ބުޅާ ފެސިލިޓީއަށް އަހަރަކު 1.2 މިލިއަން، ބުޅަލަކަށް އަހަރަކު 5000 ރުފިޔާ ޚަރަދުވާނެ: ޑރ. މާރިޔާ

މާލެ ސަރަހައްދުގައި އުޅޭ ބުޅާތައް ގެންދިޔުމަށް ހުޅުމާލޭ ފަރުކޮޅުފުށީގައި ގާއިމުކުރި "އޮޅު ހިޔާ"އަށް ނޮން-ރިކަރަންޓް ޚަރަދުގެ ގޮތުގައި 1.2 މިލިއަން ރުފިޔާ ޚަރަދުވާނެ ކަމަށް ކަމަށް ދިރޭތަކެއްޗާއި ބެހޭ ވުޒާރާގެ ވަޒީރު ޑރ. މަރިޔަމް މާރިޔާ ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ވަނީ ބުޅާ ފެސިލިޓީއަށް ގެންދަންޖެހޭ ހުރިހާ ބުޅަލެއް ގެންދެވުމުން އެތަނަށް ކިހާ ޚަރަދެއް ދާނެ ތޯ ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން ވަޒީރު މާރިޔާ ވިދާޅުވީ، ބުޅާ ފެސިލިޓީއަށް ނަން-ރިކަރަންޓް ޚަރަދުގެ ގޮތުގައި 1.2 މިލިއަން ރުފިޔާ ޚަރަދުވާނެ ކަމަށް ލަފާކުރެވޭ ކަމަށެވެ. އަދި އެ ފެސިލިޓީއަށް ގެންދާ ޖުމްލަ 2000 ބުޅާ ގެންދެވުމުން ބުޅާތަކަށް މަހަކު 7 ލައްކަ ރުފިޔާ ޚަރަދުވާނެ ކަމަށްވެސް ވިދާޅުވިއެވެ.

2000 ބުޅަލަށް މަހަކު 7 ލައްކަ ރުފިޔާ ޚަރަދުވާނެ. އަދި ކޮންމެ ތިން މަހަކުން 3.4 މިލިއަން ރުފިޔާ ޚަރަދުވާނެ. އަހަރަކު 10.8 މިލިއަން ރުފިޔާ ޚަރަދުވާނެ. ފެސިލިޓީގެ ޖުމްލަ ބަޖެޓުން ބުލަކަށް މަހަކު 368 ރުފިޔާ ޚަރަދުވާނެ. އަދި ފެސިލިޓީގެ ޖުމްލަ ބަޖެޓުން ބުޅަލަކަށް 5416 ރުފިޔާ ޚަރަދުވާނެ

ޑރ މަރިޔަމް މާރިޔާ

މީގެ އިތުރުން ވަޒީރު މާރިޔާ ވަނީ މިހާތަނަށް ބުޅާ ފެސިލިޓީއަށް ގެންދުވުނު ބުޅާ ތަކުގެ އަދަދާއި ބުޅާ ގެންދިޔުން ލަސްވާ ސަބަބުތައްވެސް ހާމަކުރައްވާފައެވެ.

އެގޮތުން ވަޒީރު ވިދާޅުވީ، މިހާތަނަށް ގެންދެވުނީ 15 ބުޅާ ކަމަށާ، ބުޅާ ގެންދިޔުން ލަސްވީ ފެސިލިޓީގައި ޤާއިމް ކުރަންޖެހޭ ޚިދުމަތްތައް ސިޓީ ކައުންސިލުން ޤާއިމް ނުކޮށް ހުރުމުން ކަމަށެވެ.

އޮޅު ހިޔާ ފެސިލިޓީ އަކީ މާލެ ސަރަހައްދަށް ދިމާވެފައިވާ ބުޅަލުގެ މައްސަލައަށް ހައްލެއް ގެނައުމަށް ސަރުކާރުން މާލެ ސިޓީ ކައުންސިލާ ހަވާލުކޮށްގެން ތައްޔާރުކުރި ފެސިލިޓީއެކެވެ.

އެ ފެސިލިޓީ ތަރައްޤީކޮށް ރަސްމީކޮށް ހުޅުވިނަމަވެސް އެ ފެސިލިޓީގެ ޚިދުމަތް ފެށުން ލަސްވީ، މިނިސްޓްރީން ދީފަައިވައި، ގައިޑްލައި އާއި އެއްގޮތަށް ވަސީލަތްތައް ކުރެވިފައި ނުވާތީ ކަމަށް ކުރިން މިނިސްޓްރީން ވަނީ ބުނެފައެވެ.

އެހެންކަމުން، ސަރުކާރުގެ އެދުމަށް، "އޮޅު ހިޔާ" ފެސިލިޓީގެ ރަސްމީ ހުރިހާ ލިޔެކިއުންތަކާއި ލީގަލް އެސެޓްސް ޓްރާންސްފަރ ގެ މަސައްކަތް ނިމުމަށް ފަހު، މާލެ ސިޓީ ކައުންސިލުން އެ ފެސިލިޓީ އެގްރިކަލްޗަރ އެންޑް އެނިމަލް ވެލްފެއަރ މިނިސްޓްރީއާ ހަވާލުކޮށްފައިވަނީ ފެބްރުއަރީ މަހުގެ 27 ވަނަ ދުވަހުގައެވެ.