ހަވީރު ސަޔަށާ ހެނދުނު ސަޔަށްވެސް މި ޕައި ބަރާބަރު ވާނެ!

މިއަދު ވޮއިސްގެ ބަދިގެއިން މިގެނެސްދޭ ޓޫނާ ޕިއްޒާ ޕައި އަކީ ވަރަށް ފަސޭހައިން ތައްޔާރުކޮށްލެވޭ، އަނގަޔަށް އެހާމެ މީރު ޑިޝްއެކެވެ. އެންމެހާ ކިޔުންތެރިންނަށްވެސް މި ޑިޝް ކަމުދާނެކަމަށް އުއްމީދުކުރަމެވެ.

ފުށްގަނޑު ތައްޔާރު ކޮށްލުމަށް ބޭނުންވާ ތަކެތި:

10 ގ ގެ ތިން ބަޓަރ ޕޯޝަން

1 ލާހި ފުށް

ލޮނު ކޮޅެއް

މަސްގަނޑު ތައްޔާރު ކޮށްލުމަށް ބޭނުންވާ ތަކެތި:

1 ދަޅު މަސް

1 ބޮޑު ފިޔާ (ތުނި ކޮށް ކޮށާފައި)

1 ބޮޑު ލޮނުމެދު ( ގާނާފައި)

1 ހިކަނދިފަތް (ކުދިކޮށް ކޮށާފައި)

1 މޭޒުމަތީ ސަމުސާ ޓޮމާޓޯ ޕޭސްޓް

2 މޭޒުމަތީ ސަމުސާ ފުރައިޑު ޗިކަން ޗިލީ ސޯސް

1/2 ސައި ސަމުސާ ސޯޔާ ސޯސް

1 ސައި ސަމްސާ ތެޅި މިރުސް

މޮޒެރެއްލާ ޗީޒު

1 ބިސް

ގިތެޔޮ މިރުސް (ތުނިކޮށް ކޮށާފައި)

ނޫޑްލްސް ސޫޕް ޕެކެޓު/ ލޮނު

ތައްޔާރު ކުރާނެ ގޮތް

1) ފުށް ގަނޑު ތައްޔާރު ކޮށްލުމަށް ފުށާއި، ބަޓަރ ޕޯޝަނާއި ލޮނާ އެއްކޮށްލުމަށްފަހު، ހޫނުފެން އަޅައިގެން ރަނގަޅަށް ފުށްގަނޑު މޮޑެލާށެވެ.

2) ޕައިގެ މަސްގަނޑު ތައްޔާރު ކޮށްލުމަށް ފިޔާ، ލޮނުމެދު އަދި ހިކަނދިފަތް މަސްދަޅުގެ ތެޔޮފޮދުތެރޭގައި ކުޑަކޮށް މުށިކުލައަރަންދެން ކައްކާލާށެވެ.

3) އެއަށްފަހު ޓޮމާޓޯ ޕޭސްޓު، ސޯޔާ ސޯސް، ޗިކަން ސޯސް، ލޮނު އަދި ގިތެޔޮ މިރުސް އަޅާލުމަށްފަހު ކުޑަ ފެންފޮދެއްވެސް އަޅައިގެން ދެ މިނެޓު ވަންދެން ކައްކާލާށެވެ.

4) ޕޭސްޓު ގަނޑު ރަނގަޅަށް ކެކުމުން މަސްދަޅު އަޅައި އެއްކޮށްލުމަށްފަހު އިތުރު ދެމިނެޓު ވަރުވަންދެން ކައްކާލާށެވެ.

5) ދެން، މޮޑެފައިވާ ފުށްގަނޑުން ބޮޑު ދެ ފުށްގުޅަ ހަދާލުމަށްފަހު އެއް ފުށްގުޅަ ޕިއްޒާ ފުށްގަނޑު ހުންނަ ބޯމިނަށްވުރެ ކުޑަކޮށް ތުނިކޮށް ފަތުރާލުމަށްފަހު އޭގެ މައްޗަށް މަސްގަނޑު އަޅާލައި ރަނގަޅަށް ހުރިހާ ދިމާއަކަށް އެއްވަރު ވާނެހެން ފަތުރާލާށެވެ.

6) އެއަށްފަހު އޭގެ މައްޗަށް ޗީޒު ގާނާފައި އަޅާލާށެވެ.

7) ދެން، އަނެއް ފުށްގުޅަވެސް ކުރިން ފުށްގުޅައެކޭ އެއްވަރަށް ފަތުރާ ލުމަށްފަހު މަސްގަނޑު މަތީގައި ބޭއްވުމަށްފަހު ޕައިގެ ވަށައިގެން ބަންދުކޮށްލާށެވެ.

8) އެއަށްފަހު އުލެއް ނުވަތަ ޓޫތު ޕިކެއް ޕައިގެ އެކި ތަންތަނަށް ހަރާލުމަށްފަހު މަތީގައި ރޯ ބިސްކޮޅެއް އުނގުޅާލާށެވެ.

9) ދެން އަވަން 180 ޑިގްރީ ސެލްސިއަސް އަށް ބެހެއްޓުމަށް ފަހު ގާތްގަނޑަކަށް 30 މިނެޓު ވަންދެން ޕައިގެ މަތި ރަނގަޅަށް މުށިކުލަ ވަންދެން ފިހެލާށެވެ.