ސަލަފް ރިޙްލާ: މުޅި ރ.އަތޮޅުގައި ދީނީ އިޖުތިމާޢީ ހަރަކާތްތައް؛ މާދަމާ މަސްރޭހެއް!

ރާއްޖޭގައި ދަޢުވަތުގެ މައިދާނުގައި އެންމެ އިސްކޮށް ހަރަކާތްތެރިވާ އެއް ޖަމިއްޔާ އެއް ކަމަށްވާ ޖަމްޢިއްޔަތުއް ސަލަފްއާއި ރ. އަތޮޅުގެ އެކި ރަށްތަކުގެ ކުލަބު ޖަމްޢިއްޔާތަކާއި މުއައްސަސާތައް ގުޅިގެން ކުރިއަށް ގެންދާ "ސަލަފް ރިޙްލާ" ޕްރޮގްރާމްގެ ތެރެއިން މުޅި ރ. އަތޮޅުގައި ދީނީ އިޖުތިމާޢީ ހަރަކާތައް ފެށިގެން ކުރިއަށްދާ ކަމަށް އެ ޖަމިއްޔާ އިން ބުނެފިއެވެ.

ޖަމިއްޔަތުއްސަލަފުން ކުރިއަށް ގެންދާ އެންމެ ބޮޑު، ދީނީ، އިޖުތިމާޢީ ހަރަކާތް ’ސަލަފް ރިޙްލާ‘ ރޭ ރަސްމީކޮށް ވަނީ ފަށާފައެވެ. އެގޮތުން، ރ.އުނގޫފާރު އިސްލާމީ މަރުކަޒުގެ ކުރިމަތީގައި "މަގޭ ދަރިފުޅާ" ނަމުގައި ޚާއްޞަ ސެޝަނެއް ވަނީ ކުރިއަށް ގެންގޮސްފައެވެ. މި ސެޝަންގައި ރާއްޖޭގެ ފުންނާބު އުސް ދީނީ އިލްމުވެރިއެއް ކަމަށްވާ އައްޝައިޚް ޢަލީ ޒާހިރު ބިން ސަޢީދު ޤާސިމް އާއި، އަލް ޤާރީ މުހައްމަދު ތައުފީގުގެ އިތުރުން ޖަމިއްޔަތުއް ސަލަފުގެ ޗީފް މާކެޓިންގ އޮފިސަރ ޢަލީ ރަމީޒު ވަނީ ބައިވެރިވެވަޑައިގެންފައެވެ.

ރ. އުނގޫފާރުގައި ރޭ ކުރިއަށް ގެންދިޔަ މި ސެޝަނުގެ އިތުރުން، ރ.ކިނޮޅަހާއި، ރ. މަޑުއްވަރީގެ އިތުރުން ރ. މާކުރަތުގައި ރޭ ވަނީ އެކި ދީނީ ޢިލްމުވެރިން ދަރުސް ދެއްވާފައެވެ.

މީގެ އިތުރުން، ރ.ހުޅުދުއްފާރުގައި 5 ދީނީ ޢިލްމުވެރިންނާއި އެކު "ރުޤުޔާ ފޯރަމް" އެއް ކުރިއަށް ގެންގޮސްފައިވާއިރު, ރ.މީދޫގައި ވަނީ ކޯޑު ނުކޮށް ވެބްސައިޓް ހަދަން ދަސްކޮށްދޭ އިވެންޓެއް ކުރިއަށް ގެންގޮސްފައެވެ. އަދި ރ.ރަސްމާދޫގައިވެސް ޕޭރެންޓިންގ ވޯކްޝޮޕް އެއް ރޭގައި ވަނީ ކުރިއަށް ގެންގޮސްފައެވެ.

ރޭގެ ހަރަކާތް ތަކަށްފަހު، މިއަދު ހެނދުނު ރ.ކިނޮޅަހުގައި ކުޑަކުދިންނަށް ޚާއްސަ ކޮށްގެން ސެޝަނެއް ކުރިއަށް ގެންގޮސްފައިވާއިރު، ރ. ހުޅުދުއްފާރުގަައި ނަމާދު ވޯކްޝޮޕް އެއްވެސް މިއަދު ވަނީ ކުރިއަށް ގެންގޮސްފައެވެ.

ދީނީ މި ހަރަކާތް ތަކުގެ އިތުރުން، މިއަދުވެސް ރ.ހުޅުދުއްފާރުގައި ވަނީ، އައިސީޓީ އިން އޮފީސް މެނޭޖްމަންޓް ވޯކްޝޮޕެއް ކުރިއަށް ގެންގޮސްފައެވެ. އަދި ހަމަ އެހެންމެ، ރ.މީދޫ އުއްމީދު ސްޕޯޓްސް އެކަޑެމީ ގެ 13 އަހަރުން ދަށުގެ ފިރިހެން ކުދިންނަށްވެސް މިއަދު ވަނީ ޓްރެއިނިންގ ސެޝަންއެއް ކުރިއަށް ގެންގޮސްފައެވެ.

މީގެ އިތުރުން، މިއަދުގެ އަސުރު ނަމާދަށް ފަހު ރ. އަތޮޅު ގެ ބައެއް ރަށްރަށުގައި އެކި މައުޟޫތަކަށް ދީނީ ޢިލްމުވެރިން ވަނީ ދަރުސް ދެއްވާފައެވެ. އަދި މިރޭވެސް ޢިލްމުވެރިންގެ ބޮޑު ދަރުސްތައް ރ. އަތޮޅުގެ އެކި ރަށްރަށުގައި ވަނީ ކުރިއަށް ގެންގޮސްފައެވެ.

ސަލަފް ރިޙްލާ ގެ ހަރަކާތްތައް މިމަހު ނުވަ ވަނަ ދުވަހާއި ހަމައަށް ކުރިއަށް ގެންދިޔުމަށް ހަމަޖެހިފައިވާއިރު, ރ. އުނގޫފާރު ގައި މާދަމާ މަސްރޭހެއްވެސް ބޭއްވުމަށް ވަނީ ހަމަޖެހިފައެވެ. މި މަސްރޭހުން އެއްވަނަ އަށް އަންނަ ޓީމަކަށް 5000 ރުފިޔާ، ދެވަނަ ޓީމަށް 2500 ރުފިޔާ އަދި ތިންވަނަ ޓީމަށް 1500 ރުފިޔާ ލިބިގެންދާނެ ކަމަށް ސަލަފުން ބުނެފައިވެއެވެ.

މީގެ އިތުރުން ވެސް ކުރިއަށް އޮތް ދެދުވަސްތެރޭގަައިވެސް ތަފާތު އެކި ދީނީ އިޖުތިމާޢީ ހަރަކާތްތަކެއް ކުރިއަށް ގެންދިޔުމަށް ހަމަޖެހިފައިވާއިރު، މި ކޮންމެ ހަރަކާތެއްވެސް ކުރިއަށްގެންދަނީ ކަމުގެ ގާބިލް، ތަޖުރިބާކާރު ފަންނީ ބޭފުޅުންނެވެ.

ސަލަފު ރިޙްލާ އަކީ ދީނީ ޢިލްމުވެރިންނާއި ރާއްޖޭގެ ފާހަގަކުރެވޭ ޑޮކްޓަރުންނާއި އަދި އެކިއެކި ފަންނުތަކުގެ ތަޖުރިބާކާރު މާހިރުން ބައިވެރިވެގެން މުޅި އަތޮޅަށް ހުޅުވާލެވިގެން ބާއްވަމުން އަންނަ ދިނީ، ސީއްޙީ އަދި އިޖްތިމާޢީ ހޭލުންތެރިކަމުގެ ޕްރޮގްރާމެކެވެ. 2009 ވަނަ އަހަރު ފެށި މި ޕްރޮގްރާމު، ކޮވިޑް19 ގެ ބަލިމަޑުކަމުގެ ސަބަބުން މެދުކެނޑިފައި އޮތުމަށްފަހު އަލުން މިވަނީ ފެށިފައެވެ. މިފަހަރުގެ ރިޙްލާގައި ޖުމުލަ 15 ޢިލްމުވެރިންނާއި 2 ޑޮކްޓަރުންގެ އިތުރުން، އެކިއެކި ފަންނުތަކުގެ ތަޖުރިބާކާރު މާހިރުން ވަނީ ބައިވެރިވެފައެވެ.