"ރާއްޖޭގައި އެހެން ޤައުމެއްގެ ބާރު ހިނގާ ހިސާބަށް ދިއުމަކީ ވޯޓުލާން ދާއިރު ވިސްނަންޖެހޭ ކަންކަން"

ދިވެހިރާއްޖޭގައި އެހެން ގައުމެއްގެ ބާރު ހިނގަމުންދާ ކަމަށާ، އެކަމަކީ، މާދަމާ ރިޔާސީ އިންތިހާބުގެ ވޯޓުލާން ދާއިރު ވިސްނަންޖެހޭ ކަންކަން ކަމަށް ޕީޕީއެމް/ޕީއެންސީގެ ކެންޑިޑޭޓް ޑރ މުހައްމަދު މުޢިއްޒު ވިދާޅުވެއްޖެއެވެ.

ޑރ. މުޢިއްޒު މިފަދައިން ވިދާޅުވީ ދިވެހިންގެ ރާއްޖެ (ރާސްޓަސް) ޖަގަހަ ހުޅުވުމަށް ރޭ ބެއްވި ރަސްމިއްޔާތުގައި ވާހަކަ ދައްކަވަމުންނެވެ.

އެގޮތުން، މުޢިއްޒު ވިދާޅުވީ, އެމަނިކުފާނު ވެރިކަމަށް ވަޑައިގެންފި ނަމަ، ދިވެހިރާއްޖޭގެ ތަރައްގީ ޔަގީން ކޮށްދެއްވާނެ ކަމަށެވެ. އެހެން ނަމަވެސް، ދިވެހިންގެ އަމިއްލަ ވަންތަކަން އޮތުމާއި، ނެތުމަކީ އެ ހުރިހާ ކަމަކަށްވުރެ މާ މުހިންމު އިސްކަމެއް ކަމެއް ދީގެން ހުރިހާ ދިވެހިންވެސް ވިސްނަޖެހޭ ކަމެއް ކަމަށް އެމަނިކުފާނު ވިދާޅުވި އެވެ.

އެގޮތުން، ދިވެހިރާއްޖޭގެ ހަނިމާދޫ އާއި އައްޑޫއިން 15 ހެކްޓަރުގެ ބިން, 99 އަހަރަށް ދިނުމަށް އެދި އިންޑިޔާ އިން ފޮނުވި ސިޓީއަށް އިޝާރާތް ކުރައްވައި ވާހަކަ ދައްކަވަމުން މުޢިއްޒު ވިދާޅުވީ އެއީ، މިހާރު ހަގީގަތުގައި ހައިރާންވާންޖެހޭ ކަމެއް ނޫން ކަމަށެވެ.

"އެހެންނަމަވެސް، ދިވެހި ރައްޔިތުން މިހާރު ވަރަށް ސީރިއަސްކޮށް ވަރަށް ވަރަށް ބޮޑަށް ވިސްނަންޖެހޭ ކަމަކަށް އެކަން އެބަވޭ. ‏މި ރާއްޖޭގަ އެހެން ޤައުމެއްގެ ބާރު ހިނގާ ހިސާބަށް ދިއުމަކީ އަޅުގަނޑުމެން ވޯޓުލާން ދާއިރު ވިސްނަންޖެހޭ ކަންކަން. އެއީ އަޅުގަނޑު ދޭން ބޭނުންވާ މެސެޖަކީ. އަޅުގަނޑުމެންގެ ޚާރިޖީ ސިޔާސަތު މިހާރު ބައްޓަން ކޮށްފައި އޮތް ގޮތަށް ކުރިއަށް ދާންތޯ ވިސްނަންވީ، ނުވަތަ ކުރިއަށް އޮތް ދައުރަކީ ދިވެހިރާއްޖޭގެ އަމިއްލަ ވަންތަކަން، އަޅުގަނޑުމެންގެ ކަންކަމުގައި ބަސް ބުނާނީ އަޅުގަނޑުމެން ކަން، އަޅުގަނޑުމެންގެ ބިމަކީ އެހެން ގައުމަކުން އައިސް ވަދެ، ބޭނުންހާ ކަމެއް ކުރެވޭނެ ބިމެއް ނޫން ކަން. އަޅުގަނޑުމެންގެ މިނިވަންކަމަށް ރެސްޕެކްޓް ކުރަންޖެހޭ ކަން. އެ ސިޔާސަތު ތޯ ކުރިއަށް ގެންދާނީ.؟"

ޕީޕީއެމް/ޕީއެންސީގެ ޑރ. މުހައްމަދު މުޢިއްޒު

މުޢިއްޒު ވިދާޅުވީ، މިހާރުގެ ސަރުކާރުގެ ސިޔާސަތާއި އެކު ކުރިއަށް ދާނަމަ، ކުރިއަށް އޮތް ތަނުގައި ފެނިގެންދާނީ ހަނިމާދޫއިން 15 ހެކްޓަރުގެ ބިން، އަދި އައްޑޫ ގަމުން 15 ހެކްޓަރުގެ ބިން، 99 އަހަރަށް ގައުމަކަށް ދީފައި އޮންނަތަން ކަމަށެވެ.

އަދި މީގެ އިތުރުން ހައިޑްރޯގްރަފީ އެއްބަސްވުމެއް ހަދައި، ދިވެހިންގެ ކަނޑުވެސް އިންޑިއާއަށް ދީފައިވާ ކަން މުޢިއްޒު ފާހަގަކުރެއްވި އެވެ. މި އެއްބަސްވުމަކީ، މީގެ ކުރީގެ ހުރިހާ ސަރުކާރަކުންވެސް ދެކޮޅު ހަދައި ސޮއި ނުކުރި އެއްބަސްވުމެއް ކަން ފާހަގަކޮށްލަންޖެހެއެވެ.

މުޢިއްޒު ވިދާޅުވީ ތަރައްގީގެ އެހެނިހެން މަޝްރޫއު ތަކަށްވުރެ ވެސް ގައުމަކަށް އަޅުވެތި ވުމުގެ ކަންކަމާއިމެދު ވިސްނުން މުހިންމު ކަމަށާ، އެހެން ކަމުން ކުރިއަށް އޮތް ރިޔާސީ އިންތިހާބުގައި އެކަން ވިސްނުމަށްފަހު ވޯޓު ދެއްވުމަށް އެމަނިކުފާނު ވަނީ އެދިވަޑައިގެންފަ އެވެ.