ބޮޑު ކުރާ މުސާރައާއި އެކު ތަކެތީގެ އަގުވެސް ވަނީ ބޮޑު؛ ރައްޔިތުންނަށް ހިތްހަމަޖެހުމެއް ނެތް: އާމިރު

ސަރުކާރުން ދާއިރާތަކުގެ މުސާރަތައް ބޮޑުކުރަމުންދާ އިރު، އެ ބޮޑު ކުރާ މުސާރައާއި އެކު މުދަލާއި ޚިދުމަތުގެ އަގުތައްވެސް ބޮޑުވަމުންދާ ކަމަށާ، އެހެންކަމުން ބޮޑު މުސާރައިން ރައްޔިތުންނަށް ލިބޭ އެއްވެސް ހިތްހަމަޖެހުމެއް ނޯންނަކަމަށް ކުޑަހުވަދޫ ދާއިރާގެ މެންބަރު އަޙްމަދު އާމިރު ވިދާޅުވެއްޖެއެވެ.

މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ހުށަހަޅުއްވާފައިވާ، ރާއްޖޭގައި މުދަލާއި ޚިދުމަތުގެ އަގު ބޮޑުވުން ކޮންޓްރޯލް ކުރުމަށް ސަރުކާރަށް ގޮވާލައި ހުށަހަޅުއްވާފައިވާ ގަރާރަށް ބަހުސް ކުރައްވަމުން އާމިރު ވިދާޅުވީ ދިވެހިރާއްޖޭގެ އިންފްލޭޝަން ރޭޓް އެއްދުވަހުން އަނެއް ދުވަހަށް އިންތިހާއަށް މައްޗަށްދާ ކަމަށެވެ. އަދި އެކިއެކި ސިޔާސީ ބޭނުމަށްޓަކައި މުސާރަތައް ބޮޑުކުރާ ބޮޑުކުރުމަކުން ރައްޔިތުންނަށް އުފަލެއް ނުލިބޭ ކަމަށެވެ.

އެކިއެކި ސިޔާސީ ބޭނުމަށްޓަކައި މުސާރަތައް ކިތަންމެ ބޮޑު ކުރިޔަސް، ބޮޑު ކޮށްލާ މުސާރައަށްވުރެ މާ ބޮޑަށް ތަކެތީގެ އަގު ބޮޑުވޭ. ޚިދުމަތުގެ އަގު ބޮޑުވެގެންދޭ. އެހެންވީމާ އެ މުސާރަ ބޮޑުކުރާ ކުރުމަކުންނެއް ލިބޭ ހަގީގީ ހިތްހަމަޖެހުމެއް ނެތް. ހަގީގަތަކީ މިއީ.

މެންބަރު އަހުމަދު އާމިރު

އާމިރު ވިދާޅުވީ ހެޔޮ ވެރިކަމެއް ކުރުމަކީ ތަކެތީގެ އަގު އެއްދުވަހުން އަނެއް ދުވަހަށް ކުޑަވާނެ ނިޒާމެއްގެ ތެރެއަށް ދިޔުން ކަމަށެވެ. އެފަދައިން ކަން ކޮށްފިނަމަ ރައްޔިތުންގެ ޖީބުގައި ރައްކާ ކުރާނެ ފައިސާ އިތުރުވެ އެ ރައްޔިތުންނަށް ހިތްހަމަޖެހުން ލިބޭނެ ކަމަށްވެސް އާމިރު ވިދާޅުވި އެވެ.

އެކަމަކު މިއަދު އަޅުގަނޑުމެންނަށް ހަމަ ޔަގީނުންވެސް އެނގޭ އެއްޗަކީ ތަކެތީގެ އިންތިހާއަށް. މި ރަމަޟާން މަހު، އަޅުގަނޑަކީ ކޮންމެ ދުވަހަކު ބާޒާރަށް ދިޔަ މީހެއް. ނިމިދިޔަ ރަމަޟާން މަހު. ބައެއް ބޭފުޅުން ރޯދަ ނުހިފާތީ ރަމަޟާން މަސް ނޭނގިދާނެ. އެހެންވީމާ، ނިމިދިޔަ ރަމަޟާން މަހަކީ ހަމަ ގައިމުވެސް، ތަކެތީގެ އަގު ބޮޑުވެފައިވާ މިންވަރު، ހަމަ ބާޒާރަށް ވަޑައިގެންނެވު ކޮންމެ ބޭފުޅަކަށްވެސް އެނގޭނެ.

މެންބަރު އަހުމަދު އާމިރު

އެހެންކަމުން، ތަކެތީގެ އަގު ބޮޑުވުމުގެ ސަބަބުން ރައްޔިތުންނަށް ލިބޭ، ދަތިތަކަށް ލުއި ހޯދައި ދިނުމަށް އެދި މަޖިލީހަށް ހުށަހެޅުމުން، އެކަމާއި ނުރުހުން ފާޅުކޮށް ސަރުކާރަށް ތާއީދު ކުރާ މެންބަރުން ވާހަކަދައްކަވަންވީ ސަބަބެއް ނެތް ކަމަށް އޭނާ ވިދާޅުވި އެވެ.

މިއާއެކު، ދުނިޔޭގެ ބާޒާރުގައި ތަކެތީގެ އަގުބޮޑުވާތީ ރާއްޖޭގައި މުދަލުގެ އަގު އުފުލެނީކަމަށް ވިދާޅުވެ ސަރުކާރަށް ތާއީދުކުރައްވާ މެންބަރުން ދައްކަވާ ވާހަކަފުޅަށް ރައްދުދެއްވައި އާމިރު ވިދާޅުވީ ދުނިޔޭގެ ބާޒާރުގައި މަހުގެ އަގު ބޮޑުވެގެން ރައްޔިތުންނަށް މަސްވެރިކަމުން ލިބޭ އާމްދަނީ ބޮޑުވެ އޭގެ ބޮޑު މަންފާ ރައްޔިތުންނަށް ލިބޭ ތަނެއް ދުވަހަކުވެސް ނުފެންނަ ކަމަށެވެ.

އާމިރު ވިދާޅުވީ ތަކެތީގެ އަގުބޮޑުވާތީ ޝަކުވާކުރުމުން ޖެހިގެން އަންނަ ދުވަހު މުސާރަތައް ބޮޑުކުރުމުން އަނެއްކާ ޖެހިގެން އަންނަ ދުވަހު އިތުރަށް ތަކެތީގެ އަގު އުފުލޭ ކަމަށެވެ. އެހެންކަމުން މުދަލާއި ޚިދުމަތުގެ އަގު ކުޑަވާނެ ނިޒާމަކަށް ސަރުކާރުން މަސައްކަތްކުރުމަށް އޭނާ ވަނީ ގޮވާލާފައެވެ.