ވެސްޓްހަމް އަތުން މެންޗެސްޓާ ޔުނައިޓެޑް ބަލިވެ، ގަދަ ހަތަރެއްގެ ފޯރިގަދަ ވެއްޖެ!

އިގިރޭސި ޕްރެމިއާ ލީގުގައި މިރޭ ރަށުން ބޭރުގައި ވެސްޓްހަމް އަތުން 1-0 ގެ ނަތީޖާއަކުން މެންޗެސްޓާ ޔުނައިޓެޑް ބަލިވެއްޖެ އެވެ.

މިރޭގެ މެޗުން މޮޅުވެ ތިންވަނައަށް ކުރިއަށް ޖެހިލުމުގެ ފުރުސަތު މެންޗެސްޓާ ޔުނައިޓެޑަށް އޮތުމާއެކު އެޓީމުން މެޗު ފެށީ ވަރުގަދަކޮށެވެ. މިގޮތުން ފުރަތަަމަ ހާފުގެ 8 ވަނަ މިނެޓުގައި އެޓީމުގެ ޕޯޗުގަލް މިޑްފިލްޑަރު ބުރޫނޯ ފެނާންޑޭޒަށް ލިބުނު ހުސް ފުރުސަތެއްގައި އޭނާ ފޮނުވާލި ހަމަލާ ގޯލާއި އަމާޒުނުވެ ބޭރަށް ދިޔައިރު، އޭގެ 10 މިނެޓް ފަހުން ރަޝްފޯޑް ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.

ވެސްޓްހަމް އިން މިމެޗުގައި ކާމިޔާބުކުރި ހަމައެކަނި ލަނޑު ފުރަތަަމަ ހާފުގެ 27 ވަނަ މިނެޓުގައި ކާމިޔާބުކޮށްދިނީ އެޓީމުގެ އަލްޖީރިއާގެ މިޑްފީލްޑަރު މުހައްމަދު ސައީދު ބެންރަހްމާ އެވެ.

ވެސްޓްހަމްގެ ލަނޑަށްފަހު މެޗުގެ ނަތީޖާ ހަމަހަމަ ކުރުމަށް ފުރަތަަމަ ހާފުގެ 33 ވަނަ މިނެޓުގައި މެންޗެސްޓާ ޔުނައިޓެޑް ބްރެޒިލް ފޯވާޑް އެންތަނީއަށް ލިބުނު ފުރުސަތުގައި އޭނާ ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ. އަދި ހާފު ނިމުމުގެ ކުރިން ލީޑު ފުޅާކުރުމަށް ވެސްޓްހަމްއަށް ލިބުނު ފުރުސަތުގައި ބެންރަހްމާ ފޮނުވާލި ހަމަލާ މެންޗެސްޓާ ޔުނައިޓެޑްގެ ގޯލްކީޕަރު ވަނީ ދިފާއުކޮށްފަ އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ވެސްޓްހަމް ކުރީގައި އޮވެގެންނެވެ.

ދެވަަނަ ހާފުގައި ވެސްޓްހަމް އިން އެޓީމުގެ ކުޅުން ރަނގަޅުކޮށް ރަގަޅު ފުރުސަތުތަކެއް ތަނަވަސްކުރި އިރު، 52 ވަނަ މިނެޓުގައި އެޓީމުގެ ޖެމެއިކާ ފޯވާޑް އެންޓޯނިއޯ ލަނޑެއް ކާމިޔާބުކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ ލަނޑު ޖެހުމުގެ ކުރިން ވެސްޓްހަމްގެ ކުޅުންތެރިއަކު ފައުލުކޮށްފައިވާކަމަށެވެ. އަދި ދެވަނަ ހާފުގެ 74 ވަނަ މިނެޓުގައި ވެސްޓްހަމްގެ މިޑްފީލްޑަރު ޓޮމަސް ސޫސެކް ކާމިޔާބުކުރި ލަނޑުވެސް ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

މިރޭގެ މެޗުން ބަލިވުމުން ތާވަލުގެ ތިންވަނައަށް އެރުމަށް ލިބުނު ފުރުސަތު މެންޗެސްޓާ ޔުނައިޓެޑަށް ގެއްލުނު އިރު ފަސް ވަނައިގައި އޮތް ލިވަޕޫލް އޮތީ ފަހަތުގައި ވިއްދާފައެވެ. 34 މެޗު ކުޅެގެން މެންޗެސްޓާ ޔުނައިޓެޑަށް 63 ޕޮއިންޓް ލިބިފައިވާއިރު، 35 މެޗު ކުޅެގެން ލިވަޕޫލަށް ވަނީ 62 ޕޮއިންޓް ލިބިފައެވެ. އަދި މިރޭގެ މެޗުން ލިބުނު ތިން ޕޮއިންޓާއެކު 35 މެޗު ކުޅެގެން ވެސްޓްހަމްއަށް 37 ޕޮއިންޓް ލިބިފައިވާއިރު، ރެލިގޭޝަނުން ސަލާމަތްވުމަށް ބާކީ އޮތް ތިން މެޗުން އެޓީމަށް މިހާރު ބޭނުންވަނީ ތިން ޕޮއިންޓެވެ.