ރައީސް ނަޝީދާއި ފިކުރެއްގެ ދިރުމުގެ ބައިވެރިން އެމްޑީޕީ ދޫކޮށްލަން ތައްޔާރުވެއްޖެ: ޝަރީފު

އެމްޑީޕީގެ ރައީސް މުޙައްމަދު ނަޝީދާއި ޕާޓީގެ ތެރެއިން ނަޝީދު އުފައްދަވާފައިވާ ފިކުރެއްގެ ދިރުމުގެ ބައިވެރިން އެމްޑީޕީ ދޫކޮށްލަން ތައްޔާރުވެއްޖެ ކަމަށް މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފު (މަވޯޓާ) ވިދާޅުވެއްޖެ އެވެ.

ޝަރީފު މިފަދައިން ވިދާޅުވެފައިވަނީ ޖުމްހޫރީ ޕާޓީގެ ލީޑަރު ޤާސިމް އިބްރާހިމާއި އެ ޕާޓީގެ އިސް ބައެއް ފަރާތްތަކާއެކު ނަޝީދާއި އޭނާގެ ޓީމުގެ ބޭފުޅުން ބޭއްވި ރޯދަވީއްލުމަކަށް ފަހު ނަގާފައިވާ ފޮޓޯއެއް ޓްވީޓާ ހިއްސާކުރައްވާ ކުރެއްވި ޓްވީޓެއްގަ އެވެ.

ޝަރީފު ވިދާޅުވީ އެމްޑީޕީގެ ރިޔާސީ ކެންޑިޑޭޓު ޤަބޫލުފުޅު ނުކުރެއްވި ނަަމަވެސް އަމިއްލަފުޅަށް ވެރިކަމަށް ނިކުތުމުގެ ހިތްވަރު ނަޝީދުގެ ކިބައިގައި ނެތް ކަމަށެވެ.

މިހާރު ފިކުރެއްގެ ދިރުން ފެނިގެންދަނީ ކުރީގެ ރައީސް މައުމޫނު އަބްދުލްގައްޔޫމުގެ އެމްއާރުއެމް ފަދަ ކުޑަ ޕާޓީއެއްގެ ގޮތުގައި ކަމަށް ޝަރީފު ސިފަކުރެއްވި އެވެ.

ފިކުރެއްގެ ދިރުން ވަކި ސިޔާސީ ޕާޓީއަކަށް ބަދަލުވުމުގެ ކޮޅުމަތި ފެންނަން ފަށައިފިކަމަށާއި، އެ ގޮފީގައި ތިއްބެވި ފަރާތްތައް އެމްޑީޕީން ނިކުތުމަށް ތައްޔާރުވެއްޖެ ކަމަށް ޝަރީފު ވިދާޅުވި އެވެ.

"ފިކުރެއްގެ ދިރުން މެކުހަށް ޖަހައިފި. އަމިއްލައަށް ވެރިކަމަށް ކުރިމަތިލުމުގެ ހިތްވަރެއް ނެތް. އެމް.އާރު.އެމް ފަދަ ކުޑަ ޕާޓީއަކަށް ވާތަން މި ފެންނަނީ. އޭގެ ކޮޅުމަތި ފެންނަން ފަށައިފި. އެމްޑީޕީ ދޫކޮށްފަ ދާން ރެޑީވެއްޖެ"

މަރަދޫ ދާއިރާގެ މެމްބަރު ޝަރީފު

ޝަރީފު މިފަދައިން ވިދާޅުވެފައިވާއިރު، ކުރިއަށް އޮތް ރިޔާސީ އިންތިޚާބުގައި ނަޝިދާއި އޭނާގެ ވަފާތެރިން ވަނީ އެމްޑީޕީގެ ކެންޑިޑޭޓަށް ތާއީދުކުރުުމުގެ ބަދަލުގައި ޤާސިމަށް ތާއީދުކުރަން ނިންމާފަ އެވެ.

ނަޝީދު ފެކްޝަނާއި ޖޭޕީއާއެކު ސިލްސިލާ ބައްދަލުވުންތަކެއް ކުރިއަށް ގެންގޮސްފައިވާއިރު، ފިކުރެއްގެ ދިރުމުން ބުނެފައިވަނީ ޖޭޕީއާއި ގުޅިގެން މަޖިލީހުގައި ޖޮއިންޓް ޕާލަމެންޓްރީ ގުރޫޕެއްވެސް ހެދުމުގެ މަސައްކަތް ކުރާކަމަށެވެ.

ނަޝީދުއާއި އޭނާގެ ވަފާތެރިން ގެންދަވަނީ ރައީސް ޞާލިހަށް ދެވަނަ ދައުރެއް ދޭން ނުޖެހޭކަމަށް ވިދާޅުވެ ވަކާލާތުކުރައްވަމުން ނެވެ.