ފަޒުލް ރަޝީދު ގެ ބަލާފާސްކުރިއިރު އެއް މިލިއަނަށްވުރެ ގިނަ ރުފިޔާ ފެނުނު!

ބިންވެރިޔާ ސްކީމުން އުސޫލާ ހިލާފަށް އެޗްޑީސީން ގޯތި ދޫކުރި މައްސަލާގައި އެޗްޑީސީގެ ކުރީގެ މެނޭޖިންގ ޑިރެކްޓަރު ފަޒުލް ރަޝީދު ދިރިއުޅޭ ގެ ބަލާފާސްކުރި ކުރުމުގައި އެ ގެއިން އެއް މިލިއަނަށްވުރެ ގިނަ ރުފިޔާ ފެނުނު ވާހަކައެއް މީޑިއާގައި ތިލަވެއްޖެއެވެ.

އެޗްޑީސީ މައްސަލާގައި ފުލުހުން ފަޒުލް ދިރިއުޅެމުން އަންނަ ޒޭވަރުގެއަށް ފުލުހުން ވަދެ ފާސްކޮށްފައިވަނީ ޑިސެމްބަރުމަހުގެ 23 ވަނަ ދުވަހުގެ ރެއެވެ. ފުލުހުން އެ ގެ ބަލާފާސްކުރި ރޭ، އެ ގޭގައި ހުރި ދަބަހަކުން އެއް މިލިއަނަށް ވުރެ ގިނަ ރުފިޔާ ފެނުނު ކަމަށް ބައެއް މީޑިއާތަކުން ވަނީ ރިޕޯޓްކޮށްފައެވެ. ނަމަވެސް މިކަމާ ގުޅޭގޮތުން ފުލުހުން އެއްވެސް ވާހަކައެއް ދައްކާފައެއް ނުވެއެވެ.

އިތުބާރުހުރި މަސްދަރުތަކުން ބައެއް މީޑިއާތަކަށް މައުލޫމާތު ދިން ގޮތުގައި ފަޒުލް ރަޝީދުގެ ގެއިން ފެނިފައިވަނީ ދަބަހެއްގައި ހުރި ނަގުދު ފައިސާތަކެކެވެ. ފައިސާތައް ގުނިއިރު އެއް މިލިއަން ރުފިޔާއަށްވުރެ ގިނައެވެ. މިކަމާ ގުޅޭގޮތުން ފަޒުލްގެ ފަރާތުންވެސް އަދި ވަކި އެއްޗެކޭ ބުނެފައެއް ނުވެއެވެ.

ބިންވެރިޔާ ސްކީމުން އުސޫލާ ހިލާފަށް އެޗްޑީސީގެ ތެރެއިން ފަޒުލް ރަޝީދުގެ ބޭބެއަށް ގޯއްޗެއް ހޯދައިދިނުމަށް ކުރިކަމަށް ބުނާ މުއާމަލާތާ ގުޅިގެން ފަޒުލް ވަނީ އޭނާގެ މައްޗަށް ކުރަމުންގެންދާ ތުހުމަތުތަކަށް އިންކާރުކޮށްފައެވެ. ފަޒުލް ވިދާޅުވެފައިވަނީ އެޗްޑީސީގެ ތެރެއިން އުސޫލާ ހިލާފަށް އެއްވެސް މީހަކަށް ގޯއްޗެއް ދީފައިނުވާނޭ ކަމަށެވެ. އެކަމާ ގުޅިގެން ކުރެވެމުންދާ ތަހުގީގުތަކަށް އެއްބާރުލުން ދިނުމަށް ފަޒުލް ރަޝީދު ވަނީ އެޗްޑީސީގެ އެމްޑީކަމުން އިސްތިއުފާވެސް ދެއްވާފައެވެ.

އެޗްޑީސީ މައްސަލަ ފުލުހުން ތަހުގީގުކުރަނީ ޖިނާއީ މައްސަލައެއްގެ ގޮތުގައެވެ. މިކަމާ ގުޅޭގޮތުން ފުލުހުން މީގެކުރިން ބޭއްވި ނޫސްވެރިންގެ ބައްދަލުވުމެއްގައި ބުނެފައިވަނީ، ކުރީ ސަރުކާރުން އުސޫލުން ބޭރުން ބައެއް ފަރާތްތަކަށް ގޯތި ދިނުމަށް ލިޔުން ދޫކޮށްފައިވާކަން ފާހަގަކުރެވިފައިވާކަމަށެވެ. ފުލުހުންގެ އެ ވާހަކަތަކާ ގުޅިގެން މިދިޔަ ސަރުކާރުގެ ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވަނީ ފުލުހުންގެ އެ ވާހަކަތަކަކީ ސިޔާސީ ވާހަކަތަކެއް ކަމަށް ވިދާޅުވެފައެވެ.