އީރާނާ އެކު އެއްވެސް މަޝްވަރާއެއް ކުރުމަށް ރާވާފައި ނުވާނެ: ޓްރަމްޕް

އެމެރިކާއިން އީރާނާ އެކު އެއްވެސް މަޝްވަރާއެއް ނުކުރާ ކަމަށާއި، ކުރިއަށް އޮތް ތަނުގައި ވެސް އެފަދަ މަޝްވަރާތަކެއް ބޭއްވުމަށް ރާވާފައި ނުވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ. ނަމަވެސް، ހޮރްމުޒް ކަނޑުއޮޅި މިހާރު އޮތީ އާންމު ދަތުރުފަތުރަށް ހުޅުވާލެވިފައި ކަމަށް ޓްރަމްޕް ވަނީ ބުނެފައެވެ.

މިއީ އީރާން މައްސަލައިގެ ތެރެއަށް އޮމާނުން ވަދެއްޖެނަމަ ބޮން އަޅާނެ ކަމުގެ އިންޒާރު ޓްރަމްޕް ދީފައިވަނިކޮށް ވެސް، ހޮރްމުޒް ކަނޑުއޮޅި ބެލެހެއްޓުމާ ގުޅޭގޮތުން އީރާނާއި އޮމާނުން މަޝްވަރާތައް ކުރިއަށް ގެންދާތީ އެކަމާ ގުޅިގެން ނިންމި ނިންމުމެއް ކަމަށް ރިޕޯޓްތައް ބުނެއެވެ.

އަންގާރަ ދުވަހު ސޯޝަލް މީޑިއާގައި ޓްރަމްޕް ހިއްސާކުރި ޕޯސްޓެއްގައި ބުނެފައިވަނީ އީރާނުގެ ބަނދަރުތައް ހިސޯރުކޮށްފައި އޮތް އޮތުން އެގޮތުގައި ދެމިއޮތް ނަމަވެސް، އެހެން ހުރިހާ އުޅަނދުފަހަރަކަށް ހޮރްމުޒް ކަނޑުއޮޅިން ދަތުރުކުރުމުގެ ހުއްދަ އޮންނާނެ ކަމަށެވެ. އަދި ކަނޑުއަޑީގައި ހުރި މައިންތައް ނަގައި ނުވަތަ ގޮއްވާލައި ސާފުކޮށްފައިވާ ކަމަށް ވެސް އޭނާ ބުންޏެވެ. މީގެ އިތުރުން، މި ކަނޑުއޮޅިއަކީ އެމެރިކާގެ ސަރަހައްދެއްގެ ގޮތުގައި ދައްކުވައިދޭ ޗާޓެއް ވެސް ޓްރަމްޕް ވަނީ ސޯޝަލް މީޑިއާގައި ޕޯސްޓްކޮށްފައެވެ.

ހޯމަ ދުވަހު ޓްރަމްޕް ވަނީ އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އާއެކު ނުރަސްމީ މަޝްވަރާތަކެއް ކުރިއަށްދާ ކަމަށް ބުނެފައެވެ. ނަމަވެސް އީރާނުން ވަނީ ވަގުތުން އެކަން ދޮގުކޮށްފައެވެ.

ޓްރަމްޕްގެ މި ވާހަކަތަކަށް ރައްދު ދެއްވަމުން އީރާނުގެ ޑެޕިއުޓީ ފޮރިން މިނިސްޓަރު ކާޒިމް ޣަރީބްއާބާދީ ވިދާޅުވީ، ހޮރްމުޒް ކަނޑުއޮޅިއާ މެދު ޓްރަމްޕް ދެކޭ ކުށްހީތައް ވެސް ވަރަށް އަވަހަށް ރަނގަޅުކުރެވިގެންދާނެ ކަމަށެވެ.

މިދިޔަ މާޗް މަހުން ފެށިގެން ހިނގަމުންދާ ހަމަނުޖެހުންތައް ނިމުމަކަށް ގެނައުމަށް ޖޫން މަހު ވެވުނު ފަހުމުނާމާގެ ޝަރުތުތަކަށް ވޮޝިންގޓަނުން އަމަލުނުކުރާހާ ހިނދަކު ހޮރްމުޒް ކަނޑުއޮޅި ބަންދުކޮށްފައި އޮންނާނެ ކަމަށް އީރާނުގެ މަޖިލިސް ރައީސް އަދި އިސް މަޝްވަރާވެރިޔާ މުޙައްމަދު ބާޤިރު ޤާލީބާފް ވަނީ ވިދާޅުވެފައެވެ.

މި ޝަރުތުތަކުގެ ތެރޭގައި އީރާނުގެ ބަނދަރުތަކުގެ ހިސޯރު އުވާލުމާއި، ތެލުގެ ދަތިކުރުމުގެ ފިޔަވަޅުތައް އުވާލުމާއި، ފްރީޒްކޮށްފައިވާ ފައިސާތައް ދޫކޮށްލުމުގެ އިތުރުން އަސްކަރީ ހަރަކާތްތައް ހުއްޓާލުން ހިމެނެއެވެ.

ދެފަރާތުގެ ދެމެދުގައި ސުލްހަ ގާއިމުކުރުމަށް މެދުވެރިއެއްގެ ދައުރު އަދާކުރާ ޤަތަރުން ބުނެފައިވަނީ، އެމެރިކާއާއި އީރާނާ ދެމެދު އަލުން ވާހަކަތައް ފެށުމަށް މަސައްކަތް ކުރަމުންދަނީ އީރާނާއި އޮމާނާ ދެމެދު ވެވޭ އެއްބަސްވުމަށް ފަހު ކަމަށެވެ. އެމެރިކާގެ އޮފިޝަލަކު އަލްޖަޒީރާއަށް މައުލޫމާތު ދެމުން ބުނީ، އީރާނާއެކު ރަނގަޅު މަޝްވަރާތަކެއް ކުރެވުނު ނަމަވެސް، އީރާނުން އެއްބަސްވުމަކަށް އަންނަން ތައްޔާރުވަންދެން މަޝްވަރާތައް މަޑުޖައްސާލުމަށް ޓްރަމްޕް މިހާރު ނިންމާފައިވާ ކަމަށެވެ.