ރައީސް ޞާލިޙް އުކުޅަހު ކައުންސިލާއި އ.ތ.މ ކޮމިޓީއާއި ބައްދަލު ކުރައްވައިފި
ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިޙް އއ އުކުޅަހު ކައުންސިލާއި އެރަށުގެ އަންހެނުންގެ ތަރައްްޤީއަށް މަސައްކަތް ކުރާ ކޮމިޓީއާއި ބައްދަލު ކުރައްވައިފިއެވެ.
ރައީސް ޞާލިޙް އުކުޅަހު ކައުންސިލާއި އ.ތ.މ ކޮމިޓީއާއި ބައްދަލު ކުރައްވާފައިވަނި މިއަދު ހެނދުނު އެރަށު ކައުންސިލް އިދާރާގައެވެ.
ރައީސް އޮފީހުން ވިދާޅުވެފައިވަނީ މި ބައްދަލު ކުރެއްވުމުގައި މައިގަނޑު ގޮތެއްގައި މަޝްވަރާ ކުރެވިގެން ދިޔައީ ރަށުގެ ތަރައްޤީއަށް ކުރަން ޖެހިފައި ހުރި ކަންކަމާއި މެދުގައި ކަމަށެވެ.
އަދި މީގެ އިތުރުން ރަށުގެ ތަރައްޤީގެ ކަންކަމާއި އެހެނިހެން ކަންކަމުގައި ރަށުގެ ރައްޔިތުންގެ ހުރި ކަންބޮޑުވުންތައް ރައީސް އާއި ހިއްސާ ކުރެވުނު ކަމަށް ރައީސް އޮފީހުން ހާމަކުރައްވައިފައިވެއެވެ.
ރައީސް އުކުޅަހަށް ކުރައްވަމުން މިގެންދަވާ ދަތުރު ފުޅަކީ ދުނިޔޭގެ ތިމާވެށީގެ ދުވަސް ފާހަގަ ކުރުމަށް އެރަށުގައި ބޭއްވޭ ހަރަކާތް ތަކުގައި ބައިވެރިވެ ވަޑައިގެންމެވުމަށް ކުރައްވާ ދަތުރު ފުޅެކެވެ.
އެގޮތުން އިއްޔެ ހަވީރު އުކުޅަހަށް ވަޑައިގެން ރައީސް ޞާލިޙް ވަނީ އުކުޅަހުގައި ބޭއްވުނު "ބީޓް ޕްލާސްޓިކް ޕޮލިޔުޝަން" ފެސްޓިވަލް އަށް ޒިޔާރަތް ކުރައްވާފައެވެ. އަދި ރޭ ބޭއްވުނު ތިމާވެށީގެ ދުވަހުގެ ރަސްމީ ޖަލްސާ ޝަރަފުވެރި ކޮށްދެއްވެވީ ވެސް ރައީސް ޞާލިޙް އެވެ.
މިއަހަރުގެ ދުނިޔޭގެ ތިމާވެށީގެ ދުވަސް ރާއްޖޭގައި ރަސްމީކޮށް ފާހަގަ ކުރަމުން ދަނީ އއ އުކުޅަހުގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
