމުގެ މަސައްކަތް ކުރިއަށް ގެންދަވާނެކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވަނީ ވައުދުވެވަޑައިގެންފަ އެވެ.

ހިޔާ ފްލެޓުތަކުގެ އިތުރުން އަތޮޅުތެރޭގައި އަލާފައިވާ ފްލެޓުތަކުގެ ކުލި ވެސް 3000 ރުފިޔާއަށް ކުޑަކުރެވިފައިވާކަން ރައީސުލްޖުމްހޫރިއްޔާ ޑރ މުއިއްޒު ވަނީ އިއުލާނު ކުރައްވާފަ އެވެ.