ދުނިޔޭގެ ބާޒާރުގައި ތެލުގެ އަގު އަނެއްކާވެސް އުފުލިއްޖެ

މެދުއިރުމަތީގައި ހިނގަމުންދާ ހަނގުރާމައިގެ ނުތަނަވަސްކަމާއި، ދުނިޔޭގެ ތެލުގެ ވިޔަފާރީގައި މުހިންމު ދައުރެއް އަދާކުރާ ހޮރްމޫޒް ކަނޑުއޮޅި ބަންދުވެފައި އޮތުމުގެ ސަބަބުން، ދުނިޔޭގެ ބާޒާރުގައި ތެލުގެ އަގު އިތުރަށް އުފުލިއްޖެއެވެ.

އެގޮތުން މިއަދު ބައިނަލްއަގުވާމީ ބާޒާރުގައި ބްރެންޓް ކުރޫޑްގެ އަގު 1.25 އިންސައްތަ އުފުލި، ފީފާއެއްގެ އަގު ވަނީ 105.38 ޑޮލަރަށް އަރާފައެވެ. އަދި އެމެރިކާގެ ވެސްޓް ޓެކްސަސް އިންޓަމީޑިއޭޓް (ޑަބްލިއު.ޓީ.އައި) ގެ އަގު 1.14 އިންސައްތަ މަތިވެ، ފީފާއެއްގެ އަގު ވަނީ 96.96 ޑޮލަރަށް ޖެހިލާފައެވެ.

ތެލުގެ އަގު މިހާ ބޮޑަށް އުފުލިގެން މިދިޔައީ، އެމެރިކާއާއި އީރާނާ ދެމެދު އުފެދިފައިވާ ހަމަނުޖެހުންތަކުގެ ތެރެއިން ދެ ގައުމުން ވެސް އުޅަނދުފަހަރު ހިފަހައްޓަމުން ދިއުމުގެ ސަބަބުން ހޮރްމޫޒް ކަނޑުއޮޅި ބަންދުވެފައި އޮތުމާ ގުޅިގެންނެވެ. ހަނގުރާމައިގެ ކުރިން ކޮންމެ ދުވަހަކު ވެސް ގާތްގަނޑަކަށް 20 މިލިއަން ފީފާގެ ތެލާއި ތެލުގެ އުފެއްދުންތައް މި ކަނޑުއޮޅި މެދުވެރިކޮށް ދަތުރުކުރެއެވެ.

އިސްރާއީލާއި ލުބުނާނާ ދެމެދު ވެފައިވާ ހަނގުރާމަ ހުއްޓާލުމުގެ އެއްބަސްވުން އިތުރު ކުރުމަށް އެމެރިކާގެ ވައިޓް ހައުސްގައި ބޭއްވި ބައްދަލުވުމަކަށްފަހު އެއްބަސްވެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ ބުނެފައެވެ. ނަމަވެސް، މި އެއްބަސްވުމާއެކު ވެސް ތެލުގެ ބާޒާރަށް އޮތް ބިރުވެރިކަން އަދި ކުޑަވެފައެއް ނުވެއެވެ.

ކޮމަންވެލްތު ބޭންކް އޮފް އޮސްޓްރޭލިއާއިން ހާމަކޮށްފައިވާ ގޮތުގައި، ހޮރްމޫޒް ކަނޑުއޮޅި ބަންދުވެފައި އޮންނަ ކޮންމެ ދުވަހަކީ އިގްތިސާދީ ގޮތުން ބޮޑެތި ގެއްލުންތަކެއް ލިބޭނެ ދުވަހެކެވެ. އަދި މިކަމުގެ ސަބަބުން ސިޔާސީ އަދި އިގްތިސާދީ ޕްރެޝަރު ބޮޑުވެ، އެމެރިކާއަށް ދޫދޭން ޖެހިދާނެ ކަމަށް އެ ބޭންކުގެ އެނަލިސްޓުން ލަފާކުރެއެވެ.

އިންޓަނޭޝަނަލް އެނާޖީ އެޖެންސީ (އައި.އީ.އޭ) ގެ ވެރިޔާ ފާތިހު ބިރޯލް ސީ.އެން.ބީ.ސީ އަށް ދެއްވި ބަސްދީގަތުމެއްގައި ވިދާޅުވީ، ދުނިޔެ މިހާރު ކުރިމަތިލަމުންދަނީ ތާރީޚުގައި ވެސް ފެނިފައި ނުވާ ފަދަ ބޮޑު ހަކަތައިގެ ރައްކާތެރިކަމުގެ ނުރައްކަލަކާ ކަމަށެވެ. އޭނާ ވިދާޅުވި ގޮތުގައި މިހާތަނަށް ދުވާލަކު 13 މިލިއަން ފީފާގެ ތެޔޮ ވަނީ ބާޒާރަށް ނުލިބި ގެއްލިފައެވެ.