ބޮޑުބެރު ޖެހުމަކީ އިސްލާމްދީނުގައި ކަނޑައެޅިގެން ޙަރާމް ކަމެއް: ޝައިޚް ޢަބްދުالله

ބޮޑުބެރު ޖެހުމަކީ ނުވަތަ ކުޅުމަކީ އެއީ އިސްލާމްދީނުގައި ކަނޑައެޅިގެން ޙަރާމް ކަމެއް ކަމަށް ޖަމްޢިއްޔަތުއްސަލަފުގެ ރައީސް އައްޝައިޚް ޢަބްދުالله ބިން މުޙައްމަދު އިބްރާހީމް ވިދާޅުވެއްޖެއެވެ.

ދާރިސްޓީވީ އިން ރޭ ގެނެސްދިން 'ސުވާލަކީ ކޮބާ' ޕްރޮގްރާމުގައި ބެލުންތެރިއަކު ކުރެއްވި ސުވާލަކަށް ޖަވާބުދެއްވަމުން ޝައިޚް ޢަބްދުالله ވިދާޅުވީ ބޮޑުބެރަކީ މިއުޒިކުގެ އާލާތެއް ކަމަށެވެ. އަދި މިއުޒިކަކީ މާތް الله ޙަރާމް ކުރައްވާފައިވާ އެއްޗެއްކަމަށެވެ.

"ބޮޑުބެރަކީ މިއުޒިކުގެ އާލަތްތަކުގެތެރެއިން އާލަތެއް. އެހެންވީމާ އެ އާލަތްތައް ނަބިއްޔާ ޞައްލަالله ޢަލައިހި ވަސައްލަމްގެ ދޫފުޅުމަތިން އެވަނީ ޙަރާމް އެއްޗެއްގެގޮތުގަ ކަނޑައެޅިފަ."

އައްޝައިޚް ޢަބްދުالله ބިން މުޙައްމަދު އިބްރާހީމް

މިއާއެކު ޝެއިޚް ޢަބްދުالله ވަނީ މިއުޒިކުގެ ޙަރާމްކަމާ ބެހޭގޮތުން ނަބިއްޔާ ޞައްލަالله ޢަލައިހި ވަސައްލަމް ވިދާޅުވެފައިވާ ޙަދީޘްބަސްފުޅަށް އަލިއަޅުވާލައްވާފައެވެ. އަދި މިއުޒިކުގެ ޙަރާމްކަމާގުޅޭގޮތުން ގިނަ ދަލީލުތަކެއް އައިސްފައިވާކަން ފާހަގަކުރައްވާފައެވެ.

ޝެއިޚް މިފަދައިން ވިދާޅުވެފައި ވާއިރު، ސަޤާފަތް ދިރުވުމުގެ ނަމުގަ ރާއްޖޭގެ ބައެއް ސްކޫލުތަކުގައި ބޮޑުބެރު ޖެހުން ކުރިއަރުވަން މަސައްކަތް ކުރާކަމަށް ސޯޝަލްމީޑިއާގައި ގިނަ ބަޔަކު ވާހަކަދައްކަމުންދާއިރު ހުޅުމާލޭ ރެހެންދި ސްކޫލުގެ ގްރޭޑް 7 ،8، 9 އަދި 10 އެއްގެ ދަރިވަރުންގެ ހިތްތަކުގައި ސަޤާފީ ރޫޙު ދިރުވާ އާލާކުރުމާއި ބޮޑުބެރުގެ ހުނަރު ދަރިވަރުންނަށް އުނގަންނައިދިނުމުގެ މަޤްސަދުގައި "ރެހެންދި ބޮޑުބެރު" ގެ ނަމުގައި ބޮޑުބެރު ގްރޫޕެއް ތައްޔާރުކުރަން ގަސްތުކުރާ ކަމަށްބުނެ އެ ސްކޫލުގެ އިދާރާއިން މި މަހުގެ 16 ވަނަ ދުވަހު ރަސްމީކޮށް ތައްގަނޑު ޖަހައިގެން ނޯޓެއް ނެރެފައިވެއެވެ.

އަދި އެ ނޯޓު އެ ސްކޫލުގެ ބެލެނިވެރިން ތިއްބަވާ ވައިބާ ގްރޫޕުތަކުގައި ޕޯސްޓު ކޮށްފައިވެއެވެ.