އީސީން ވަނީ މި ޕާޓީގެ މެންބަރުންގެ ޖުމްލަ ޢަދަދު އޮޅުވާލާފައި: އެމްއާރްއެމް

މޯލްޑިވްސް ރިފޯމް މޫވްމަންޓް (އެމް.އާރް.އެމް)ގެ ދަފްތަރުގައިވާ ޢަދަދުކަމަށްބުނެ އިލެކްޝަންސް ކޮމިޝަނުން އިޢުލާން ކޮށްފައިވަނީ އެ ޕާޓީގެ މެންބަރުންގެ ޖުމްލަ ޢަދަދު އޮޅުވާލައި މެންބަރުން އުނިކޮށްގެން ކަމަށް އެމްއާރްއެމް އިން ބުނެފި އެވެ.

މިމަހު 4 ވަނަ ދުވަހު އީސީން ވަނީ މިދިޔަ މަހުގެ ނިޔަލަށް ސިޔާސީ ޕާޓީތަކުގެ ދަފްތަރުގައި މީހުން ތިބި އަދަދު ހާމަކޮށްފައެވެ. އެ ތަފާސް ހިސާބުތައް ދައްކާ ގޮތުގައި އެމްއާރްއެމްގައި މިވަގުތު ތިބީ 2,892 މެންބަރުންނެވެ.

އެކަމާއި ގުޅިގެން އެމްއާރްއެމް އިން ނެރުނު ބަޔާނެއްގައި ބުނީ، އެ ޕާޓީއާއި ގުޅޭގޮތުން އެކި ފަހަރުމަތިން އިލެކްޝަންސް ކޮމިޝަނުން ސައްޙަނޫން މަޢުލޫމާތު ރައްޔިތުންނަށް ދެމުން ގެންދާ ކަމަށާ އެއީ އެ ޕާޓީއިން ނުހަނު ކަންބޮޑުވާ ކަމެއް ކަމަށެވެ. އަދި އެފަދައިން އިލެކްޝަންސް ކޮމިޝަނުން ޢަމަލުކުރަމުންދަނީ ސިޔާސީ ޕާޓީތަކުގެ ޤާނޫނާވެސް ޚިލާފަށްކަން ފާހަގަކޮށް އެޕާޓީން ވަނީ އެކަން ކުށްވެރިކޮށްފައެވެ.

މިއާއެކު އެ ބަޔާނުގައި ބުނީ، އެ ޕާޓީގެ މެންބަރުންގެ އަދަދާއި ގުޅޭގޮތުން އިލެކްޝަންސް ކޮމިޝަނުން ހާމަކުރަމުން ދަނީ ރަނގަޅު މައުލޫމާތުތަކެއް ނޫންކަމަށެވެ.

ސިޔާސީ ޕާޓީތަކުގެ މެންބަރުންގެ އަދަދު ކަމަށްބުނެ 4 ޖުލައި 2023 ގައި އެ ކޮމިޝަނުން ޢާއްމު ކުރި މަޢުލޫމާތު ޢާއްމުކުރިއިރު މި ޕާޓީގެ މެންބަރުންގެ ޢަދަދުން ގިނަ ޢަދަދެއްގެ މެންބަރުން އުނިކޮށް ދަފްތަރުގައިވާ ޢަދަދުކަމަށްބުނެ އިޢުލާން ކޮށްފައިވަނީ މި ޕާޓީގެ މެންބަރުންގެ ޖުމްލަ ޢަދަދު އޮޅުވާލައި އަދި މި ޕާޓީއިން މި އަހަރުގެ މެއި މަހުގައި ހުށަހެޅި 140 ފޯމް ޕްރޮސެސްވެސް ކުރުމަކާ ނުލައިކަން ފާހަގަކޮށް އިލެކްޝަންސް ކޮމިޝަނުގެ މި ޢަމަލުތައް ހަރުކަށި ޢިބާރާތުން ކުށްވެރިކުރަމެވެ.

އެމްއާރްއެމް

މިއާއެކު އެމް.އާރު.އެމް އިން ބުނީ، އެ ޕާޓީން ހުށަހަޅާ މެމްބަރޝިޕް ފޯމުތައް ޕްރޮސެސްނުކޮށް ދެ މަހެއްހާ ދުވަސް ހޭދަކޮށްފައިވާއިރު، އެ މުއްދަތުގައި ޕާޓީއިން ވަކިވުމަށް އެދޭކަމަށްބުނާ މެމްބަރުން އުނިކޮށް ޕާޓީގެ ދަފްތަރުން އުނިކުރުން ހަލުވިކަމާއެކު އިލެކްޝަންސް ކޮމިޝަނުންކުރިއަށް ގެންދާ ކަމަށެވެ. އަދި އެކަމުން އެނގިގެން ދަނީ އިލެކްޝަންސް ކޮމިޝަނުން ޢަމަލުކުރަނީ ވަކި އެޖެންޑާއެއް އޮވެގެންކަމަށް އެ ޕާޓީން ދެކެއެވެ.

މީގެ އިތުރުން، އެމް.އާރު.އެމް އިން ވަކިވުމަށް އެދިގެން ޕާޓީއިން ވަކިވެފައިވާކަމަށް އިލެކްޝަންސް ކޮމިޝަނުން ބުނާ މެންބަރުންގެ ތެރެއިން ގިނަ ޢަދަދެއްގެ މެންބަރުން އެފަދައިން ޕާޓީން ވަކިވުމަށް ހުށަނާޅާކަމަށް އިލެކްޝަންސް ކޮމިޝަނަށް ސިޓީ ފޮނުވާފައިވާއިރުވެސް އެފަރާތްތައް ދަފްތަރަށް އަލުން ހިމަނާފައި ނުވާ ކަމަށް އެފަދައިން އިލެކްޝަންސް ކޮމިޝަނުން ޢަމަލުކުރަނީ ސިޔާސީ ވަކި މަޤްސަދެއް ހާސިލްކުރުމަށްކަމަށްވެސް އެ ޕާޓީން ތުހުމަތު ކުރެއެވެ.

"މި ޕާޓީގެ މެންބަރުން ހަމަނުވެގެން ކަމަށްބުނެ ކުއްލިގޮތަކަށް ޕާޓީ އުވާލަން ނިންމާ 24 މެއި 2023 ގައި އިލެކްޝަންސް ކޮމިޝަނުން ކުރި އިއުލާނާއި ގުޅިގެން ޕާޓީއިން ކޯޓަށް މައްސަލަ ހުށަހަޅައި މައްސަލަ ކޯޓުގައި ކުރިއަށް ދާއިރު، އަދި ޕާޓީ އުވާލުމަށް ނިންމި ނިންމުމަށް ޢަމަލުކުރުން ފަސްކުރުމަށް ސިވިލް ކޯޓުން ވަގުތީ އަމުރެއް ނެރުއްވާފައިވެއެވެ. އަދި އެ އަމުރު މުރާޖަޢާކުރުމަށް އިލެކްޝަންސް ކޮމިޝަނުން ހުށަހެޅުމުން އެ އަމުރަށް ބަދަލުގެންނާނެ ތަނެއްނެތްކަމަށް ސިވިލް ކޯޓުން ކަނޑައަޅުއްވާފައިވާއިރުވެސް، އެމް.އާރު.އެމް އިން ދަފްތަރަށް މެންބަރުން އިތުރުކުރުމަށް ހުށަހަޅާ ފޯމުތައް އިލެކްޝަންސް ކޮމިޝަނުން ޕްރޮސެސް ނުކޮށް ހިފަހައްޓައި ޢަމަލުކުރަމުންދިޔުމަކީ ކޯޓުގެ އަމުރާވެސް ޚިލާފުވުންކަމުގައި ދެކެމެވެ." އެމްއާރްއެމް ގެ ބަޔާނުގައި ވެއެވެ.

އެމްއާރްއެމް އިން ބުނީ، އެފަދަ ކަންކަމުން އެނގި ހާމަވަނީ އިލެކްޝަންސް ކޮމިޝަނުގެ ނާޤާބިލުކަމާއި، ސިޔާސީ ޕާޓީތަކާއިމެދު ގެންގުޅޭ ތަފާތުކުރުން އަދި މިނިވަން މުއައްސާސާއަކަށް ވީހިނދު މިނިވަން ކަމާއި ސިޔާސީ ނުފޫޒުން އެއްކިބާވެ މަސައްކަތް ނުކުރެވުންކަން ކަމަށެވެ. އަދި ޤާނޫނާއި ޤަވާއިދާއި ޚިލާފަށް އެ ޕާޓީ އުވާލުމަށް އިލެކްޝަންސް ކޮމިޝަނުން ކެނޑިނޭޅި މަސައްކަތްކުރަމުންދާ ކަން ފާހަގަ ކޮށް އެ ޕާޓީން ވަނީ އިލެކްޝަންސް ކޮމިޝަނުގެ އިންސާފުވެރިކަމާ މިނިވަންކަމާމެދު ސުވާލު އުފައްދާފަ އެވެ.

މިއާއެކު އެ ޕާޓީން ވަނީ، އިލެކްޝަންސް ކޮމިޝަނުގެ ޤާނޫނާއި ޤަވާއިދާ ޚިލާފު އެންމެހާ އަމަލުތައް މިހާރުން މިހާރަށް ހުއްޓާލައި ޤާނޫނުގެ އިމުގެތެރެއަށް ރުޖޫޢަވުމަށް ތަކުރާރުކޮށް ގޮވާލާފައެވެ. އަދި ސިޔާސީ ޕާޓީތަކުގެ ޤާނޫނާއި އެއްގޮތަށް ތަފާތުކުރުމެއް ނެތި، ސިޔާސީ ނުފޫޒުން އެއްކިބާވެފައިވާ މިނިވަން މުއައްސާއެއްގެ ގޮތުގައި އަމަލުތައް ބައްޓަންކުރުމަށްވެސް ވަނީ ގޮވާލާފައެވެ. އަދި ހަމަ އެހެންމެ، އިލެކްޝަން ކޮމިޝަންގެ ކަންކަން އިސްލާހުކުރުމަށް ކޮމިޝަންގެ ރައީސް ފުއާދު ތައުފީޤަށްވެސް އެ ޕާޓީން ވަނީ ގޮވާލާފައެވެ.