ރާއްޖެ އިޝްތިހާރުކުރުމަށް އެމިރޭޓްސްއާ ޤަތަރު އެއާވޭސްއާ އެކު އެއްބަސްވުމެއް

ބައިނަލްއަޤުވާމީ ޓޫރިޒަމް މާކެޓްތަކުގައި ރާއްޖޭގެ ފަތުރުވެރިކަން އިޝްތިހާރުކުރުމަށް ގުޅިގެން މަސައްކަތްކުރުމުގެ އެއްބަސްވުމެއްގައި ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން އެމިރޭޓްސް އަދި ޤަތަރު އެއާވޭސްއާ އެކު މިއަދު ސޮއިކޮށްފި އެވެ.

އޭޓީއެމް ފެއާ 2026ގެ ހަވާސާގައި ވަކިވަކިން ކުރިއަށް ގެންދިޔަ ދެ ރަސްމިއްޔާތެއްގައި ވީއެމްސީގެ ފަރާތުން ސޮއިކުރެއްވީ އެ ކޯޕަރޭޝަންގެ ސީއީއޯ އަދި މެނޭޖިން ޑިރެކްޓަރު ޢަބްދުﷲ ޔާސިރެވެ. އެމިރޭޓްސްގެ ނަމުގައި ސޮއިކުރީ އެ ކުންފުނީގެ ސީނިއާ ވައިސް ޕްރެޒިޑެންޓް - ކޮމާޝަލް އޮޕަރޭޝަންސް އީސާ ސުލައިމާން އަޙްމަދެވެ. ޤަތަރު އެއާވޭސްގެ ފަރާތުން ސޮއިކުރީ ވައިސް ޕްރެޒިޑެންޓް އެފްރިކާ ގްލޯބަލް ލެޝަރ ސޭލްސް ހެންޑްރިކް އަބްރަހަމް ޑު ޕްރީޒެވެ.

މި އެއްބަސްވުމުގެ ދަށުން ދެ އެއާލައިނާ ގުޅިގެން ޖޮއިންޓް މާކެޓިން ކެމްޕެއިންތައް ހިންގުމަށް ވަނީ ރޭވިފައެވެ. ޔާސިރު ވިދާޅުވި ގޮތުގައި މި މަހުން ފެށިގެން އަންނަ އަހަރުގެ ސެޕްޓެމްބަރާ ހަމައަށް ދެ ފަރާތް ގުޅިގެން ވެބިނާތައް ހިންގުމާއި ތަފާތު އެކި ވައްތަރުގެ މާކެޓިން ހަރަކާތްތައް ކުރިއަށް ގެންދާނެއެވެ. ދުނިޔޭގެ އެންމެ ބޮޑެތި އެއާލައިންތަކާ އެކު މަސައްކަތްކުރެވުމަކީ ރާއްޖެ އިޝްތިހާރުކުރުމަށް ލިބޭ އިތުރު ފުރުޞަތެއް ކަމަށް ޔާސިރު ވިދާޅުވިއެވެ.

"މިއަދު މި ކުރެވުނު އެއްބަސްވުމަކީ ދެފަރާތް ގުޅިގެން ޖޮއިންޓް މާކެޓިން ކެމްޕޭންތަކެއް ކުރުމަށް. މިއަހަރުގެ ސެޕްޓެމްބަރުން އަންނަ އަހަރުގެ ސެޕްޓެމްބަރަށް. މި ޖޮއިންޓް މާކެޓިން ކެމްޕެއިންގެ ތެރޭގައި އެކީގައި ވެބިނާސް ހިންގުމާއި އެކި ވައްތަރުގެ މާކެޓިން ކެޕެއިންސް ކުރިއަށްގެންދިއުން ހިމެނޭ. މި މަސައްކަތްތަކަކީ މިއީ ބޭރުގެ ފަރާތްތަކުން ރާއްޖެއަށް އޮންނަ ޝައުޤުވެރިކަން އިތުރުކުރުމަށް ކުރެވޭ މަސައްކަތްތަކެއް." ޔާސިރު ވިދާޅުވިއެވެ.

ސޮއިކުރުމުގެ ދެ ރަސްމިއްޔާތުގައި ވެސް ފަތުރުވެރިކަމާ ބެހޭ ވުޒާރާގެ ސްޓޭޓް މިނިސްޓަރު ޑރ. ޢަބްދުﷲ ނިޔާޒާއި ވީއެމްސީގެ ޑިރެކްޓަރުންގެ ބޯޑުގެ ޗެއާމަން ޢަބްދުﷲ ގިޔާސް ރިޔާޒް އަދި އެ ކޯޕަރޭޝަންގެ ޗީފް އޮޕަރޭޓިން އޮފިސަރު ސަބީހާ އަޙްމަދު ބައިވެރިވެވަޑައިގެންނެވިއެވެ.