ދަ ޑިމޮކްރެޓްސްގެ މެމްބަރުން އަނދުން ހުސޭނަށް، ޣަފޫރު އާމިރަށް އިންޒާރު ދޭ މައްސަލައެއް!

ރައްޔިތުންގެ މަޖިލީސް ތެރޭ އެއް މެމްބަރަކު އަނެއް މެމްބަރަށް އިންޒާރު ދީފައިވާ މައްސަލަތަކެއް ރިޔާސަތުގެ ސަމާލުކަމަށް ގެންނަވައިފި އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގެ ފުރަތަމަ ދަންފަޅި ސައިގަނޑިއަށް މެދުކަނޑާލުމަށްފަހު އަލުން ފެއްޓެވުމާއެކު، މަޖިލީހުގެ ހެންވޭރު ދެކުނު ދާއިރާގެ މެމްބަރު ހުސެއިން ޝަމީމު (އަނދުން ހުސެއިން) ވަނީ މަޖިލީސް މެމްބަރުން އެއް މެމްބަރަކު އަނެއް މެމްބަރަށް އިންޒާރުދެމުންދާކަން މަޖިލީހުގެ ރިޔާސަތުގެ ސަމާލުކަމަށް ގެންނަންވާފަ އެވެ.

އޭނާ ވިދާޅުވީ ސައިގަޑީގައި، މަޖިލީހުގެ ސައި ކޮޓަރީގައި ހުންނަވަނިކޮށް ދަ ޑިމޮކްރެޓްސް އަށް ނިސްބަތްވާ 4 މެމްބަރުން އޭނާ އަށް އިންޒާރުދީފައިވާ ކަމަށެވެ. އަދި އެކަން މަޖިލީހުގެ ރައީސް މުޙައްމަދު ނަޝީދުގެ ސަމާލުކަމަށް ގެނައުމުން، އެކަމާއި ގުޅިގެން ފިޔަވަޅު އެޅުއްވުމުގެ ބަދަލުގައި ނަޝީދު ވެސް އިންޒާރު ދެއްވާފައިވާކަމަށް އަނދުން ހުސެއިން ވިދާޅުވި އެވެ.

"ބްރޭކް ގަޑީގައި ސައިބޯން ސައިކޮޓަރިއަށް ދިޔައިރު، ސިޑިމަތިން އަޅުގަނޑަށް ވަނީ އިންޒާރުދީފަ، ދި ޑިމޮކްރެޓްސްގެ 4 މީހަކު އިންޒާރު ދީ ހަޑިހުތުރު އެއްޗެއްހި ގޮވާފައި، އެވާހަކަ އަޅުގަނޑު މަޖިލީހުގެ ރައީސް މުޙައްމަދު ނަޝީދު ސައިކޮޓަރީގައި އިންނަވަނިކޮށް ދެންނަވީމާ އެތައް ބައެއްގެ ކުރިމަތީގައި އެވާހަކަ ދެންނެވީމަ ވިދާޅުވީ އަދި ކަލޭ ކަންފަތްމަތީގައި ވެސް އެމީހުން ލައްވާ ޖައްސުވާނަމޭ، ހޭއަރުވާލާނަމޭ"

ހެންވޭރު ދެކުނު ދާއިރާގެ މެމްބަރު ހުސެއިން ޝަމީމު

އަނދުން ހުސެއިން އެ ވާހަކަތައް ރިޔާސަތުގެ ސަމާލުކަމަށް ގެންނަވައި ވިދާޅުވީ އެ މައްސަލަ ރަސްމީކޮށް ރިޔާސަތަށް ހުށައަޅާކަމަށެވެ. އަދި އެކަމުގައި ފިޔަވަޅު އަޅުއްވައި ދެއްވުމަށް އެދިލައްވާ ކަމަށެވެ.

ޝަމީމުގެ ވާހަކައިގެ ތެރެއިން ނިޒާމީ ނުކުތާއެއް ނަންގަވާ ރައްޔިތުންގެ މަޖިލީހުގެ ކުޑަހުވަދޫ ދާއިރާގެ މެމްބަރު އަހުމަދު އާމިރު ވެސް ވަނީ އޭނާއަށް ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ އިންޒާރުދެއްވާފައިވާކަން މަޖިލީހުގެ ރިޔާސަތުގެ ސަމާލުކަމަށް ގެންނަވާފަ އެވެ.

"ހަނިމާދޫ ދާއިރާގެ އިއްޒަތްތެރި މެމްބަރު ސައިކޮޓަރީގައި އަޅުގަނޑަށް "ހޭއަރުވާލާނަމޭ" ވެސް ވިދާޅުވެފައި ވަނީ. އެއީ ކޮން ނިޔަތެއްގައި ކޮން ބޭނުމެއްގައި ކަމެއް ނޭނގޭ އަޅުގަނޑަކަށް"

ކުޑަހުވަދޫ ދާއިރާގެ މެމްބަރު އާމިރު

އާމިރު ވިދާޅުވީ މެމްބަރުން އެކަކު އަނެކަކަށް އިންޒާރު ދޭ މައްސަލަ ބެލޭނެ އިންތިޒާމުތައް ހަމަޖެހިފައި އޮތުމަކީ ކޮންމެހެން މުހިންމުކަމެއް ކަމަށް ދެކިވަޑައިގަންނަވާ ކަމަށެވެ.

ރައްޔިތުންގެ މަޖިލީގެ މި ހަފްތާގެ ޖަލްސާގައި، ރައްޔިތުންގެ މަޖިލީހުގެ ރައީސް މުޙައްމަދު ނަޝީދު މެމްބަރަކަށް އިންޒާރުދެއްވާ ވީޑިއޯއެއް ފެންމަތިވެފައިވާއިރު، އެމަނިކުފާނަށް ވެސް މެމްބަރުންގެ ފަރާތުން އެކި އިންޒާރުތައް ދީފައިވާ މައްސަލަތައް ވެސް ވަނީ ފެންމަތިވެގެން ގޮސްފަ އެވެ.