ޕޭ ހަރމަނައިޒިންގ ގެ މަސައްކަތް އަންނަ އަހަރުގެ ތެރޭގައި ނިމި ހުރިހާ މުވައްޒަފުންގެ މުސާރަ ބޮޑުވާނެ: މިއުވާން

ޕޭ ހަރމަނައިޒިންގ ގެ މަސައްކަތް އަންނަ އަހަރުގެ ތެރޭގައި ނިމި މުޅި ދައުލަތުގެ ހުރިިހާ މުވައްޒަފުންގެ މުސާރައަށް ހެޔޮ ބަދަލެއް ގެނެވޭނެ ކަމަށް ރައީސް އޮފީހުގެ ތަރުޖަމާން މިއުވާން މުހައްމަދު ވިދާޅުވެއްޖެއެވެ.

މިއުވާން މިހެން ވިދާޅުވީ މިއަދު ރައީސް އޮފީހުގައި ބޭއްވުނު ނޫސް ވެރިންގެ ބައްދަލުވުމުުގައި އެހެނިހެން ދާއިރާތަކުގެ މުސާރައާއި ގުޅޭ ގޮތުން ނޫސްވެރިއެއް ކުރި ސުވާލަށް ޖަވާބު ދެއްވަމުންނެވެ.

އެގޮތުން މިިއުވާން ވިދާޅުވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު މިހާރު އިއުލާން ކުރައްވާފައިވަނީ ޕޭ ހާމަނައިޒިންގ ގެ ތެރެއިން ހުރިހާ ދާއިރާއެއްގެވެސް އަދި ދައުލަތުގެ ހުރިހާ މުވައްޒަފުންގެވެސް މުސާރަ ބޮޑުވެގެން ދާނެ ކަމަށެވެ.

މިއާއިއެކު ތައުލީމީ ދާއިރާއާއި، ޔުުނިވާސިޓީ ދާއިރާ، އަދި ސިއްހީ ދާއިރާގެ މުސާރައަށް މިިހާރު ބޮޑެތި ހެޔޮ ބަދަލުތަކެއް ގެނެވިފައިވާކަން ފާހަގަކުރައްވާ މިއުވާން ވިދާޅުވީ މި ދާއިރާތަކުގެ އިތުރުން އެހެނިހެން ދާއިރާތަކުގެ މުސާރަ ބޮޑު ކުރުމުގެ މަސައްކަތް ޕޭ ކޮމިޝަނުން ކުރިއަށް ގެންދާ ކަމަށެވެ.

އެގޮތުން ޕޭ ކޮމިޝަނުން ޕޭ ސްޓްރަކްޗަރ ތަކަށް ބަދަލު ގެންނަނީ އެކަމާއި ގުޅޭގޮތުން ހަދަން ޖެހޭ ދިިރާސާތައް ހަދައި، ހިޔާލު ހޯދަން ޖެހޭ ފަރާތްތަކުގެ ހިޔާލު ހޯދުމަށް ފަހުގައި ކަމަށް މިއުވާން ވިދާޅުވިއެވެ. އެހެންކަމުން ހުރިހާ ދާއިރާއެއްގެ މުސާރަ އެއްފަހަރާ ބޮޑު ކުރުން ފަސޭހަ ކަމަކަށް ނުވާނެ ކަމަށް މިއުވާން ފާހަގަކުރެއްވިއެވެ.

"އެހެންވީމަ މިހާރު މި މަސައްކަތް ކުރިއަށް އެބަ ދޭ، ސަރުކާރުގެ އެހެނިހެން ދާއިރާތަކުގެ މުސާރައަށް ހެޔޮ ބަދަލު ގެނައުމަށްޓަކައި، ޕޭ ހަރމަނައިޒިންގ ގެ މަސައްކަތް އިރާދަކުރެއްވިއްޔާ އަންނަ އަހަރުގެ ތެރޭގައި މި މަސައްކަތް ނިމި، މުޅި ދައުލަތުގެ ހުރިިހާ މުވައްޒަފުންގެ މުސާރައަށް ހެޔޮ ބަދަލު އިރާާދަކުރެއްވިއްޔާ ގެނެވޭނެ." މިއުވާން ވިދާޅުވިއެވެ.

ރައީސް ޞާލިޙް ވަނީ މިި ހަފްތާގެ ހޯމަ ދުވަހު އައްޑޫ ސިޓީއަށް ކުރެއްވި ރަސްމީ ދަތުރުފުޅުުގައި އައްޑޫސިޓީގެ ރައްޔިތުންނާއި އެކު ބޭއްވެވި ރޭގަނޑުގެ ފަރިއްކޮޅުގައި ވާހަކަފުޅު ދައްކަވަމުން، ކުރިޔަށް އޮތްތަނުގައި ޕޭ ހާމަނައިޒޭޝަންގެ ދަށުން ހުރިހާ ދާއިރާއެއްގެ މުސާރަތަކަށް ގެންނަންޖެހޭ ހެޔޮބަދަލުތައް ގެންނަވާނެކަަމަށް ވިދާޅުވެފައެވެ.

އަދި ކޮވިޑްގެ ބަލިމަޑުކަން ކުރިމަތި ނުވިނަމަ މިހާތަނަށް އައިއިރު އެމަސައްކަތް އޮންނާނީ ނިމިފައިކަން އެމަނިކުފާނުގެ ވާހަކަފުޅުގައި ފާހަގަކުރައްވާފައެވެ.