އީރާނުގެ ވަރުގަދަ އިންޒާރެއް ގަލްފުގެ ގައުމުތަކަށް: އީރާނަށް ހަމަލާދީފިނަމަ ގަލްފުގެ ގައުމުތަކުގެ ތެޔޮ ވަސީލަތްތަކަށް ހަމަލާދޭނަން

އެމެރިކާއިން އިރާނުގެ ބިމަށް އަމާޒުކޮށް އާ ހަމަލާތަކެއް ދީފިނަމަ، މުޅި ގަލްފު ސަރަހައްދުގެ ހަކަތައާ ބެހޭ މުހިންމު ވަސީލަތްތަކަށް ރައްދު ހަމަލާދޭނެ ކަމުގެ ހަރުކަށި އިންޒާރު އިރާނުން ދީފިއެވެ.

މި އިންޒާރު ދީފައިވަނީ އެމެރިކާގެ ރައީސް ޑޮނަލްޑް ޓްރަމްޕް، އިރާނުގެ ހަކަތަ އުފައްދާ ނިޒާމުތަކަށް ހަމަލާދޭނެ ކަމަށް ބުނެ ދިން އިންޒާރާ ގުޅިގެންނެވެ.

އިތުބާރު ހުރި މަސްދަރުތަކުން މައުލޫމާތު ދޭ ގޮތުގައި، އިރާނުގެ ޚާރިޖީ ވަޒީރު އައްބާސް އަރަގްޗީ ވަނީ ސައުދީ އަރަބިއްޔާ، ތުރުކީ، ގަތަރު އަދި ޕާކިސްތާނުގެ އިސްވެރިންނާ ގުޅުއްވައި މި މެސެޖު ފޯރުކޮށްދެއްވާފައެވެ. އިރާނުން ބޭނުންވަނީ އެމެރިކާގެ ގާތް އެކުވެރި ގައުމުތަކަށް ބިރުދައްކައިގެން، އެމެރިކާއިން ދީފާނެ ހަމަލާއެއް ހުއްޓުވުމަށް އެ ގައުމުތަކުން ޓްރަމްޕަށް ބާރު އެޅުމަށެވެ.

އިރާނުގެ އޮފިޝަލަކު ހާމަކުރި ގޮތުގައި، އެމެރިކާއިން އިރާނުގެ އިންފްރާސްޓްރަކްޗަރަށް ގެއްލުންދީފިނަމަ، ގަލްފު ސަރަހައްދުގެ ތެޔޮ ސާފުކުރާ ތަންތަނާއި، ކަރަންޓާއި ފެނުގެ ނިޒާމުތަކާއި، ދަތުރުފަތުރުގެ ވިއުގަތަކަށް ރައްދު ހަމަލާ އަމާޒުވާނެއެވެ.

"އިރާނަށް ގެއްލުމެއް ލިބިއްޖެނަމަ، އޭގެ ބަދަލުގައި މާ ބޮޑު ގެއްލުމެއް ދޭނެކަން ދުޝްމަނުންނަށް އެނގެންޖެހޭނެ،" އޭނާ ވިދާޅުވިއެވެ.

މިކަމުގައި 2019 ވަނަ އަހަރު ސައުދީގެ އަރަމްކޯއަށް ދިން ހަމަލާގެ ހަނދާން އާކޮށްދީ، ގަލްފުގެ ހަކަތައިގެ ވަސީލަތްތަކުގެ ނާޒުކުކަން އިރާނުން ވަނީ ފާހަގަކޮށްފައެވެ.

މި ނުތަނަވަސްކަމާ ގުޅިގެން ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާން ވަނީ ރައީސް ޓްރަމްޕާ ވާހަކަދައްކަވައި، އަސްކަރީ ފިޔަވަޅު އެޅުން މަޑުޖައްސާލުމަށާއި ސުލްހަވެރި ހައްލެއް ހޯދުމަށް ބާރުއަޅުއްވާފައެވެ. ސައުދީގެ އިތުރުން ގަތަރާއި އޮމާނުން ވެސް ދަނީ މަޝްވަރާގެ މޭޒަށް އެނބުރި ދިއުމަށް އެމެރިކާއަށް ބާރު އަޅަމުންނެވެ. އިރާނުން ބުނާ ގޮތުގައި އެމެރިކާގެ ހަމަލާތަކުގެ ސަބަބުން މުޅި ސަރަހައްދު "އަލިފާން ބޯޅައަކަށް" ވެގެންދިއުމުގެ ފުރުސަތު އެބައޮތެވެ.

މި ހާލަތާ ގުޅިގެން އޮގަސްޓް 2 ވަނަ ދުވަހު ރައީސް ޓްރަމްޕް ބުނެފައިވަނީ، އަވަސް އެއްބަސްވުމަކަށް އާދެވޭނެ ނަމަ އިރާނަށް ދޭން އުޅުނު ހަމަލާ ކެންސަލް ކުރަން އެއްބަސްވާ ކަމަށެވެ. ނަމަވެސް އެމެރިކާއިން ބޭނުންވަނީ މި ހަނގުރާމައިން އެމެރިކާ މޮޅުވިކަން ދެއްކޭނެ ފަދަ ނަތީޖާއެއް ހާސިލުކުރުމަށް ކަމަށް ޑިޕްލޮމެޓުން ބުނެއެވެ.