އަރަބިކަރައިގެ ބިން ފެހި ކޮށްލައިފި؛ ޢިލްމުވެރިން ވިދާޅުވަނީ ވަރުގަދަ އިންޒާރެއްގެ ވާހަކަ

ހަނަފަސް ކަމާއި ފަރުބަދަތަށް އެކުލެވިގެން އުފެދިފައިވާ އަރަބިކަރައިގެ މައްކާ އާއި މަދީނާ އަދި ޖިއްދާގެ ބިމުން ފެހިކަން ފެނިގެން އެތައްހާސް ބައެއްގެ ސަމާލުކަން އެކަމަށް ދެވިގެން ގޮސްފައިވާއިރު، އެކަމާއި ގުޅިގެން ދީނީ ޢިލްމުވެރިން ވަރަގަދަ އިންޒާރެއްގެ ވާހަކަ ހަނދާން ކޮށްދެއްވައިފިއެވެ.

އަހަރެއްގެ މައްޗަށް އާއްމުކޮށް މައްކާ މަދީނާއަށް ވާރޭ ވެހެނީ 2 ނުވަތަ ތިން ފަހަރު އެވެ. އޭގެ ސަބަބުން ފާއިތުވި އަހަރުވެސް ސައުދީ އަރަބިއްޔާގައި ހަނަފަސްކަން އިތުރުވެ، އެ ގައުމުގެ ބޮޑެތި ހުރިހާ މިސްކިތެއްގައި އިސްތިސްޤާ ނަމާދު ކުރުމަށް ވެސް މިދިޔަ ނޮވެމްބަރު މަހު ވަނީ އަންގާފައެވެ.

އެއަށްފަހު މި އަހަރު ފެށިގެން ގޮސްފައިވަނީ ސައުދީ އަރަބިއްޔާއަށް މި އިން ޒަމާނަކުވެސް ވާރޭ ނުވެހޭ ވަރަށް ވާރޭ ވެހުނު ދުވަސްތަކަކާއި އެކުގައެވެ. އެގޮތުން ފާއިތުވި ހަފްތާ ތަކުގެ ތެރޭގައި ދޭތެރޭ ދޭތެރެއިން އެ ގައުމަށް ބޯކޮށް ވާރޭ ވެހިފައިވާއިރު، އޭގެ ސަބަބުން އެކި ފަހަރު މަތިން ސުކޫލު ތަކުގެ ކިޔެވުންވެސް ވަނީ ކެންސަލް ކޮށްފައެވެ.

މިއަހަރުގެ ފާއިތުވި ދުވަސްތަކުގައި ވެހުނު ވާރޭއަަށްފަހު، ގިނަ ތަންތަނުގައި ފެން ކޯރު ހެދި ބިންގަނޑަށް ތެތް ކަމާއި އާރޯކަން ލިބިގެން ގޮސްފައިވާއިރު، އޭގެ ސަބަބުން ސަޢުދީ ޢަރަބިއްޔާގެ ބިންތައް ވަނީ ފެހިކޮށްލާފައެވެ. އެގޮތުން މައްކާ އިން މަދީނާއަށް ދާ މަގާއި، މައްކާ، މަދީނާ އަދި ޖިއްދާގެ ބިންވެސް ވަނީ ވަރަށް ބޮޑަށް ފެހި ވެފައެވެ. މި މަންޒަރުތައް ދައްކުވައިދޭ ފޮޓޯތައް މީސްމީޑިއާގައި ދައުރުވަމުންދާއިރު، އެ ފޮޓޯތަކުން ފެންނަ ގޮތުން އަރަބި ކަރައިގެ ފަރުބަދަތައްވެސް ވަނީ ވިނަ ފަޅައި ފެހިވެފައެވެ.  މިއީ ފަހުގެ ތާރީހެއްގައި ވެފައި ނުވާކަމެއް ކަމަށް ސައުދީ އަރަބިއްޔާއިން ވެސް ވަނީ ބުނެފައެވެ.

އަރަބިކަރައިގެ ބިން ފެހި ވުމުން އެކަމާއި އުފައުކޮށް، އެ ރީތި ކަމަށް ގިނަ ބަޔަކު ތައުރީފު ކުރަމުންދާއިރު، ދީނީ ޢިލްމުވެރިން ވަނީ ޢަރަބިކަރަ ފެހިވުމާއި ގުޅިގެން ވަރުގަދަ އިންޒާރެއްގެ ވާހަކަ ހަނދާން ކޮށްދެއްވާފައެވެ.

އެގޮތުން، ޢަރަބީންގެބިމުގައި ފެނުގެ ކޯރުތައް އުފެދި، ބިންތަކަށް ފެހިކަން އައިސް ދިރިގެންދިއުމަކީ ޤިޔާމަތް ވުމުގެ ކުދި ޢަލާމާތްތަކުގެ ތެރޭގައި ހިމެނޭ ކަމެއް ކަމުގައި އަހަރެމެންގެ ރަސޫލާ ޞޢވގެ ސައްހަ ޙަދީޘުން ވާރިދުވެފައިވާ ކަމަށް ޢިލްމުވެރިން ވަނީ ހަނދުމަ ކޮށްދީފައެވެ.

އަބޫހުރައިރާ ރޢ ގެ އަރިހުން ރިވާވެގެން އައިސްފައިވެއެވެ.

"ރަސޫލާ ޞޢވ ހަދީޘް ކުރެއްވިއެވެ. ....އަދި ޢަރަބީންގެ ބިމަށް (ވިނަޔާއި ގަސްގަހާގެހީގެ) ފެހިކަމާއި ކޯރުތައް އެނބުރި ނާންނަނީސް ޤިޔާމަތުގެ ވަޤުތު ޤާއިމު ނުވާހުއްޓެވެ." (ޞަޙީޙު މުސްލިމް)