ނަޝީދު މައްސަލަ އޮތަސް އިންތިޚާބީ ރައީސް ހުވާކުރުމަށް ހުރަހެއް ނެތް: އޭޖީ
ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމަށް ހުށައަޅާފައިވާ މައްސަލަ ނުނިމުނަސް އިންތިޚާބީ ރައީސް ޑރ މުހައްމަދު މުއިއްޒު ހުވާކުރެއްވުމަށް އެއްވެސް ހުރަހެއް ނެތްކަމަށް ބަންޑާރަނައިބުގެ އޮފީހުން ބުނެފި އެވެ.
އެ އޮފީހުން އެފަދައިން ބުނެފައިވަނީ ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމަށް ހުށަހަޅާފައިވާ މައްސަލަ ކުރިޔަށް ގެންދެވޭނެ ގޮތެއް ހޯދަން އެމް.ޑީ.ޕީއިން ސުޕްރީމް ކޯޓަށް ހުށަހަޅާފައިވާ ދުސްތޫރީ މައްސަލައިގެ މިއަދުގެ އަޑުއެހުމުގައި ވާހަކަދައްކަމުން ނެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ހުށައަޅާފައި އޮއްވާ، އިންތިޚާބީ ރައީސް ޑރ މުހައްމަދު މުއިއްޒު ކުރައްވާ ހުވާ ބަލައިނުގަންނާނެ ކަމަށާއި، އަދި އެމަނިކުފާނުގެ ސަރުކާރުގެ ވަޒީރުންގެ މަޖިލީހަށް ވެސް ރުހުން ނުދެއްވާނެކަމަށް މަޖިލީހުގެ މެޖޯރިޓީ ޕާޓީ އެމްޑީޕީން ވަނީ ބުނެފައެވެ.
ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދާނެ ގޮތެއް ހޯދުމަށް އެ ޕާޓީން ސުޕްރިމް ކޯޓަށް ހުށައަޅާފައިވާ މައްސަލައިގެ އެމްޑީޕީގެ އެ ވާހަކަތަކަށް އިޝާރާތްކުރައްވާ ފަނޑިޔާރު ހުސްނުއްދުއޫދު ވަނީ، މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށައަޅާފައިވަނިކޮށް އިންތިޚާބީ ރައީސް ހުވާކުރެވިދާނެތޯ އައްސަސާ ބަންޑާރަ ނައިބުގެ އޮފީހުން ދެކޭގޮތް ހާމަކޮށްދިނުމަށް އެދިވަޑައިގެންފަ އެވެ.
އެ ސުވާލަށް ޖަވާބުދެއްވަމުން ބަންޑާރަ ނައިބުގެ އޮފީހުގެ ވަކީލު ވިދާޅުވީ ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށައަޅާފައި ވަނިކޮށް މަޖިލީހުގައި ތުރު މަސައްކަތްކެއް ކުރިއަށް ނުގެންދެވޭނެކަމަށް ގާނޫނުގައި ބަޔާންކޮށްފައިވާ ކަމަށެވެ. އެހެން ނަމަވެސް މަޖިލީހުގެ ގަވައިދުގައި ބަޔާންކުރަނީ ދެކަމެއްގެ ވާހަކަ ކަމަށާއި، އެއީ މަޖިލީހަށް ހުށަހެޅިފައިވާ ކަމަކަށް ބަހުސް ކުރުމާއި ފާސްކުރަން އޮތް ކަމެއް ފާސްކުރުންކަމަށް ބަންޑާރަ ނައިބުގެ އޮފީހުގެ ވަކީލު ފާހަގަކުރެއްވި އެވެ.
އެހެންކަމުން، އެ ކަންކަމުގެ ތެރޭގައި ރައްޔިތުންގެ މަޖިލީހުގެ ރައީސް ހުވާކުރުން ނުހިމެނޭ ކަމަށާއި، ނަޝީދުގެ މައްސަލަ އޮތް ނަމަވެސް ޑރ މުއިއްޒަށް ހުވާކުރެއްވުމަށް އެއްވެސް ހުރަހެއް ނެތްކަމަށް ވަކީލު ވިދާޅުވި އެވެ.
"ގާނޫނު އަސާސީގެ 114 ވަނަ މާއްދާގައި އެ ބުނާ ރައީސުލްޖުމްހޫރިއްޔާ ހުވާ ކުރެއްވުމުގެ މަސައްކަތެއް ނުހިމެނޭ، އަދި މިހާރު އޮތް ރައީސުލްޖުމްހޫރިއްޔާގެ ދައުރު ހަމަވުމުން އާ ރައިސުލްޖުމްހޫރިއްޔާ ހުވާ ކުރަން އޮންނަ ދުވަހު ހުވާކުރައްވަން ޖެހޭ ކަމަށް ގާނޫނޫ އަސާސީގައި އޮވޭ"
ބަންޑާރަ ނައިބު އޮފީހުގެ ވަކީލު
މަޖިލީހުގެ ގަވައިދުގެ 205 ވަނަ މާއްދާގެ އިޖުރާއަތްތައް ތަރުތީބު ކުރެވިފައިވާ ގޮތުން މަޖިލީހުގެ ރައީސްގެ އިތުބާރު ނެތް މައްސަލައެއްގެ ނޯޓިސް ހަމަވުމަށް ފަހު ދެން އެންމެ އަވަހަށް އޮންނަ ރަސްމީ ބަންދު ދުވަހެއްގައި އެ މައްސަލަ އެޖެންޑާކޮށް ކުރިއަށް ގެންދަން ޖެހެ އެވެ.
އަދި މަޖިލީހަށް ހުށަހެޅިފައިވާ ކަމެއްގެ ބަހުސް ކުރިއަށް ގެންދެވޭނީ އަދި މަޖިލީހުން ގޮތެއް ނިންމަން ޖެހޭ ކަމެއްގައި ގޮތެއް ނިންމޭނީ މަޖިލީހުގެ ރައީސްގެ އިތުބާރު ނެތް ގަރާރާ މެދު ގޮތެއް ނިންމުމަށް ފަހު ކަމަށް އެ ގަވާއިދުގައިވެ އެވެ.
އެހެން ނަމަވެސް ނަޝީދުގެ އިތުބާރު ނެތްކަމުގެ މައްސަލައިގައި ނޯޓިސް ދިނުމަށްފަހު އޮތް ފުރަތަަމަ ޖަލްސާއަށް ނައިބު ރައީސް އީވާ އަބްދުالله ވަޑައިނުގެންނެވުމާއި ގުޅިގެން، އަދި އެފަހުން އެ މައްސަލަ ތާވަލުކުރެވުނު އެއްވެސް ޖަލްސާއަކަށް އެކަމަނާ ވަޑައިނުގެންނެވުމާއި ގުޅިގެން މައްސަލަ ވަނީ މަޑުޖެހިފައެވެ.
މަޖިލީހުގެ މަސައްކަތްތައް ހުއްޓާލާފައި އޮތުމަކީ ގާނޫނު އަސާސީގެ ރޫހާއި ޚިލާފުކަމެއް ކަމަށާއި، އެ މައްސަލައަށް ޙައްލެއް ހޯދައިގެން މަޖިލީހުގެ މަސައްކަތްތައް ކުރިއަށް ގެންދެވޭނެ މަގުފަހިކޮށްދޭން ޖެހޭކަމަށް ގިނަ ފަރާތްތަކުން ދަނީ ބުނަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
