"އިންޑިއާ ސިފައިންގެ އެކަކުވެސް، ރާއްޖޭގައި ތިބެން ދިވެހިން ނޭދޭކަން އިންތިޚާބުގެ ނާތީޖާއިން އެނގޭ"

ދިވެހިރާއްޖޭގައި އިންޑިޔާ ސިފައިންގެ އެންމެ މީހަކުވެސް ތިބުމަކީ ދިވެހިން ބޭނުން ނުވާ ކަމެއް ކަން ނިމިދިޔަ ރިޔާސީ އިންތިޚާބުގެ ނަތީޖާއިން އެނގިގެން ގޮސްފައިވާ ކަމަށް މަޖިލީހުގެ ފޮނަދޫ ދާއިރާގެ މެންބަރު އަދި ވެރިކަންކުރާ ޕީއެންސީގެ ޕާލަމެންޓްރީ ގްރޫޕުގެ ލީޑަރ މޫސާ ސިރާޖު ވިދާޅުވެއްޖެއެވެ.

އިންޑިޔާ ސިފައިން ބާލަން އެގައުމުން އެއްބަސްވެފައިވާ ނަމަ، އެ އެއްބަސްވުން ހާމަ ކުރުމަށް ގޮވާލާ، މަޖިލީހުގެ މިއަދުގެ ޖަލްސާއަށް ހުށަހެޅިފައިވާ ކުއްލި މައްސަލައަށް ބަހުސް ކުރައްވަމުން ސިރާޖު ވިދާޅުވީ، ރައީސުލްޖުމްހޫރިއްޔާގެ މަގާމަށް ޑރ. މުހައްމަދު މުޢިއްޒު ގެނައުމަށް ރާއްޖޭގެ ރައްޔިތުންގެ ބޮޑު އަޣުލަބިއްޔަތެއް ވޯޓު ދީފައިވާ ކަމަށެވެ.

އެހެންކަމުން ރައްޔިތުންގެ އެ ނިންމުނަށް އިހްތިރާމްކޮށް ކުރިޔަށް އޮތް ފަސް އަހަރަށް ގެނައި މި ވެރިކަމާއި އެކު، ކުރިއަށްދާންޖެހޭ ކަމަށް ސިރާޖު ވިދާޅުވި އެވެ.

މިއާއެކު ސިރާޖު ވިދާޅުވީ، ރައީސް މުޢިއްޒުގެ މި ސަރުކާރަކީ ދެފުށް ފެންނަ ރައްޔިތުންނަށް ޖަވާބުދާރީވާނެ ސަރުކާރެއް ކަމަށާއި، އެއްވެސް ކަމެއް ފޮރުވަން ޖެހޭ ސަބަބެއް ނެތް ކަމަށެވެ. އަދި އިންޑިޔާ ސިފައިންގެ އަދަދު ހޯދުމަށް ކުރީ ސަރުކާރުގައި ސްޕްރީމް ކޯޓަށް ދާން ޖެހިފައިވީ ނަމަވެސް، މިސަރުކާރުން ކަމެއް ހޯދުމަށް ސްޕްރީމް ކޯޓާއި ހަމައަށް ދާން ނުޖެހޭނެ ކަމަށްވެސް އޭނާ ވިދާޅުވި އެވެ.

ސިރާޖު އިތުރަށް ވިދާޅުވީ، ރާއްޖޭ އާއި އެއްވެސް ގައުމަކާއި މައްސަލަ ޖެހިފައި ނުވާ ކަމަށާ، އެހެން ނަމަވެސް ދިވެހިން ބޭނުން ވަނީ، އެއްވެސް ގައުމެއްގެ ނުފޫޒަކާއި ބާރު ފޯރުވުމެއް ނެތި ދިރިއުޅެންކަމަށެވެ.

އެކަން ވަރަށް ސާފުކޮށް އަޅުގަނޑުމެން ނިމިދިޔަ ރިޔާސީ އިންތިޚާބުގައި ކަނޑައަޅައި ނިންމައިފި. ރައްޔިތުން ނޭދޭ، މިގައުމުގައި އެއްވެސް ގައުމެއްގެ އެންމެ ސިފައިންގެ މީހެއްވެސް ހުންނާކަށް. އެންމެ ބޫޓު ޖޯޑެއްވެސް ހުންނާކަށް ދިވެހިން ނޭދޭކަން ނިދިދިޔަ އިންތިޚާބުގައި ސާފުކޮށް ނިންމައިފި. އަދި ދިވެހިންގެ ނިންމުމާއި އެއްގޮތަށް ބޭރުގެ ސިފައިން މިގައުމުން ބޭރު ކުރާނެކަން އެއީ އެއްވެސް ޝައްކެއް އޮތް ކަމެއް ނޫން. ރައްޔިތުން އެ ނިންމި ނިންމުމަށް އަޅުގަނޑުމެން އިހްތުރާމް ކުރާނަން. އެގޮތަށް އެ މަސައްކަތް މި ސަރުކާރުން ކުރާނެ.

މޫސާ ސިރާޖު

މިއާއެކު ސިރާޖު ވަނީ އިންޑިއާގެ ސިފައިންގެ އަދަދު ސާފު ނުވެގެން އުޅެން ޖެހެނީ، އެކަން ފޮރުވުމަށް މިދިޔަ ސަރުކާރުން ކުރި މަސައްކަތުގެ ސަބަބުން ކަމަށެވެ. އެކަމަކު އިންޑިއާ ސިފައިންގެ ޖުމްލަ އަދަދު ހޯދައި، ރާއްޖޭގެ ގެއްލިފައިވާ މިނިވަންކަން އިޔާދަ ކުރެވި ނުފޫޒުން އެއްކިބާ ވެވޭނެކަމަށް ސިރާޖު ވިދާޅުވި އެވެ.

އަދި ސަރުކާރާއި މެދު ރައްޔިތުންގެ ހިތުގައި ސުވާލު އުފެދޭ ގޮތަށް ވާހަކަ ދައްކައި، ވެރިކަން ވައްޓާލަން ކުރާ އެއްވެސް މަސައްކަތެއް ކާމިޔާބު ވުމަށް ފުރުސަތު ނުދެއްވާނެ ކަމަށްވެސް ސިރާޖު ވިދަޅުވި އެވެ.