އެމްޑީޕީން އެޕާޓީ މެމްބަރުންނަށް ބިރު ދައްކައިގެން މަސައްކަތް ކުރުވާކަން އެނގޭ: އިލްޔާސް

އެމްޑީޕީ މެމްބަރުންއެކި ގޮތް ގޮތަށް ނުފޫޒު  ފޯރުވައިގެން މަސައްކަތް ކުރާކަން އެނގިވަޑައިގަންނަވާ ކަމަށް ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބު ވިދާޅުވެއްޖެއެވެ.

އިލްޔާސް ލަބީބް މިފަދައިން ވިދާޅުވެފައި ވަނީ ސަންގުޓީވީ ގެ ހަބަރަށް ފަހު ޕްރޮގްރާމްގައި ވާހަކަފުޅު ދައްކަވަމުންނެވެ.

މިގޮތުން އޭނާ ވިދާޅުވެފައި ވަނީ މަޖިލިސް މެމްބަރުންގެ މަސައްކަތް ތަކަށް ނުފޫޒު ފޯރުވާ ކަމަށް ސާފުކޮށް މެމްބަރުން ވިދާޅުވެފައި ވާކަމަށާއި އަދި ރައީސް ނަޝީދު އަރިހުގައިވެސް ބައެއް ބޭފުޅުން މިފަދައިން ވިދާޅުވެފައި އެބަހުރި ކަމަށްވެސް އިލްޔާސް ވިދާޅުވިއެވެ.

"އަޅުގަނޑުމެންނަށް އެބަ އެނގޭ މެމްބަރުން ބްލެކްމެއިލް ކޮށްގެން މަސައްކަތް ކުރާކަން އަދި ބިރު ދައްކައިގެން މަސައްކަތް ކުރާކަން. ބައެއް މެމްބަރުންގެ މައްސަލަ ތައް ފުލުސް އޮފީހުގައި، ބައެއް މެމްބަރުންގެ މައްސަލަތައް ކޯޓުގައި އަދި އެކި އެކި ތަންތަނުގައި އެބަހުރި."

އިލްޔާސް ލަބީބް ވިދާޅުވިއެވެ.

މިއީ ވަރަށް ނުބައި ކޮށް، ނާޖާއިޒު ގޮތެއްގައި ކުރާ ކަމެއްގެ ގޮތުގައި އޭނާ ފާހަގަ ކުރެއްވިއެވެ. އަދި މިފަދަ ނުބައި ނިޔަތެއް ގައި ކުރާކަންކަމަށް އެއްބާރުލުން ދޭން ނުފެންނަ ކަމަށް ވެސް އިލްޔާސް ލަބީބު ވަނީ މި ޕްރޮގްރާމް ގައި ވާހަކަފުޅު ދައްކަވަމުން ވިދާޅުވެފައެވެ.

މީގެ އިތުންވެސް އިލްޔާސް ވިދާޅުވީ ރައީސް ނަޝީދުގެ އިތުބާރު ނެތް މައްސަލަ ބެލުމުގައި އެއްވެސް ރޭވުންތެރިކަމެއް ނެތް ކަމަށާއި މިއީ މި މައްސަލަ ހުށައެޅި ދެވަނަ ފަހަރު ކަމަށާއި ފުރަތަމަ ފަހަރު މައްސަލަ ހުށައެޅި އިރު، ކުރިމަތިވި މައްސަލަތަކަށް ބެލުމެއް ނެތްކަމަށެވެ. އަނެއްކާވެސް އެމައްސަލަ ދިމާވާނެކަން އެނގި ތިބެ، ކޯޓަށް މަޖިލީހުގެ މެޖޯރިޓީ ޕާޓީން ދިއުމަކީ ދަންނަ ކަމެއް ނޫންކަމުގައިވެސް އިލްޔާސް ފާހަގަ ކުރެއްވިއެވެ.

ވަކި ވަކި މެމްބަރުންނަށް ތަދައްހުލް ނުވެވޭނެ ކަމަށް ސުޕްރީމް ކޯޓުން ދަ ޑިމޮކްރެޓްސް އަށް އެންގުމުން ޕާޓީގެ ފަރާތުން ތަދައްހުލް ވުމަށް ހުރިހާ ލިޔެކިއުންތަކެއް ކޯޓަށް ހުށައަޅާފައި ވާނެކަމަށް އިލްޔާސް ވިދާޅުވިއެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރުނެތް މައްސަލައިގް އަޑު އެހުން މިއަދު ހެނދުނު 10 ޖެހިއިރު ވަނީ ސުޕްރީމް ކޯޓުގައި ފެށިގެން ގޮސްފައެވެ.