ކުރިން ބުނި ތާރީހަށް އަމީނީމަގުގެ މަސައްކަތް ނުނިންމޭނެ: އަސްލަމް
އަމީނީ މަގު ޒަމާނީ ފެންވަރަށް ހެދުމުގެ މަސައްކަތް ކުރިން ތާވަލު ކުރި ދުވަހަށް ނުނިމޭނެ ކަމަށާއި ނިމޭނެ ކަމަށް މިހާރު ލަފާ ކުރެވެނީ ސެޕްޓެމްބަރުގެ ނިޔަލަށް ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
އަމީނީ މަގު ތަރައްގީ ކުރުމުގެ މަސައްކަތް މާލެ ސިޓީ ކައުންސިލް އަތުން ޕްލޭނިންގެ މިނިސްޓްރީއަށް ނަގައި، އަލުން އެ މަސައްކަތް އާރުޑީސީއާ ހަވާލުކޮށްފައިވަނީ އޭގެ ކުރިން ހަވާލުކުރީ އަގަށްވުރެ ދެ ގުނަ ބޮޑު އަދަދަކަށް 84 މިލިއަން ރުފިޔާ އަށެވެ. އެ މަސައްކަތް ހަވާލު ކުރީ 210 ދުވަހުގެ ތެރޭގައި ނިންމާ ގޮތަށެވެ. އެގޮތުން، އެ މަސައްކަތް ނިމޭނެ ކަމަށް އޮތް ތާރީހަކީ މިހިނގާ ފެބްރުއަރީ މަހުގެ ނިޔަލަށެވެ.
އެހެންނަމަވެސް، ރައްޔިތުންގެ މަޖިލީހުގެ މިިއަދުގެ ޖަލްސާގައި ހެންވޭރު ހުޅަނގު ދާއިރާގެ މެންބަރު ހަސަން ލަތީފް އެ މަޝްރޫއު ނިމޭނެ ތާރީހަކާ ގުޅޭ ގޮތުން ސުވާލު ކުރުމުން އަސްލަމް ވިދާޅުވީ އެ ތާރީހަށް ނުނިމޭނެ ކަމަށެވެ.
އެގޮތުން އަސްލަމް ވިދާޅުވީ، އެންމެ ފުރަތަމަ އަމީނީ މަގު ނިންމުމަށް ކަނޑައެޅިފައިވަނީ ފެބްރުއަރީ މަހުގެ ތެރެއަށް ކަމަށެވެ. އެހެންނަމަވެސް އެމްޑަބްލިއުއެސްސީއަށް ބޭނުންވާ ތަކެތި ހޯދުމުގައި ދިމާވި ދަތިތަކެއްގެ ސަބަބުން އެ ތާރީހު ފަސްކުރަން ޖެހުނުކަމަށް ވިދާޅުވިއެވެ.
"ދަތިތަކަށް ކޮންސިޑާކޮށްފައި އަޅުގަނޑުމެން މިހާރު ވާނެ ރިވައިޒްޑް ކޮމްޕްލީޝަން ޑޭޓެއް ކަނޑައަޅާފައި، އެއީ 27 ސެޕްޓެމްބަރު، އެހެންވީމާ އަމީނީ މަގު ނިމިގެން ދާނެ ސެޕްޓެމްބަރު މަހާ ހަމައަށް،" އަސްލަމް ވިދާޅުވި އެވެ.
އަމީނީމަގު ހެދުމަށް އެމްޑަބްލިޔުއެސްސީން ފޯރުކޮށްދޭން ޖެހުނު ހޮޅި ލިބުމުގައި ހުރި ދަތިކަމުގެ ސަބަބުން މަގު ހެދުމުގެ މަސައްކަތް ދުވަސްކޮޅަކަށް މެދުކަނޑާލަންވެސް ޖެހުނެވެ. އެކަމާއި ގުޅިގެން ގިނަ ބައެއްގެ ފާޑުކިޔުންތައް އަމާޒުވެފައިވަނިކޮށް އާރްޑީސީން ވަނީ އެ މަސައްކަތް ކުރިއަށް ދަނީ ޕްލޭން ކުރި ގޮތާއި އެއްގޮތަށް ކަމަށް ބުނެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
