ޓްރަމްޕްގެ އިންޒާރެއް؛ އީރާނާ ގުޅުން ބާއްވާ ޤައުމުތަކަށާ ދެކޮޅަށް ހަރުކަށި އިޤުތިޞާދީ ފިޔަވަޅު އަޅާނަން

އީރާނާ އެކު ވިޔަފާރީގެ ގޮތުން ނުވަތަ އެ ނޫން ވެސް ގޮތަކުން ގުޅުން ބާއްވާ ކޮންމެ ޤައުމަކާ ދެކޮޅަށް ބޮޑެތި އިޤުތިޞާދީ ފިޔަވަޅު އެޅާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދީފިއެވެ.

ޓްރޫތް ސޯޝަލް މެދުވެރިކޮށް ޓްރަމްޕް ބުނީ ޤައުމަކާ ދެކޮޅަށް މިހާތަނަށް އެޅި އެންމެ ވަރުގަދަ އިޤުތިޞާދީ ފިޔަވަޅު އެޅުމުގެ މަސައްކަތް ފަށާފައިވާ ކަމަށެވެ. ނަމަވެސް ވަކި ޤައުމެއްގެ ނަން ބުނެފައެއް ނުވެއެވެ. އީރާނާ އެކު ހެދި ހަމަލާ ބަދަލުކުރުން ހުއްޓައިލުމުގެ މުއްދަތު ހޯމަ ދުވަހު ހަމަވީ އިރު ޑިޕްލޮމެޓިކް ނުވަތަ އަސްކަރީ ހައްލެއްގެ ނިޝާނެއް ފެންނާކަށް ނެތެވެ.

"އެއްވެސް ޤައުމެއްގެ މާލީ މުއައްސަސާތައް، ވިޔަފާރިތައް، ވައިގެ ބަނދަރުތައް ނުވަތަ ސަރުކާރު އިދާރާތައް މެދުވެރިކޮށް އީރާނަށް އެއްވެސް ބާވަތެއްގެ އެހީއެއް ފޯރުކޮށްދީފިނަމަ އެ ޤައުމަކާ ދެކޮޅަށް ވެސް ހަރުކަށި އިޤުތިޞާދީ ފިޔަވަޅު އެޅޭނެ" ޓްރަމްޕް ބުންޏެވެ.

ހަމައެއާ އެކު ތެލުގެ ވަގު ވިޔަފާރިއާއި ފައިސާ ބަދަލުކުރުމާއި ބޯޓުފަހަރު ރެޖިސްޓްރީކުރުމާއި، ކުންފުނިތައް މެދުވެރިކޮށް ހިންގާ ހުރިހާ ކަމެއް ވަގުތުން ހުއްޓައިލަން ޖެހޭނެ ކަމަށް ޓްރަމްޕް ބުންޏެވެ. މި އިންޒާރު އައީ އެޕްރީލް މަހު ފެށި "އޮޕެރޭޝަން އިކޮނޮމިކް ފިއުރީ" ގެ ދަށުން އީރާނާ ވިޔަފާރީގެ ގުޅުން ބާއްވާ ބޭރުގެ ބޭންކުތަކާއި ކުންފުނިތަކާ ދެކޮޅަށް ފިޔަވަޅު އެޅުން ފުޅާކޮށް ކަނޑުމަތީ ބަންދެއް ވެސް ހިމެނޭ ގޮތަށެވެ.

ޓްރަމްޕް އެ ޕޯސްޓު ކުރުމުގެ އެއް ދުވަސް ކުރިން އެމެރިކާގެ ބައިވެރިއެއް ކަމަށްވާ ޔޫއޭއީން ވަނީ އީރާނާ ދެމެދު އޮތް ހުރިހާ މާލީ އަދި އިޤުތިޞާދީ ގުޅުމެއް ކަނޑައިލާނެ ކަމަށް އިއުލާނުކޮށްފައެވެ. ޔޫއޭއީގެ ދިފާއީ ވުޒާރާއިން ބުނީ ކަނޑުމަތީ ދަތުރުފަތުރަށް ނިޝާންކޮށް އީރާނުން ފޮނުވައިލި ދެ ބެލެސްޓިކް މިސައިލެއް ދެނެގެންފައިވާ ކަމަށާއި އެ ދެ މިސައިލް ވެސް ވެއްޓުނީ ކަނޑަށް ކަމަށެވެ. ޔޫއޭއީގެ ނިންމުމާ ގުޅިގެން ގަލްފް ސަރަހައްދުގެ ޤައުމުތަކުން އެމެރިކާ ސިފައިންނަށް އެއްބާރުލުން ދީފިނަމަ އެއީ ބައިވެރިވުމެއް ކަމަށް ދެކޭނެ ކަމަށް އީރާނުގެ ސިފައިން ވަނީ އިންޒާރު ދީފައެވެ.

ޓްރަމްޕްގެ ޕޯސްޓްގައި ޗައިނާގެ ނަން ބުނެފައި ނެތް ނަމަވެސް އީރާނުން އެންމެ ގިނައިން ތެޔޮ ގަންނަ ޤައުމަކީ ޗައިނާއެވެ. ހަނގުރާމަ ފެށި ފަހުން ޗައިނާގެ ޝެންޑޮންގް ޕްރޮވިންސުގައި ހުންނަ އެތައް ކުދި ތެޔޮ ސާފުކުރާ ކާރުޚާނާއަކާ ދެކޮޅަށް ވޮޝިންގްޓަނުން ފިޔަވަޅު އެޅީ މި ގުޅުމާ ހެދިއެވެ.

މައި ހޮރުމޫޒް ކަނޑުއޮޅިއަކީ ދުނިޔޭގެ ސާފުނުކުރާ ތެލުގެ 20 އިންސައްތައާއި، ގޭސް ދައުރުކުރާ މަގެވެ. ހަނގުރާމައިގެ ސަބަބުން ތެލާއި ހަކަތައިގެ އަގު ވަނީ ބޮޑުތަނުން މައްޗަށް ގޮސްފައެވެ.