ސަރުކާރުގެ އިސްލާހުން މަސްދަރު ހާމަކުރުން ލާޒިމުކުރުމުގެ މަގުސަދު ގެއްލޭ: އިމްތިޔާޒް
ހެއްކާ ބެހޭ ގާނޫނަށް ސަރުކާރުން ހުށަހެޅި އިސްލާހުން، ނޫސްވެރިން މަސްދަރު ހާމަކުރުން ލާޒިމުކުރުމަށް ސަރުކާރުން ހެއްކާ ބެހޭ ޤާނޫނުގައި މާއްދާއެއް ހިމެނުމުގެ މަޤުޞަދު ގެއްލޭ ކަަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ މިއަދު ވިދާޅުވެއްޖެ އެވެ.
ހެއްކާ ބެހޭ ގާނޫނަށް ސަރުކާރުގެ ފަރާތުން ގަމު ދާއިރާގެ އެމްޑީޕީ މެމްބަރު މުހައްމަދު ވިސާމު ހުށަހެޅުއްވި އިސްލާހުގައިވާ ގޮތުން، މަސްދަރު ހާމަކުރުމުގެ އަމުރެއް ހޯދުމަށް ޕްރޮސެކިއުޓާ ޖެނެރަލްގެ އޮފީހުން ހައިކޯޓުގައި އަމުރަކަށް އެދެވޭނީ ޓެރަރިޒަމްގެ ކުށްތަކާއި ގައުމީ ސަލާމަތަށް ނުރައްކާވެދާނެ ފަދަ އަމަލެއްގެ ކުށުގެ ދައުވާ މީހަކަށް އުފުލާ ހާލަތުގަ އެވެ.
މި އިސްލާހާއި ގުޅިގެން މިއަދު އޮތް މަޖިލީހުގެ ޖަލްސާގައި ބަހުސް ކުރައްވަމުން އިމްތިޔާޒް ވިދާޅުވީ ހެއްކާ ބެހޭ ގާނޫނު ހަދަން ސަރުކާރުން ފުރަތަމަ ބިލު ހުށަހެޅީ ނޫހެއްގައި ރިޕޯޓްކުރާ ޓެރަޒިޒަމްގެ މައްސަލައެއް ވަގުތުން ބެލުމަށް ޓަކައި ދައުލަތުން އެކަމުގެ ތެރެއަށް ވަގުތުން ވަނުމަށް މަގުފަހިކުރުމުގެ މަގުސަދުގައި ކަމަށެެވެ. އެހެންނަމަވެސް، މިހާރުގެ އިސްލާހުން އެކަން އެގޮތަށް ކުރެވެން ނެތްކަންވެސް އޭނާ ފާހަގަކުރެއްވިއެވެ.
"ޓެރަރިޒަމްގެ މައްސަލައެއް ވެއްޖެއްޔާ ވަގުތުން ތަހުގީގެއް ހިންގެން ޖެހޭނެ ކަމަށް ބަލާފައި މަސްދަރު ހާމަކުރުމަށް ބޭނުންވެގެން ހުށަހެޅި ބިލެއް. މިވަގުތުގައި އަނެއްކާ ދެވަނަ ފަހަރަށް އެއަށް މި ހުށަހެޅި އިސްލާހުގައިވާ ގޮތުން ، ހަމަ އެކަނި މިކަން ކުރެވެން މިއޮތީ ކުށެއްގެ ދައުވާއަކާ ގުޅިގެން ހިނގާ ޝަރީއަތެއްގައި،"
އިމްތިޔާޒް ފަހުމީ
މިއާއެކު އިމްތިޔާޒް ވިދާޅުވީ މިހާރު ހުށަހަޅާފައިވާ ބިލު އޮތް ގޮތުން، ޓެރަރިޒަމާ ގުޅުން ހުރި ކަމެއް ނުވަތަ ގައުމީ ސަލާމަތާ ގުޅުން ހުރި ކަމެއް ތަހުގީގުކުރެވޭނެ ގޮތެއް ނެތް ކަމަށާ، "އެހެންވީމާ އެެއްކަލަ ހަގީގީ މަގުސަދު ގެއްލިއްޖެ ކަަމަށް" ވެސް އިމްތިޔާޒް ވިދާޅުވި އެވެ.
މީގެ އިތުރުން، ސަރުކާރުން އެ ޤާނޫނު ތަސްދީގުކޮށް އެ ޤާނޫނު ވަރަށް ބޮޑަށް ދިފާއުކުރުމަށްފަހު މިހާރު އަނެއްކާ ކުއްލި ގޮތަކަށް އެފަދަ އިސްލާހެއް ހުށަހެޅުއްވުމުން ސަރުކާރުގެ ސްޓޭންޑު ބަދަލުވެފައިވާ ކަމަށް ވެސް އޭނާ ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
