އިބްރާހިމް ރަޝީދު އާއި އަފީފު ބޭނުންވަނީ އެންޑީޕީން ވަކިވާން ކަމަށް ބުނެފި
މިހާރު އެމްޑީޕީގެ ސަރުކާރުން ކަންކަން ކުރަމުން އަންނަ ގޮތުން ފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) އާއި ވިލިފުށީ ދާއިރާގެ މެންބަރު ހަސަން އަފީފް ވެސް ބޭނުންވަނީ އެމްޑީޕީން ވަކިވާން ކަމަށް އެ ދެބޭފުޅުން ވިދާޅުވެއްޖެއެވެ.
ރައްޔިތުންގެ މަޖިލީހުގައި މިއަދު ޖަލްސާގައި، ސަރުކާރުގެ ފަރާތުން ކެނދިކުޅުދޫ ދާއިރާގެ އެމްޑީޕީ މެމްބަރު އަހުމަދު އީސާ ހުށަހެޅުއްވި ފުލުހުންގެ ގާނޫނު އިސްލާހު ކުރުމުގެ ބިލަށް ބަހުސް ކުރުން ވަނީ ކުރިއަށް ގެންގޮސްފަ އެވެ.
ބިލުގައި ސަރުކާރުން ހުށަހަޅާފައިވާ އިސްލާހުތަކުގެ ތެރޭގައި އެގާނޫނުގެ 17 ވަނަ މާއްދާގައި ލާޒިމުކަމެއްގެ ގޮތުގައި ހިމަނާފައިވާ ފުލުހުންގެ ވަޒީފާއަށް ވަންނަ މީހުންގެ "ބެކްގްރައުންޑް ޗެކްކުރުން" އެއީ އިޚުތިޔާރީ ކަމަކަށް ބަދަލުވާ ގޮތަށް، އެ މާއްދާގެ އިބާރާތް ބަދަލުކުރުމަށް ވަނީ ހުށަހަޅައިފަ އެވެ. އަދި ބިލުގައި ބަދަލުކުރަން ހުށަހަޅާފައިވާ ދެވަނަ ކަމަކީ ފުލުހުންގެ ގާނޫނުގެ 100 ވަނަ މާއްދާގެ (ކ) އަށް އަމަލުކުރަން ފެށުން އަންނަ އަހަރުގެ މާޗްމަހާ ހަމައަށް ފަސްކުރުމެވެ.
އެ ބިލާ މެދު ކަންބޮޑުވުން ފާޅުކުރައްވައި ވާހަކަ ދައްކަވަމުން ބޮންޑޭ ވިދާޅުވީ އެ ބިލުގައި އެމްޑީޕީގެ ސްޓޭންޑެއް ނެތް ކަމަށެވެ.
”އެމްޑީޕީގެ ސްޓޭންޑަޑެއް މީގަ ނެތް. ދެން އެމްޑީޕީގެ ލޯގޯގައި ވެސް އިންސާފު ގާއިމުކުރަނީ, އިންސާފު ސިފަކޮށްދެނީ، އެކަމަކު އެ އިންސާފާއި ހަމަހަމަކަމާއި ނަޒާހަތްތެރިކަން ނެތް ތަނެއް.“
މެންބަރު އިބްރާހިމް ރަޝީދު (ބޮންޑޭ)
މި ސަބަބު ތަކާއި ހުރެ ޕާޓީގެ ސްޓޭންޑަޑް އަނބުރާ ރުޖޫއަވީމާ ޕާޓީއަށް އަލުން ވަދެވަޑައިގަންނަވާ ގޮތަށް ރައީސް މުޙައްމަދު ނަޝީދާ ސީރިއަސްކޮށް މަޝްވަރާ ކުރައްވަން ބޭނުންވެވަޑައިގަންނަވާ ކަމުގައި ބޮންޑޭ ވިދާޅުވި އެވެ.
"އެ ސްޓޭންޑަޑަށް އަނބުރާ ރުޖޫއަވީމަ ޕާޓީއަށް ވަންނަ ގޮތަށް އަޅުގަނޑު ބޭނުން ހަމަ ރައީސްއަާ ސީރިއަސްކޮށް މަޝްވަރާކުރަން. ދެން އަޅުގަނޑު ހުންނާނީ ދުރުގައި. ފިކުރެއްގެ ދިރުން އެއީ ކޮންމެހެނެއް ސޮއިކުރަން ޖެހޭ އެއްޗެއް ނޫން،"
މެމްބަރު އިބްރާހިމް ރަޝީދު (ބޮންޑޭ)
އޭނާގެ ވާހަކަތަކާ ގުޅިގެން ރިޔާސަތުގައި އިންނެވި ނަޝީދު ވިދާޅުވީ ވަރި ކައިވެންޏާ ގުޅޭ ގޮތުން އެކި މެންބަރުން މަޝްވަރާ ކުރައްވާ ކަމަށެވެ.
ފުލުހުންގެ އެ ބިލާއި މެދު ނުރުހުން ފާޅުކުރައްވައި ވާހަކަ ދައްކަވަމުން މެންބަރު އަފީފް ވަނީ އެ ބިލު މިހާރު ވައްދައިގެން އުޅޭ މަގްސަދާ މެދު ސުވާލު އުފައްދަވާފައެވެ. އަދި އެ ބިލަށް ވޯޓު ނުދެއްވާނެ ކަމަށާ، ވިޕާ ހިލާފަށް ވޯޓު ނުދީގެން ފިޔަވަޅު އެޅިޔަސް ފަރުވާލެއް ނެތް ކަމަށެވެ.
"އަޅުގަނޑަށް ވަރިހަމަ ކޮންމެ ފިޔަވަޅެއް އެޅިޔަސް. އަޅުގަނޑަށް ރަނގަޅީ ތި ޕާލިމެންޓްރީ ގްރޫޕުން އަޅުގަނޑު ވަކިކޮށްދެއްވިއްޔާ،"
މެންބަރު ހަސަން އަފީފް
މިހާރު ފުލުހުންގެ ގާނޫނޫގައި އޮންނަ ގޮތުން ފުލުހަށް އަލަށް ވައްދާ މީހުންނަކީ ސަލާމަތީ ހިދުމަތްތަކުގައި ވަޒީފާ އަދާކުރަން އެކަށީގެންވާ ބައެއްތޯ ބަލަން އެ މީހުންގެ ބެކުގްރައުންޑް ޗެކް ކުރުމުގައި ބައެއް ކަންކަން ކުރަން ޖެހެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
