ފީނުދައްކާ ފަތުރުވެރިން ދިގުރަށުން ބޭލުވި މައްސަލަ ބަލަނީ
ލިޔުންތެރިޔާ
ޚަދީޖާ އަރުފާ
އދ.ދިގުރަށަށް އެހެން ރަށްރަށުން ޒިޔާރަތްކުރާ ފަތުރުވެރިންގެ ތެރެއިން ކައުންސިލްގެ އުސޫލާ އެއްގޮތަށް ފީ ނުދައްކާ ފަތުރުވެރިންނާއި ދޭތެރޭ ރަށު ކައުންސިލުން ކަންތައް ކުރާ ގޮތާއި ގުޅޭ ގޮތުގެ އިންކްއަރީއެއް ހިންގާނެ ކަމަށް މިނިސްޓަރ އޮފް ސިޓީސް ލޯކަލް ކައުންސިލްސް އާދަމް ޝަރީފް އުމަރު ވިދާޅުވެއްޖެއެވެ.
ދިގުރަށު ކައުންސިލަށް ފީނުދައްކާ އުޅުނު ފަތުރުވެރިންތަކެއް މޫދުން އަރަން އެރަށު ކައުންސިލް ރައީސް އެންގި މަންޒަރު ފެންނަ ވީޑިއޯއެއް މިދިޔަ ދެތިން ދުވަހަކު މީސް މީޑިއާގައި އާއްމުވެފައިވާއިރު، އެކަމާއި ގުޅިގެން އެއްބައި ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.
އެ މައްސަލާގައި މިނިސްޓަރ އާދަމް ޝަރީފް އެކްސްގައި ކުރެއްވި ޕޯސްޓެއްގައި ވިދާޅުވީ މިއީ ހިތާމަވެރި ހާދިސާއެއް ކަމަށާއި މިކަން ހިނގި ގޮތް ދެނެގަތުމަށް އިންކްއަރީއެއް ކުރިއަށް ގެންދާނަން ކަމަށެވެ.
"ރަށްތަކުގެ އާންމު މިންގަނޑުތައް ހިފެހެއްޓުމަށް އަޅުގަނޑުމެން މަސައްކަތް ކުރަމުންދާއިރު، ފަތުރުވެރިންނަށް އެކަށީގެންވާ މެހެމާންދާރީ އަދާކުރުމަށް ރަށްތަކަށް ބާރުއަޅަން. މި މިންގަނޑުތައް ދެމެހެއްޓުމަށާއި ފަތުރުވެރިކަމުގެ ސިނާއަތް ފުޅާވެ ކުރިއެރުމަށްޓަކައި ކަމާގުޅޭ އެންމެހާ ފަރާތްތަކާއެކު ގާތުން މަސައްކަތްކުރާނަން." އާދަމް ޝަރީފް ވިދާޅުވިއެވެ.
ދިގުރަށު ކައުންސިލްގެ ގަވާއިދުގައި ވާގޮތުން، އެރަށު ތުނޑި އާއި ރަށުގެ ގޮނޑުދޮށަށް ކައިރި ކުރާނަމަ ބޮލަކަށް 3 ޑޮލަރު ދައްކަންޖެހެއެވެ. އަދި ސަފާރީތަކުން އަންނަ ފަތުރުވެރިން ތުނޑީގައި މަޑުކޮށް ބާބަކިޔު ހަދާ ނަމަ، 5 ޑޮލަރު ދައްކަން ޖެހެއެވެ.
މީގެ އިތުރުން، ރަށުގައި ތިބޭ ފަތުރުވެރިން ވެސް، އެ ކަމަށް ހާއްސަކޮށްފައި އޮންނަ ބީޗު ސަރަހައްދު ނޫން އެހެން ބީޗު ތަކަށް ދާ ނަމަ ފީ ދައްކަން ޖެހެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
