ކުނި އުކާލުމަށް ވެމްކޯއިން ނަގާ ފީތައް ކުޑަކޮށްދޭން ޑރ. މުއިއްޒު ވަޢުދުވެވަޑައިގެންފި!
ކުނި އުކާލުމަށް ވެމްކޯ އިން މާލޭގައި ނަގަމުން އަންނަ އަގުތައް ކުޑަކޮށްދެއްވާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެ އެވެ.
މާފަންނުގައި ޕީޕީއެމްގެ ޖަގަހައެއް ހުޅުވުމަށް އިއްޔެ ބޭއްވި ރަސްމިއްޔާތުގައި ވާހަކަދައްކަވަމުން މުޢިއްޒު ވިދާޅުވީ މާލޭގެ ރައްޔިތުންނަށް ކުނީގެ މައްސަލައަކީ އެންމެ ބޮޑު އެއް މައްސަލަ ކަމަށެވެ. އަދި ކުނި އުކާލުމުގެ މަސައްކަތް ކުރާ ވެމްކޯއިން އެކަން ކުރަނީ 'އާދަޔާ ޚިލާފު ބޮޑު އަގު' ނަގައިގެން ކަމަށްވެސް އެމަނިކުފާނު ވިދާޅުވި އެވެ.
މީހުން ދިރިއުޅޭ ގޭބިސީތައް ފިޔަވާ އެހެން ތަންތަނުން ކުނި އުކާލުމަށް ވެމްކޯ އިން ނަގާ ފީ އަށް ބަދަލު ގެނައީ މިދިޔަ ޖުލައި މަހުން ފެށިގެންނެވެ. އެ އަގުތައް އުޅެނީ 250ރ. އާއި 950ރ. އާ ދެމެދުގަ އެވެ.
އެފަދައިން ކަން ކުރުމުން އާންމުންނަށް ވަނީ ބޮޑު ތަކުލީފަކަށް ކަމަށާ ވެމްކޯ އިން މިފަހުން އަގަށް ގެނައި ބަދަލުގެ ސަބަބުން އާންމުންނަށް ދަތިވާއިރު، ކުދި އަދި މެދުފަންތީގެ ވިޔަފާރިކުރާ މީހުންނަށްވެސް ބޮޑެތި ގެއްލުން ވަމުންދާ ކަމަށް މުއިއްޒު ވިދާޅުވި އެވެ.
"އެހެންވީމަ އަޅުގަނޑު ދޭ ޔަގީން ކަމަކީ، އަޅުގަނޑަށް ރައްޔިތުން އިތުބާރު ކުރައްވައި މި އަންނަ ހޮނިހިރު ދުވަހުގެ ވޯޓުގައި މި މާލެ ސިޓީން ވޯޓު ދެއްވައި އިންތިހާބުކޮށްފި ނަމަ، ވެމްކޯގައި މިހިރަ އެއްގޮތަކަށް ވެސް ބަލައި ނުގަނެވޭ ބޮޑު އަގުތައް ކުޑަކޮށްދީ، ރައްޔިތުންނަށް ފޯރާވަރުގެ އަގުތަކަކަށް ހަދައިދޭނަން،"
ޑރ. މުހައްމަދު މުޢިއްޒު
މުއިއްޒު އިތުރަށް ވިދާޅުވީ، ވެމްކޯގެ އަގުތައް ބޮޑުކޮށްގެން އުޅެނީ ކުންފުންޏަށް ފައިދާ ނުވާތީއެއް ނޫނެވެ. އެހެނެއް ކަމަކު އެކަން ކުރީ ކުންފުނިން ހިންގަން ނޭނގިގެންނެވެ. އެހެންކަމުން އެމަނިކުފާނުގެ ވެރިކަމެއްގައި، މެވްކޯ ރަނގަޅަށް ހިންގައި، އެއީ ރައްޔިތުންނަށް ކަންކަން ފަސޭހަ ކޮށްދޭ ކުންފުންޏަކަށް ހަދައިދެއްވާނެ ކަމަަށް މުޢިއްޒު ވިދާޅުވިއެެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
