ދަރަނި އެހާވަރަށް ބޮޑުވީ ނިމިދިޔަ ވެރިކަމުގައި: އެމްއެމްޕީއާރުސީ

މޯލްޑިވްސް މާކެޓިން އެންޑް ޕީއާރު ކޯޕަރޭޝަން، އެމްއެމްޕީއާރުސީގެ ދަރަނި ބޮޑުވެފައިވަނީ، ނިމިގެންދިޔަ ސަރުކާރުގެ ފަހު އަހަރުތަކުގައި ކުންފުނި ހިންގިގޮތުންކަމަށް އެކުންފުނީގެ މިހާރުގެ މެނޭޖްމަންޓުން ބުނެފިއެވެ.

އެމްއެމްޕީއާރުސީން ނެރެފައިވާ ބަޔާނެއްގައި ބުނެފައިވަނީ، މިދިޔަ ވެރިކަމުގައި ކުންފުނި ހިންގިގޮތުން ލިބުނު ގެއްލުމުގެ ޖުމްލަ 203.4 މިލިއަން ރުފިޔާއަށް އަރާފައިވާކަމަށެވެ. އެމްއެމްޕީއާރުސީން ނެރުނު މި ބަޔާނުގައި ވަނީ ކުންފުނީގެ ހިންގުން ހަރުދަނާ ކުރުމަށް ފިޔަވަޅުތަކެއް އަޅާފައިވާކަމަށެވެ. އެގޮތުން ހަރަދުތައް 10 އިންސައްތަ ކުޑަކޮށްފައިވާކަން ވަނީ ފާހަގަކޮށްފައެވެ.

އެގޮތުން އިސްތިހާރުކުރުމުގެ ކަންކަމުގައި 21 އެޖެންސީ ގެންގުޅުނު ނަމަވެސް މިހާރު އެދަދަު 6 އަކަށް މަދުކޮށްފައިވާކަމަށެވެ. މިއީ އަހަރެއްގެ މައްޗަށް ހިނގާ ހަރަދަށް ބަލާނަމަ 4 މިލިއަން ރުފިޔާގެ ސޭވިންއެކެވެ.

އެމްއެމްޕީއާރުސީއަށް ލިބިފައިވާކަމަށް އެކުންފުނިން ދެއްކި އަދަދު

- 2020 ވަނަ އަހަރު: 1.6 މިލިއަން ރުފިޔާ

- 2021 ވަނަ އަހަރު: 141.9 މިލިއަން ރުފިޔާ

- 2022 ވަނަ އަހަރު: 42.2 މިލިއަން ރުފިޔާ

- 2023 ވަނަ އަހަރު: 17.9 މިލިއަން ރުފިޔާ

އެމްއެމްޕީއާރުސީން މިފަދައިން ބަޔާނެއް ނެރެފައިވަނީ މިފަހުން އޮޑިތަރ ޖެނެރަލް ނެރުނު އެމްއެމްޕީއާރުސީގެ އޮޑިޓް ރިޕޯޓާ ގުޅިގެންނެވެ.

މިދިޔަ ޖޫންމަހު އޮޑިޓަރ ޖެނެރަލް ނެރުއްވި 2024 އަހަރުގެ އެމްއެމްޕީއާރުސީގެ ރިޕޯޓްގައި އެކުންފުނީގެ ޖުމްލަ ދަރަނި 1.5 ބިލިއަން ރުފިޔާއަށްވުރެ ބޮޑެވެ. އެގޮތުން އެމްއެމްޕީއާރުސީން 2013 ވަނަ އަހަރާއި 2015 ވަނަ އަހަރާ ދެމެދު ރިސޯޓް ހެދުމަށް ފަޅުރަށްތައް ވިއްކައިގެން ލިބުނު ފައިސާއިން ޓޫރިޒަމް މިނިސްޓްރީއަށް މިހާރުވެސް ދޭންޖެހޭ އަދަދު 1.5 ބިލިއަން ރުފިޔާއަށްވުރެ ބޮޑެވެ. މީގެ އިތުރުން އެމްޕީއެލުން 2020 ވަނަ އަހަރު ނެގި 85 މިލިއަން މިލިއަން ރުފިޔާގެ ލޯނު އޮތްއިރު، އެ ލޯނުގެ އިންޓްރެސްޓް ރޭޓް އުޅެނީ އަހަރަކަށް 4.60 އިންސައްތައިގެ ރޭޓްގައެވެ

އެމްއެމްޕީއާރުސީގެ ހަގީގީ ދަރަނި ބިލިއަން ރުފިޔާ ފަހަނަ އަޅާފައިވައިރު، އެ ދަރަނިތައް ދައްކައި ކުންފުނި ކުރިއަށްގެންދާނޭގޮތުގެ ދުރުރާސްތާ ޕްލޭނެއް އަދި މިހާތަނަށް ހާމަކޮށްފައެއްނުވެއެވެ.