ހަނގުރާމައަށް ހޭދަކުރެވޭއިރު، މޫސުމަށް އަންނަ ބަދަލުތަކުން ރައްކާތެރިވުމަށް ހޭދަ ކުރަން އިސްކަމެއް ނުދެވޭ: ރައީސް މުއިއްޒު

ހަނގުރާމަތަކަށް ހޭދަތަށް ކުރުމުގެ ބަދަލުގައި މޫސުމީގޮތުން ކުރިމަތިވަމުންދާ ނުރައްކާތައް ކުޑަކުރުމަށްޓަކައި ހޭދަކުރެވެންޖެހޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އަޒަރުބައިޖާންގެ ބާކޫގައި ފެށި ކޮޕް ސަމިޓް ހުޅުވުމުގެ ސެޝަނުގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، މޫސުމީ ގެއްލުންތަކުން ކުޑަކުރުމުގެ ވާހަކަ ދެކެވެމުންދާއިރު، ދިވެހިރާއްޖެއަކީ އެންމެ ފުރަތަމަ ހިތަށް ސިފަ ކުރެވޭ ޤައުމު ކަމަށާއި، ދިވެހިންނަކީ އާދަޔާހިލާފް ހިތްވަރުގަދަ ބައެއް ކަމަށެވެ.

ރައީސް ވިދާޅުވީ މީގެ 35 އަހަރުކުރިން ފެށިގެންވެސް މި ބާވަތުގެ މަޖިލީސްތަކުގައި ރާއްޖެ އަންނަނީ މޫސުމަށް އަންނަ ބަދަލުތަކަށް ހަރުއަޑުން އަޑު އުފުލަމުންކަމަށެވެ. މިހާ ދުވަސްވެގެންދިޔައިރުވެސް ރާއްޖެއިން ގޮވާލަމުން އަންނަ ކަންކަމަށް ބަދަލު ނާންނަކަމަށާއި، މިކަމުގައި ރާއްޖޭގެ މިސްރާބުހުރީ ހަމަ އެންމެކުރިންވެސް ހުރިގޮތަށްކަމަށް ރައީސް ވިދާޅުވިއެވެ.

މިކަމުގައި ވަރަށް މުހިއްމު ސަބަބުތަކެއް ހުރިކަން ފާހަގަކުރައްވަމުން ރައީސް ވިދާޅުވެފައިވަނީ ކަނޑާއި ތިމާޥެއްޓަކީ ހަމައެކަނި ވަސީލަތެއް ނޫންކަމަށާއި، އެއީ ސަގާފަތް ރަމްޒުކޮށްދޭ ކަމަށެވެ. އެހެންކަމުން ތިމާވެށި ހިމާޔަތްކުރުން ނޫންގޮތެއް ނެތްކަމަށް ރައީސް ފާހަގަކުރެއްވިއެވެ.

ރައީސް ވިދާޅުވީ މޫސުމަށް އަންނަ ބަދަލުތަކާއެކު ގޮންޖެހުންތައް ހުރިނަމަވެސް، ތަސައްވުރެއް އެބައޮތް ކަމަށާއި، އެކަމުގައި އުއްމީދެއް އެބައޮތް ކަމަށެވެ. ހަކަތައިގެ ރޯޑްމެޕެއް އިފްތިތާހްކުރެވިފައިވާކަން ފާހަގަކުރައްވަމުން ރައީސް ވަނީ ކާނާގެ ޔަގީނބްކަން ކަށަވަރުކުރުމާއި، އަތްފޯރާފަށުގައި ބޯހިޔާވަހިކަން ފޯރުކޮށްދިނުމުގެ މަޝްރޫއުތައް ފަށާފައިވާކަމަށެވެ. މީގެ އިތުރުން އިގްތިސާދު ސިންދަފާތުކުރުމުގެ ގޮތުން އިގްތިސާދީ ހާއްސަ ޒޯންތައް ގާއިމްކުރުމާއި ޕޯޓްތައް ތަރައްޤީކުރުމުގެ އިތުރުންވެސް ތަފާތު އެކިއެކި އިންވެސްޓްމަންޓްތައް ފެށުމަށް ޑިވެލޮޕްމަންޓް ބޭންކެއް ގާއިމްކުރުމުގެ މަސައްކަތް ފެށިފައިވާކަން ރައީސްގެ ވާހަކަފުޅުގައި ފާހަގަކުރެއްވިއެވެ.

ރައީސް ވިދާޅުވީ މުއްސަނދި ގައުމުތަކުން ތިމާވެށި ރައްކާތެރިކުރުމަށް ކުރާ ހޭދަ އިތުރުކުރަން ޖެހޭކަމަށާއި، މިކަމުގައި މަނާވީގޮތެއްގައި މަސައްކަތްތައް ކުރަންޖެހޭކަމަށެވެ. އެގޮތުން މިފަހަރު ގެ ސަމިޓަކީ ނަތީޖާ ނެރެވޭ ސަމިޓެއްގެ ގޮތުގައި ހައްދަވަން ޖެހޭކަމަށްވެސް ރައީސް ވިދާޅުވިއެވެ.