އީރާނުން ޗައިނާގެ ވަރުގަދަ މިސައިލް ސިސްޓަމްތަކެއް ހޯދަނީ

އެމެރިކާއާއި އިސްރާއީލާއެކު ހިނގަމުންދާ ހަނގުރާމައިގައި އީރާނުގެ ދިފާއީ ނިޒާމު ވަރުގަދަކުރުމުގެ ގޮތުން، ޗައިނާގައި އުފައްދާފައިވާ ކޮނޑަށްލައިގެން ފޮނުވާލެވޭ ވައިގެ ދިފާއީ މިސައިލް ސިސްޓަމްތަކެއް ކުރިއަށް އޮތް ހަފުތާތަކުގެ ތެރޭގައި އެ ގައުމަށް ލިބޭނެ ކަމަށް ރޮއިޓާސްއިން ރިޕޯޓުކޮށްފިއެވެ.

މި މުއާމަލާތާ ބެހޭ މައުލޫމާތު ހުރި ތިން މަސްދަރަކުން ރޮއިޓާސްއަށް ކަށަވަރުކޮށްދީފައިވާ ގޮތުގައި، ގާތްގަނޑަކަށް 60 އާއި 70 މިލިއަން ޑޮލަރާ ދެމެދުގެ އަގުހުރި މި އެއްބަސްވުމުގެ ދަށުން 300 އާއި 400 އާ ދެމެދުގެ އަދަދަކަށް "މޭން-ޕޯޓަބަލް އެއާ ޑިފެންސް ސިސްޓަމްސް" އީރާނަށް ލިބޭނެއެވެ. މީގެ ތެރޭގައި ޗައިނާގެ QW-12 އާއި FN-16 މަރުކާގެ މިސައިލްތައް ހިމެނެއެވެ.

މި އެއްބަސްވުމުގައި ސޮއިކޮށްފައިވަނީ ހޮންކޮންގްގައި ގާއިމުވެފައިވާ ކުންފުންޏެއް ކަމަށްވާ "ޒޮންގްކިންގް ބައޯޝަންގް އިންޓަނޭޝަނަލް އިންވެސްޓްމަންޓް" މެދުވެރިކޮށެވެ. މިއީ އީރާނާއި ޗައިނާގެ ސަޕްލަޔަރުންނާ ދެމެދު މެދުވެރިއެއްގެ ދައުރު އަދާކުރާ ކުންފުންޏެއް ކަމަށް ރިޕޯޓުތައް ބުނެއެވެ.

އީރާނުން ދިފާއީ ބާރު ވަރުގަދަކުރަން މި ފެށީ، ފާއިތުވި މަސްތަކުގައި އެމެރިކާއާއި އިސްރާއީލުން އީރާނުގެ މިސައިލް، ޑްރޯން އަދި ވައިގެ ދިފާއީ މަރުކަޒުތަކަށް ދިން ހަމަލާތަކުގައި އީރާނުގެ ދިފާއީ ނިޒާމުގެ ބަލިކަށިކަން ފާހަގަވުމާ ގުޅިގެންނެވެ. މިފަދަ ހަތިޔާރުތަކަކީ ކޮނޑަށްލައިގެން ކުދި ޓީމުތަކަށް އޮޕަރޭޓްކުރެވޭ، އަދި އަވަސްއަވަހަށް ތަން ބަދަލުކުރެވޭ ހަތިޔާރުތަކަކަށް ވުމުން، މިއީ ހަނގުރާމަމަތީ މަތިންދާބޯޓުތަކާއި ޑްރޯންތަކުން ދިފާއުވުމަށް ލިބޭނެ ބޮޑު ކުރިއެރުމެކެވެ.

ނަމަވެސް، ޗައިނާގެ ފޮރިން މިނިސްޓްރީން މި ޚަބަރުތައް ދޮގުކުރަމުން ބުނެފައިވަނީ، މިއީ އެއްވެސް އަސާސެއް ނެތް ވާހަކަތަކެއް ކަމަށާއި، ޗައިނާއިން އަބަދުވެސް މަސައްކަތްކުރަނީ ސަރަހައްދީ ހަމަޖެހުމާއި ސުލްހަ ގާއިމުކުރުމަށް ކަމަށެވެ. މީގެ އިތުރުން، މި މިސައިލްތައް ޗައިނާގެ އުރުމްޗީއިން ޕާކިސްތާން މަގުން އީރާނަށް ގެންދާނެ ކަމަށް ދެކެވޭ ވާހަކަތައް ޕާކިސްތާން އަސްކަރިއްޔާއިން ވެސް ވަނީ ދޮގުކޮށްފައެވެ.

އީރާނުން ދަނީ އެމެރިކާއާއި އިސްރާއީލުގެ ހަމަލާތަކުން ސަލާމަތްވުމަށްޓަކައި އެ ގައުމުގެ އަސްކަރީ މަރުކަޒުތަކާއި ހަކަތަ އުފައްދާ ތަންތަން ފަދަ މުހިންމު ބިނާތަކުގެ ދިފާއު ވަރުގަދަކުރަމުންނެވެ. އެމެރިކާގެ ރައީސް ޑޮނަލްޑް ޓްރަމްޕް ދާދި ފަހުން ވަނީ މަޝްވަރާތައް ނާކާމިޔާބުވެއްޖެނަމަ އަލުން ހަމަލާތައް ދޭން ފަށާނެ ކަމުގެ އިންޒާރު ދީފައެވެ.

މީގެ ކުރިން ވެސް އީރާނުން ޗައިނާގެ އެންޓި-ޝިޕް ކްރޫޒް މިސައިލްތަކެއް ހޯދުމަށް މަސައްކަތް ކުރަމުންދާ ކަމުގެ ރިޕޯޓުތަކެއް ވަނީ ފެންމަތިވެފައެވެ.