ވަގުތީ ފައިދާއަށް ވޯޓު ވިއްކައިފިނަމަ ދެން ދުވަހަކުވެސް މިގައުމު ސަލާމަތެއް ނުކުރެވޭނެ: އަބްދުއްރަހީމް

ހޮނިހިރު ދުވަހު ނެގޭ ރިޔާސީ އިންތިހާބުގެ ވޯޓު، ވަގުތީ ފައިދާއަށް ވިއްކާލައިފިނަމަ ދެން ދުވަހަކުވެސް މިގައުމު ސަލާމަތެއް ނުކުރެވޭނެ ކަމުގައި ޕީއެންސީގެ ރައީސް، އަދި އިދިކޮޅު ކޯލިޝަން ހިންގުމާއި ވަގުތީގޮތުން ހާވާލުވެ ހުންނެވި އަބްދުއްރަހީމް އަބްދުالله ވިދާޅުވެއްޖެއެވެ.

އަބްދުއްރަހީމް މިފަދައިން ވިދާޅުވީ ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒުގެ ރިޔާސީ އިންތިހާބުގެ ކެމްޕެއިންގައި ކ ތުލުސްދޫގައި އެރަށުގެ ސަޕޯޓަރުންނާއި ބައްދަލުކުރައްވާ ބޭއްވި ޖަލްސާގައި ދެއްކެވި ވާހަކަފުޅުގައެވެ.

އަބްދުއްރަހީމްގެ ވާހަކާފުޅުގައި އިތުރަށް ވިދާޅުވީ މިހާރުގެ ސަރުކާރުން ބޭރުގެ ގައުމެއްގެ އަތްމައްޗަށް ދުވަހަކު ނުކުރާ ވަރަށް ގައުމުގެ އަމަން އަމާންކަން ދޫކޮށްލައިފައިވާކަމަށެވެ.

މީގެ އިތުރުން އަބްދުއްރަހީމް ގެ ވާހަކަފުޅުގައި ވިދާޅުވީ، ޕީޕީއެމް ޕީއެންސީގެ ރޫޅާލުމަށްޓަަކައި އެޕާޓީއާއި އިދިކޮޅު ހުރިހާ ފަރާތްތަކުން ރާވަމުން ދިޔަ ހުރިހާ ރޭވުމެއް ނާކާމިޔާބު ވެފައިވާކަމަށާއި، ޕީޕީއެމް ޕީއެންސީ ރިޔާސީ އިންތިހާބަށް ނިކުތީ ބަދަހި ވަރުގަދަ ލަޝްކަރެއްގެ ގޮތުގައި ކަމުގައެވެ.

ރައީސް ޔާމީނަކީ ވަރުގަދަ ސިޔާސީ ލީޑަރެއް، އެއީ ހިކުމަތްތެރި ލީޑަރެއް، ވިސްނުންތެރި ލީޑަރެއް، ނަތީޖާއަކަށްވީ އެ ހުރިހާ ބޭފުޅުން ރޭވި ހުރިހާ ރޭވުމެއް ބޭކާރުވެގެން ދިއުން

އަބްދުއްރަހީމް އަބްދުالله

ހަމަ އެވާހަކާޔާއި ވިދިގެން އަބްދުއްރަހީމް ވަނީ ރައީސް އަބްދުﷲ ޔާމީނަށް ކޮށްފައިވާ ހުކުމަކީ ސިޔާސީ ހުކުމެއް ނޫންކަމަށް ރިޔާސީ ބަހުސްގައި ރާއީސް ޞާލިހު ވިދާޅުވި ވިދާޅުވުމަށް ރައްދުދެއްވައިފައެވެ. އަބްދުރަހީމް ވަނީ ރާއީސް ޔާމީނަށް ކުރައްވާފައިވާ ޖަލު ހުކުމަކީ ސިޔާސީ ހުކުމެއްކަމަށް ތަކުރާރުކޮށް ވިދާޅުވެފައެވެ.

ރިޔާސީ އިންތިހާބަށް ދެ ދުވަހަށް ވެ، ހުރިހާ ފަރާތްތަކުންވެސް އިންތިހާބުގެ ކެމްޕެއިން ބާރު ދުވެލީގައި ކުރިއަށް ގެންދާއިރު އިންތިހާބަށް ކެމްޕެއިން ކުރުމުގެ ފުރުސަތު ހުކުރު ދުވަހުގެ އިރުއޮއްސި 6 ޖެހުމާއި ހަމައަށް އޮންނާނެއެވެ.