ރިޔާސީ އިންތިޚާބާމެދު ރާއްޖޭގެ 100 ދީނީ ޢިލްމުވެރީންގެ ބަސް: ޑރ. މުޢިއްޒަށް ވޯޓު ދެއްވާ!

ދިވެހި ރާއްޖޭގައި ދީނީ ތަޤުރީރު ކުރުމާއި ވަޢުޟުބުނުމުގެ ހުއްދަ ދޫކުރެވިފައިވާ 100 ޢިލްމުވެރިޔަކު ޕީޕީއެމް/ޕީއެންސީގެ ކެންޑިޑޭޓް ޑރ.މުހައްމަދު މުއިއްޒުއަށް ތާއީދު ކުރައްވައި އެމަނިކުފާނަށް ވޯޓު ދެއްވުމަށް ދިވެހި ރައްޔިތުންގެ ކިބައިން އެދިވަޑައިގެންފިއެވެ.

ރާއްޖޭގައި ތިއްބެވި އެންމެ ފުންނާބު އުސް، އަދި ދިވެހިންގެ ގަދަރު ލިބިފައިވާ 100 ޢިލްމުވެރިން މުޢިއްޒަށް ތާއީދު ކުރައްވާކަން ހާމަކޮށް ނެރުނު ބަޔާނުގައި ވަނީ، ދިވެހިރާއްޖޭގެ އިސްލާމީ ޝަޚުޞިއްޔަތު ހަރުދަނާކޮށް، ދިވެހިރާއްޖޭގެ މިނިވަންކަމާއ،ި ސިޔާދަތު ނަގަހައްޓައި، ޢުމްރާނީ ގޮތުންނާއި، އިޖުތިމާޢީ ގޮތުން، ޤައުމު ބިނާކުރުމަށް ބޭނުންވާ ޢިލްމާއި، ހުނަރާއި، ތަޖުރިބާގެ ގޮތުން އެންމެ ޤާބިލު، ޚުލުޤު ހެޔޮ ކެންޑިޑޭޓަކީ ޑރ. މުޙައްމަދު މުޢިއްޒުކަމަށް އެ ޢިލްމުވެރިން ދެކިލައްވާ ކަމަށް ވިދާޅުވެފައެވެ.

"ވީމާ ކެންޑިޑޭޓް ނަންބަރު 4 ޑރ. މުޙައްމަދު މުޢިއްޒު އާއި އެ މަނިކުފާނުގެ އިންތިޚާބީ ބައިވެރިޔާ އަލްއުސްތާޛު ޙުސައިން މުޙައްމަދު ލަޠީފަށް ވޯޓުދެއްވުމަށް ދިވެހިރާއްޖޭގެ ލޮބުވެތި ރައްޔިތުންނަށް އަޅުގަނޑުމެން އިލްތިމާސްކުރަމެވެ. މާތް الله، ރައްޔިތުންނާއި ޤައުމުގެ މަޞްލަޙަތަށް އެންމެ ހެޔޮ ގޮތަށް، ކަންކަން ފަހިކުރައްވާށި! އާމީން!" ޢިލްމުވެރިންގެ ބަޔާނުގައި ވެއެވެ.

މިއާއެކު އެ ޢިލްމުވެރިން ވަނީ، މި ޙާލަތުގައި މާތްވެގެންވާ އިސްލާމްދީނާއި ޤައުމުގެ މަޞްލަޙަތު އިސްކޮށް، ޤައުމުގެ ޞުލްޙަ މަސަލަސްކަމާއި، އަމަންއަމާންކަން ރައްކާތެރިކޮށް ހިފަހައްޓައި، މުސްލިމުންގެ މެދުގައި އޮންނަންޖެހޭ އެކުވެރިކަމާއި، އެއްބައިވަންތަކަން ދެމެހެއްޓުމަށާއި، މުސްލިމުންގެ މެދުގައި ބައިބައިވުމާއި ޢަދާވާތްތެރިވުމާއި، ނަފުރަތު އުފެއްދުމުގެ އެއްވެސް އަމަލަކަށް ޖާގަނުދެއްވުމަށް، ދިވެހި ރައްޔިތުންނަށް ނަޞޭޙަތްތެރިވެ ވަސިއްޔަތް ކުރައްވާފައެވެ.