ޢިމްރާންގެ ޝަރީޢަތުގެ ވަގުތު އެބަ ކައިރިވޭ: މުހައްމަދު އިސްމާއިލް

ހޯމް މިނިސްޓަރު ޢިމްރާން އަބްދުالله ޝަރީޢަތުގެ މަޖިލީހަށް ހާޒިރުކުރާ ދުވަސް ކައިރިވަމުންދާ ކަމަށް ރައްޔިތުންގެ މަޖިލީހުގެ ހޯރަފުށީ ދާއިރާގެ ކުރީގެ މެންބަރު އަދި ޕީޕީއެމްގެ ހަރަކާތު ކޮމިޓީގެ ރައީސް މުހައްމަދު އިސްމާއިލް ވިދާޅުވެއްޖެއެވެ.

ޗާގޯސް މައްސަލަ ހޫނުކޮށް ޕީޕީއެމްގެ ރިޔާސީ ޓިކެޓް ހޯދަންއުޅޭ މީހުން ގިނަވާން ފަށައިފި ކަމަށް ޢިމްރާން ވިދާޅުވުމާއި ގުޅިގެން އެކަމަށް ރައްދު ދެއްވައި މުހައްމަދު ކުރެއްވި ޓްވީޓެއްގައި ވިދާޅުވީ، ކުރީގެ ރައީސް އަދި އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ޖަލަށް ލައިގެން އިމްރާން ބޭނުންވެވަޑައިގަންނަވަނީ ޕީޕީއެމްގެ ޓިކެޓް ކަމަށެވެ. އަދި އެއީ ޕީޕީއެމް އަކީ ވަރުގަދަ ތަރައްޤީގެ ޕާޓީއަކަށް ވާތީ ކަމަށްވެސް އޭނާ ވިދާޅުވި އެވެ.

މިއާއެކު މުހައްމަދު ވިދާޅުވީ ޢިމްރާން ކިތަންމެ ބޭނުންވި ނަމަވެސް ޕީޕީއެމްގެ ރިޔާސީ ޓިކެޓް ނުލިބޭނެ ކަމަށެވެ.

"ޕީޕީއެމުން ކުރާނީ އިމްރާނުގެ ޝަރީއަތް. ވަގުތު އެބަ ކައިރިވޭ." މުހައްމަދު ވިދާޅުވި އެވެ.

ޗާގޯސް މައްސަލާގައި ރާއްޖޭގެ ކަނޑުގެ ސަރަހައްދުން ބައެއް ގެއްލިފައިވާ ކަމަށް ބުނެ އިދިކޮޅު ޕީޕީީއެމުން ކަންބޮޑުވުން ފާޅުކުރަމުންދާތީ، އެކަމަށް ފާޑުވިދާޅުވެ، ޢިމްރާން ކުރެއްވި ޓްވީޓެއްގައި ވަނީ، ޕީޕީއެމްގެ ރިޔާސީ ޓިކެޓް ދެނީ ޗާގޯސް މައްސަލަ ހޫނު ކުރުމަށް އެންމެ ގަދަޔަށް ވާހަކަ ދައްކަވާ، އެކަމުގައި އެންމެ ކުރީ ސަފުގައި މުޒާހަރާކުރާ، ބޭފުޅަކަށް ކަމަށް ގަބޫލުކޮށް، އެކަމަށް ފައި ނަންގަވާ ބޭފުޅުން ގިނަވާކަން ފާހަގަވާން ފަށާފައިވާ ކަމަށް ވިދާޅުވެފައެވެ.