ޣައްޒާގެ ގަތުލު އާއްމަށް 6 މަސް ފަހުން، ހަނގުރާމަ ހުއްޓާލުމަށް ގޮވާލާ ގަރާރެއް އދ އިން ފާސްކޮށްފި!

މިދިޔަ އަހަރު އޮކްޓޫބަރު މަހުގެ 7 ވަނަ ދުވަހު ފެށިގެން ޣައްޒާގައި ހިނގަމުންދާ ގަތުލު އާއްމަށް 6 މަސްވި ފަހުން ހަނގުރާމަ ހުއްޓާލުމަށް ގޮވާލާ ގަރާރެއް އދ އިން ފާސްކޮށްފިއެވެ.

މީގެ ކުރިން މި ހަނގުރާމަ ހުއްޓާލުމަށް ގޮވާލާ އެއްވެސް ގަރާރެއް ފާސްނުކޮށް އޮތުމަށްފަހު، އދ ގެ ސަލާމަތީ މަޖިލީހުން ރޭގައި ފާސްކުރި މި ގަރާރުގައި ހަނގުރާމަ ހުއްޓާލުމުގެ އިތުރުން، ރަހީނު ކޮށްފައިވާ މީހުން އެއްވެސް ޝަރުތަކާއި ނުލައި ދޫކޮށްލުމަށް ވެސް ވަނީ ގޮވާލާފައެވެ.

މި މަޖިލީހުގެ ދާއިމީ ނޫން 10 މެމްބަރުން ހުށައެޅި މި ގަރާރުގައި މިހާރު ހިނގަމުންދާ ރަމަޟާން މަހުގައި ހަމަލާތައް ވަގުތުން ހުއްޓާލުމަށާއި ޣައްޒާއަށް ދެމުންދާ އެހީ މިހާރަށްވުރެ ބޮޑަށް ފުޅާކުރުމަށް ވެސް ވަނީ ގޮވާލާފައެވެ.

މި ގަރާރު ފާސްކޮށްފައި މިވަނީ އދ ގެ ސަލާމަތީ މަޖިލީހުގެ 15 މެމްބަރުންގެ ތެރެއިން 14 މެމްބަރުންގެ ވޯޓުންނެވެ. މި ގަރާރަށް ވޯޓް ދިނުމަށް ބައިވެރިވެފައި ނުވަނީ މީގެ ކުރިން ވެސް މި މައްސަލަ އާއި ގުޅިގެން ހުށައެޅި ހުރިހާ ގަރާރެއްގައި ވެސް ވީޓޯގެ ބާރު ބޭނުން ކުރަމުން އައި އެމެރިކާއިންނެވެ.

އެމެރިކާއިން އދ އަށް ކަނޑައަޅާފައި ހުންނަވާ ސަފީރު ލިންޑާ ތޯމަސް ގްރީންފީލްޑް ވިދާޅުވީ ވޯޓްގައި ބައިވެރިނުވުމަށް ނިންމީ މި ގަރާރުގައިވާ ހުރިހާ ކަމަކަށް އެމެރިކާ އިން އެއްބަސް ނުވެވޭތީ ކަމަށެވެ. އެމެރިކާއިން ވީޓޯގެ ބާރު ބޭނުންނުކުރާތީ، އިސްރާއީލުން ވަނީ އެމެރިކާ އަށް ފާޑުކިޔުންތައް އަމާޒުކޮށްފައެވެ.

ޔަހޫދީން ޣައްޒާއަށް ދެމުންގެންދާ ހަމަލާތަކަށް ގާތްގަނޑަކަށް ހަ މަސް ދުވަސްފަހުން މިފަދަ ގަރާރެއް ފާސްކުރެވުނުއިރު މިއީ ހަނގުރާމަ ހުއްޓައިލުމާ ދިމާއަށް އެޅުނު ވަރަށް މުހިންމު ފިޔަވަޅެއް ކަމަށާއި، މި ގަރާރު ތަންފީޒު ކުރަން ޖެހޭ ކަމަށް ކަމާ ބެހޭ ފަރާތްތަކުން އަންނަނީ ބުނަމުންނެވެ.

މިދިޔަ އަހަރުގެ އޮކްޓޯބަރު 7 ވަނަ ދުވަހުން ފެށިގެން ޔަހޫދީން ޣައްޒާއަށް ކެނޑިނޭޅި ދެމުންދާ ހަމަލާތަކުގެ ސަބަބުން ޣައްޒާގެ 2.3 މިލިއަން މީހުންގެ އާބާދީގެ ތެރެއިން 90 ޕަސެންޓު މީހުން އެކި ސަރަހައްދުތަކަށް ހިޖުރަކުރަން މަޖުބޫރުވެފައިވާއިރު، 32،000 އަށްވުރެ ގިނަ މީހުން ހަނގުރާމައިގައި ވަނީ ޝަހީދުވެފައެވެ.