ފުށިދިއްގަރުފަޅު މަޝްރޫއު އަންނަ އަހަރުގެ ބަޖެޓުން އުނިކޮށްފި

އަންނަ އަހަރަށް ލަފާކޮށް ދައުލަތުން ހުށައަޅާފައިވާ ބަޖެޓުން ފުށިދިއްގަރުފަޅު މަޝްރޫއަށް ހިމަނާފައިވާ ބަޖެޓު އުނިކޮށްފި އެވެ.

އަންނަ އަހަރަށް ލަފާކޮށް ފިނޭންސް މިނިސްޓްރީން މަޖިލީހަށް ހުށަހެޅި ބަޖެޓަށް ކޮމިޓީން ގެނައި އިސްލާހާއެކު 49.8 ބިލިއަން ރުފިޔާގެ ބަޖެޓެއް ބަޖެޓް ދިރާސާކުރާ ކޮމިޓީން ބުރާސްފަތި ދުވަހުގެރޭ ވަނީ ފާސްކޮށްފަ އެވެ.

އަންނަ އަހަރަށް ލަފާކޮށް ދައުލަތުން ހުށައެޅި ބަޖެޓުގައި ފުށިދިއްގަރުފަޅު މަޝްރޫއަށް ވަނީ 400 މިލިއަން ރުފިޔާ ހިމަނާފަ އެވެ.

ފުށިދިއްގަރުފަޅު މަޝްރޫއަކީ މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލަ ޙައްލުކުރުމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ސަރުކާރުން އިއުލާނުކޮށްފައިވާ އެންމެ ބޮޑު މަޝްރޫއެވެ.

މި މަޝްރޫއުގެ ދަށުން 1200 ހެކްޓަރުގެ ބޮޑު ސަރަހައްދެއް ހިއްކައި 11900 އަށްވުރެ ގިނަ ގޯއްޗާއި 26000 ފްލެޓު ދިނުމަށް ސަރުކާރުން ވަނީ ޕްލޭނުގައި ހިމަނާފައެވެ.

އެހެން ނަމަވެސް ބަޖެޓު ދިރާސާ ކުރާ ކޮމެޓީން ބަޖެޓު ފާސްކުރިއިރު މި މަޝްރޫއަށް ކަނޑައަޅާފައިވާ ބަޖެޓު ވަނީ އުނިކޮށްފަ އެވެ.

އެ މަޝްރޫއުގެ ބަދަލުގައި އެ ފައިސާ ބަޖެޓު ދިރާސާކުރާ ކޮމެޓީން ކަނޑައަޅާފައި ވަނީ ހުޅުމާލެ، ގުޅިފަޅު އަދި ގިރާވަރު ފަޅު ހިއްކުމުގެ މަޝްރޫއަށެވެ.

އެގޮތުން ފުށިދިއްގަރުފަޅު ހިއްކުމުގެ މަޝްރޫއަށް ހިމެނި 400 މިލިއަން ރުފިޔާއާއެކު ޖުމްލަ 600 މިލިއަން ރުފިޔާ އެތަންތަން ހިއްކުމަށް ބަޖެޓުގައި ވަނީ ހިމަނާފަ އެވެ.

ގެދޮރު އިމާރާތް ކުރުމަށާއި ބޯހިޔާވަހިކަމަށް ސަރުކާރުން ބަޖެޓުގައި ޖުމްލަ 4.4 ބިލިއަން ރުފިޔާ ކަނޑައަޅާފައިވެ އެވެ.