މަޑިފުށީ ގޮނޑުދޮށް ހިމާޔަތް ކުރުމުގެ މަސައްކަތް ކުރި ކުންފުނި ޖޫރިމަނާ ކޮށްފި

މ. މަޑިފުށީ ގޮނޑުދޮށް ހިމާޔަތް ކުރުމުގެ މަސައްކަތް ކުރި ކުންފުނި ޖޫރިމަނާ ކޮށްފިއެވެ.

އެންވަޔަރަންމެންޓަލް ޕްރޮޓެކްޝަން އޭޖެންސީ (އީޕީއޭ) އިން ބުނީ މަޑިފުށީ ކޯސްޓަލް ޕްރޮޓެކްޝަން އަދި ބީޗް ނަރިޝްކުރުމުގެ މަޝްރޫއުގެ މަސައްކަތްތައް ގަވާއިދާއި ހިލާފަށް ކުރިއަަށް ގެންދިއުމާ ގުޅިގެން އެ މައްސަލަ އެ އޭޖެންސީން ބަލާފައިވާ ކަމަށެވެ.

އެގޮތުން މަޑިފުށީގައި ކޯސްޓަލް ޕްރޮޓެކްޝަން އަދި ބީޗް ނަރިޝް ކުރުމުގެ މަޝްރޫއުގެ އީއައިއޭ މަރުހަލާ ފުރިހަމަ ކުރުމަކާ ނުލާ، އަދި ތިމާވެށީގެ ކްލިއަރެންސް ހޯދުމަކާ ނުލާ ކޮށްފައިވާ މަސައްކަތްތަކަށް ވަނީ ޖޫރިމަނާ ކޮށްފައެވެ.

އީޕީއޭއިން ބުނީ، ޖޫރިމަނާ ކުރީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާ ބެހޭ ގާނޫނުގެ ދަށުން ހެދިފައިވާ، ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ހެދުމާ ބެހޭ ގަވާއިދުގެ ދަށުން، ކުށްކުރި ފުރަތަމަ ފަހަރަށް ކަނޑައެޅިފައިވާ އަދަދު ކަމަށެވެ.

އެހެންކަމުން މޯލްޑިވްސް އިންފްލައިޓް ކޭޓަރިން ޕްރައިވެޓް ލިމިޓެޑް ޖޫރިމަނާ ކޮށްފައި ވަނީ 20 ހާސް ރުފިޔާއިންނެވެ.

ބަންދު ދުވަސްތައް ހިމަނައިގެން 30 ދުވަހުގެ ތެރޭގައި ޖޫރިމަނާ ފައިސާ އެ އޭޖެންސީއަށް ދައްކާ ހަލާސްކުރުމަށް މިދިޔަ މަހުގެ ފަސްވަނަ ދުވަހު މޯލްޑިވްސް އިންފްލައިޓް ކޭޓަރިން ޕްރައިވެޓް ލިމިޓެޑަށް އީޕީއޭއިން ވަނީ އަންގާފައެވެ.