ރައްޔިތުންގެ ހައްގުތަކަށް ހުރަސް އަޅަން ފެށީމާ ރިޔާސަތު ބަދަލުކުރާ ހިސާބަށްވެސް ދާނެ: ޝިފާއު

ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދަށް މަޖިލީހުގެ ރައީސްކަން ދެއްވީ ވަރަށް އިހްތިރާމާއި އެކުގައި ކަމަށާ، އެހެންނަމަވެސް، ރައްޔިތުންގެ ހައްގުތަކަށް އަރައިގަންނަ ނަމަ، އެމަނިކުފާނު ރިޔާސަތުން ދުރުކުރަންވެސް ޖެހޭނެ ކަމަށް މަޖިލީހުގެ އިހަވަންދޫ ދާއިރާގެ އެމްޑީޕީ މެންބަރު މުހައްމަދު ޝިފާއު ވިދާޅުވެއްޖެއެވެ.

މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ހުށަހަޅުއްވާފައިވާ، ރާއްޖޭގައި މުދަލާއި ޚިދުމަތުގެ އަގު ބޮޑުވުން ކޮންޓްރޯލް ކުރުމަށް ސަރުކާރަށް ގޮވާލައި ހުށަހަޅުއްވާފައިވާ ގަރާރަށް ބަހުސް ކުރައްވަމުން، ޝިފާއު ވިދާޅުވީ ދުނިޔޭގެ އެހެން ގައުމު ތަކުގައިވެސް އިންފްލޭޝަން ރޭޓް މައްޗަށްދާ ކަމަށާ، އަދި ރާއްޖޭގައި އިންފުލޭޝަން ރޭޓް މައްޗަށް ދާއިރު، އެކަން ކުޑަ ކުރުމަށް ސަރުކާރުން މަސައްކަތް ތަކެއް ކުރަމުން އަންނަ ކަމަށެވެ. އެގޮތުން ސަރުކާރުގެ މުވައްޒަފުންގެ މުސާރަ ބޮޑު ކުރި ކުރުން ފާހަގަކުރައްވައި އޭނާ ވަނީ އެކަމަށްޓަކައި ސަރުކާރަށް ޝުކުރު އަދާ ކުރައްޖެހޭނެ ކަމަށް ވިދާޅުވެފައެވެ.

މިއާއެކު ޝިފާއު ވިދާޅުވީ ފަހަކަށް އައިސް އެންމެ އަޑުގަދަކޮށް އިވުނު އަޑަކީ ކޮތަޅުގެ އަގު ބޮޑު ވާހަކަ ކަމަށެވެ. އަދި ކޮތަޅުން އިތުރުވާ 2 ރުފިޔާގެ މައްސަލައާއި، އެނޫންވެސް އެ ގާނޫނުގައި ހުރި މައްސަލަތައް ހައްލު ކުރުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ބިލެއް ފޮނުވާފައިވާ ކަމަށް އޭނާ ވަނީ ހަނދާންކޮށްދެއްވާފައެވެ.

ޝިފާއު ވިދާޅުވީ، ރައްޔިތުންނަށް ލުއި ހޯދައިދޭން ބޭނުންވާނަމަ އެކަން ކަން ކުރަންޖެހޭ ކަމަށެވެ. އަދި ސަރުކާރުން ރައްޔިތުންނަށް ލުއި ހޯދައި ދިނުމުގެ މަގުސަދުގައި ހުށަހަޅާ އެފަދަ ބިލުތަކަށް ހުރަސްއަޅާތަނަކަށް މަޖިލީހުގެ ރިޔާސަތު ވެގެން ނުވާނެ ކަމަށްވެސް އޭނާ ވިދާޅުވި އެވެ.

ގާނޫނަށް ގެނެވުނު ބަދަލާއިއެކު، ކޮތަޅުގެ އަގުން އިތުރަށް ނެގޭ ދެ ރުފިޔާ އެއީ ރައްޔިތުންނަށް ބުރައެއް ކަމަށް ބުނެ، ރައްޔިތުން އަންނަނީ އެކަން ހައްލުކުރަން އެދެމުން. އެދެމުން އައި ހިނދު ސަރުކާރުން އެ ކޮތަޅުން ނަގާ، އިތުރަށް ނަގާ ދެ ރުފިޔާ ކަނޑާލުމަށް ޓަކައި، މި ރައްޔިތުންގެ މަޖިލީހަށް އެބައޮތް ބިލެއް ފޮނުވާފައި. އެ ބިލުގެ މަސައްކަތް ހިނގިޔަ ނުދީ، ހިފަހައްޓާފައި އޮންނަނީ މި ރައްޔިތުންގެ މަޖިލީހުގެ ރިޔާސަތުން. އެކަން ހައްލު ކުރަން އެބަ ޖެހޭ.

މުހައްމަދު ޝިފާއު

ޝިފާއު އިތުރަށް ވިދާޅުވީ ލަސްވަނީ ކޮތަޅުގެ މައްސަލަ އާއި ގުޅޭ ބިލު އެކަނި ނޫން ކަމަށާ، އޭގެ އިތުރުން ވެސް ސަރުކާރުން ފޮނުވާފައިވާ، ރައްޔިތުންނާއި ގުޅުންހުރި، އެތައް ބިލެއްގެ މަސައްކަތް ލަސްވެފައިވާ ކަމަށެވެ.

މި ރައްޔިތުންގެ މަޖިލީހުގެ ރިޔާސަތުން މަސައްކަތް ކުރައްވަމުން އެދަނީ މި ރައްޔިތުންގެ މަޖިލިސް ފަންކްޝަން ވިޔަ ނުދިނުމަށްޓަކައި. ރައްޔިތުންގެ މަޖިލީހުން ރައްޔިތުންނަށް ފައިދާހުރި އެއްވެސް މަސައްކަތެއް ކުރިޔަ ނުދިނުމަށްޓަކައި. އެ މަސައްކަތް ރައްޔިތުން ބަލައެއް ނުގަނޭ. އަޅުގަނޑުމެން އެމްޑީޕީ މެޖޯރިޓީއެއް މަޖިލީހުގައި އޮވެގެން މިފަދަ ހުރިހާ ކަމެއް ހައްލުކުރަން މަސައްކަތް ކުރާނަން.

މުހައްމަދު ޝިފާއު

އަޅުގަނޑުމެން ނުހަނު އިހްތިރާމާއި އެކު އެމްޑީޕީގެ ރައީސް އަށް ރައްޔިތުންގެ މަޖިލީހުގެ ރައީސްކަށް ދިނީ. އެހެން ނަމަވެސް، ރައްޔިތުންގެ ހައްގުތަކަށް ހުރަސްއަޅަން ފެށީމާ، ރައްޔިތުންގެ މަސްލަހަތަށް ހުރަސް އެޅީމާ، އަޅުގަނޑުމެންގެ ކެތްތެރިކަންވެސް ކޮޅުން ލާނެ. ރައްޔިތުންގެ މަޖިލީހުގެ ރިޔާސަތު ބަދަލުކުރާ ހިސާބަށް ވެސް ދާނެ.

މުހައްމަދު ޝިފާއު

ޝިފާއު ވިދާޅުވީ، މަޖިލީހުގެ އެމްޑީޕީ މެންބަރުންގެ މަސައްކަތަކީ ރައްޔިތުންނަށްޓަކައި މަސައްކަތް ކޮށް، ރައްޔިތުންގެ ދަތިތަކަށް ލުއި ހޯދައި ދިނުން ކަމަށެވެ. އަދި ރިޔާސަތު ބަދަލުކޮށްގެން ނަމަވެސް، އެކަން ކުރައްވާނެ ކަމަށް އޭނާ ވިދާޅުވި އެވެ.