ރަށްރަށުގެ މައި މަގުތަކުގައި ތާރު އެޅުމުގެ މަސައްކަތް ތާވަލު ކުރެވި، ބަޖެޓް ކުރެވިގެން ކުރިއަށްދާނެ: ރައީސް މުޢިއްޒު

ރަށް ރަށުގެ މައި މަގުތަކުގައި ތާރު އެޅުމުގެ މަސައްކަތް, ތާވަލު ކުރެވި، އެކަންކަމަށް ބަޖެޓް ހަމަޖެހިގެން ކުރިއަށް ގެންދަވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ މުހައްމަދު މުޢިއްޒު ދެއްވައިފިއެވެ.

ރައީސުލްޖުމްހޫރިއްޔާ މި ޔަގީންކަން ދެއްވާފައިވަނީ ފ.ފީއަލީ، ހަނދުވަރީ މަންޒިލް، އިބްރާހީމް ޝަނޫން، އެ ރަށު ބިން ހިއްކުން، ބަނދަރު ހެދުން، އަދި މަގު ހެދުމުގެ މަޝްރޫޢުގެ ކަންކަން ކުރިއަށްދާނެގޮތެއް އޮޅުންފިލުވުމަށް ދެންނެވި ސުވާލަށް، ޖަވާބު ދެއްވަމުންނެވެ.

އެގޮތުން ރައީސް މުޢިއްޒު ވިދާޅުވީ، ފީ އަލީގެ ބިންހިއްކުމުގެ މަސައްކަތުގެ ތެރެއިން އެމްޓީސީސީން ކުރަމުންދާ މަސައްކަތަކީ ރިވެޓް ޖެހުމަށްޓަކައި ބޮޑު ހިލަ ގެންދިޔުމުގެ މަސައްކަތް ކަމަށެވެ. އަދި އެމަސައްކަތް އަވަސް ކޮށްދިނުމަށް އެމަނިކުފާނު އެދިލައްވާފައި ވާނެ ކަމަށާ ލަސްތަކެއްނުވެ އެކަން ފެށި ނިމިގެންދާނެ ކަމަށެވެ.

ދެން އަޅުގަނޑު ވީ ވަޢުދު ތަކާއި އެއްގޮތައް ވަޢުދުތައް ފުއްދައިދެމުން ދާނަން. އެގޮތުން މަގު ހެދުމަކީ އަޅުގަނޑު ވެފައިވާ އެންމެ ބޮޑު އެއް ވަޢުދު. ރަށްރަށުގައި މައި މަގުތައް ރަނގަޅު ފެންވަރަކަށް، ގިނަ ރަށްތަކުގައި ރަނގަޅު ފެންވަރަކަށް. އެހެންވީމާ ފީއަލީގައި ވެސް އިރާދަކުރެއްވިޔާ މަގުހެދުން ކުރިއަށް ދާނެ. ދެން ތާވަލު ކުރެވިގެން ބަޖެޓް ހަމަޖެހުނު ވަރަކުން ކުރިއަށް ގެންދާނީ މި މަސައްކަތް ތައް.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

މީގެ އިތުރުން ރައީސް މުޢިއްޒު ވިދާޅުވީ، ފީއަލީގެ ބަނދަރު ބޮޑުކުރުމުގެ މަސައްކަތް ވެސް އެމަނިކުފާނު ކުރިއަށް ގެންދަވާނެ ކަމަށެވެ.