ޑރ މުއިއްޒުގެ މެނިފެސްޓޯގައި އަންހެނުންނަށް ޚާއްސަ ގިނަ ވައުދުތަކެއް!

ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒުގެ މެނިފެސްޓޯގައި ހުރި އަންހެނުންނަށް ޚާއްސަ ވައުދުތައް އިއުލާނުކޮށްފި އެވެ.

މި ވައުދުތައް އިއުލާނުކޮށްފައިވަނީ "ދިވެހީންގެ ރާއްޖެ އަންހެނުންނަށް" މި ނަމުގައި ރޭ އާޓިފިޝަލް ބީޗުގައި ބޭއްވި ޚާއްސަ ހަރަކާތެއްގަ އެވެ. އެ ހަރަކާތުގައި ރައީސް އަބްދުالله ޔާމީން އަބްދުލްގައްޔޫމުގެ އަނބިކަނބަލުން މެޑަމް ފާތުމަތު އިބްރާހިމް ބައިވެރިވެވަޑައިގެންނެވި އެވެ.

އެކަމަނާގެ އަރިހުގައި ޑރ މުއިއްޒުގެ ރަނިންމޭޓު ހުސެއިން މުޙައްމަދު ވެސް ބައިވެރިވެވަޑައިގެންނެވިއެވެ.

ޑރ މުއިއްޒުގެ މެނިފެސްޓޯގައި ވަނީ އިޤްތިޞާދީ، ސިޔާސީ އަދި އިޖްތިމާއީ ކަންކަމުގައި އަންހެނުންގެ ދައުރު ފުޅާކުރުމާއި، އަންހެނުންނަށް ކުރާ އަނިޔާ ހުއްޓުވުމަށާއި، އަންހެނަކަށް ވީތީ ކުރާ ތަފާތުކުރުންތައް ނައްތާލުމަށާއި، އަންހެނުންގެ ހައްގުތައް ހޯދައިދިނުމަށް ކުރާނެ ގިނަ ކަންތައްތަކެއް ހިމަނާފަ އެވެ. ރޭގެ ޖަލްސާގައި އެކަންކަމަށް ވަނީ އަލިއަޅުވާލައްވާފަ އެވެ.

އެގޮތުން، އަންހެނުންގެ ހައްގުތައް ރައްކާތެރިކޮށް، އަންހެނުން ބާރުވެރިކުރުމަށް ކުރަން ޖެހިފައި އޮތް މަސައްކަތްތައް ކިތަންމެ ގިނަ ނަމަވެސް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒުގެ މެނިފެސްޓޯއިން ހުށައަޅަނީ އެ މައްސަލަތަށް ޓޯޓަލް ސޮލިއުޝަނެއްކަމަށް ވަނީ ބުނެފަ އެވެ.

އެ މެނިފެސްޓީގައި ހިމެނޭ ކަންތައްތަކުގެ ތެރޭގައި؛

- އެއްވަރުގެ މަސައްކަތްތަކަށް އެއް މިންވަރެއްގެ ފުރުސަތުތަކަކާއި އެއް ހަމައެއްގެ އުޖޫރައެއް، ދެ ޖިންސުގެ ދެމެދުގައި ތަފާތުކުރުމެއް ނެތި، ލިބުމަކީ ގާނޫނީ ޙައްޤަކަށް ވުމުގެ އިތުރުން ހުރިހާ ދާއިރާއެއްގައި ވެސް ތަންފީޒް ކުރެވެމުންދާ އުސޫލެއްކަން ކަށަވަރު ކުރުމަށް ހަރުދަނާ ފިޔަވަޅުތަކެއް އަޅުން

- ސިވިލް ސަރވިސްގައި، ވެރިންގެ ފެންވަރުގެ ވަޒީފާ އަދާ ކުރާ އަންހެން މުވައްޒަފުންގެ އަދަދު ބޮޑުތަނުން އިތުރުކުރުން

- އަންހެނުންނަށް ޚާއްޞަ ލީޑަރޝިޕް ޕްރޮގްރާމްތަކެއް މުޅި ރާއްޖޭގައި ހިންގާ، އަންހެނުން ބާރުވެރިކުރުވުމުގެ މުހިންމުކަމަށް މުޅި މުޖްތަމައު ހޭލުންތެރިކުރުވާ، ހިންގުމުގެ ދާއިރާގައި އަންހެނުންގެ ޙިއްޞާ އަދި ބައިވެރިވުން އަބަދުވެސް ފުރިހަމައަށް އޮންނާނެ ހިސާބަކަށް ޤައުމުގެ ކަންކަން ތަރުތީބުކުރުން ހިމެނެއެވެ.

އޭގެ އިތުރުން؛

- ދަރިމައިވުމުގައި ދަތިތަކާ ކުރިމަތިލާންޖެހޭ ޢާއިލާތަކަށް ޚާއްސަ ކުރެވިގެން އެންމެ ރަނގަޅު ފެންވަރުގެ ފަރުވާ ދެވޭނެ ސިއްޙީ ޚިދުމަތްތައް ރާއްޖޭގައި ތަޢާރަފްކުރުން

- އުރަމަތީ ކެންސަރާއި، ރަހިމުގެ ދޮރަށް ޖެހޭ ކެންސަރު ދުރާލާ ދެނެގަތުމަށް މެމޮގްރަފީގެ ޚިދުމަތާ ޕެޕް ސްމިއަރގެ ޚިދުމަތް ހުރިހާ އަތޮޅެއްގައި ޤާއިމުކުރުމަށް ބޭނުންވާ ބަދަލުތައް ހޮސްޕިޓަލުތަކަށް ގެނައުމާއި، އެކަމަށް ބޭނުންވާ މެޝިނަރީ ހޯދުމާއި، ޚިދުމަތްތެރިން ތަމްރީނު ކުރުން

- އެންޑޯމެޓްރިއޯސިސް އަދި ޕީސީއޯއެސް ފަދަ އަންހެނުންނަށް ދިމާވާ ޞިއްޙީ މައްސަލަތައް އަވަހަށް ދެނެގަނެ، ޚާއްސަ ފަރުވާ ހޯދުމުގައި އާސަންދަ ހަމަޖެއްސުން

ޑރ މުއިއްޒުގެ މެނިފެސްޓޯގައި ވަނީ އިޖުތިމާޢީ ޢަދާލަތާއި ރައްކާތެރިކަމާބެހޭ ހުރިހާ މަޝްވަރާއެއްގައި ވެސް އަންހެނުންގެ ޚިޔާލާއި މަޝްވަރާ ފާޅުކަންބޮޑުގޮތެއްގައި ހިމަނައި، އެފަދަ މަޝްވަރާތަކުން ލިބިދޭ ބިނާކުރަނިވި ޚިޔާލުތައް ސިޔާސަތުތަކެއްގޮތުގައި ޤައުމީ ފެންވަރުގައި ތަންފީޒުކުރުމުގެ އޮނިގަނޑެއް އެކުލަވާލުމަށް ނިންމާފަ އެވެ.

މަސައްކަތްތެރިކަމާއި، ފަންނުވެރިކަމާއި ވިޔަފާރީގެ ދާއިރާގައި އަންހެނުންގެ ބައިވެރިވުން އިތުރުކުރުމަކީ ޚާއްސަ އިސްކަމެއް ދެއްވައިގެން ކުރާނެ ކަނެއްގެ ގޮތުގައި މެނިފެސްޓޯގައި ފާހަގަކޮށްފައި ވާއިރު، އެކަން ކުރުމަށް މުހިންމު ސިޔާސަތުތަކެއް ވެސް ގެންގުޅުވާނެކަމަށް މެނިފެސްޓޯގައި ބަޔާންކޮށްފައި ވެއެވެ.

އެ މަޤްސަދު ހާސިލްކުރުމަށް ކުރާނެ އެއްކަމެއްގެ ގޮތުގައި ފާހަގަކޮށްފައި ވަނީ:

- ހެއަރ އެންޑް ބިއުޓީ، ރިސޯޓު މިއުޒީޝަނުންނާއި ބޭންޑްތައް، ކަސްޓަމަރ ސާރވިސް، ހައުސްކީޕިންގް އެންޑް ފްރަންޓް އޮފީސް، ރިސޯޓުތަކުގެ ހިއުމަން ރިސޯސް ޑިޕާޓްމަންޓުގެ ވަޒީފާތައް، ޓެކްސީ ކުރުން ފަދަ ދިވެހި ޒުވާނުންގެ ޝައުޤުވެރިކަމާއި ހުނަރު ހުރި ގިނަ ދާއިރާތަކެއް 'ދިވެހީންނަށް ޚާއްޞަ' މަސައްކަތްތަކެއްގެ ގޮތުގައި އެކަށައަޅާ، އެދާއިރާތަކުގައި ދިވެހި ޒުވާނުންނާ ވާދަކޮށް ބިދޭސީން ހަރަކާތްތެރިވުން ހުއްޓުވުން

މި ނޫނަސް އަންހެނުންގެ ހައްޤުތައް ކަށަވަރުކުރުމާއި، އަންހެނުންނަށް ރައްކާތެރި ވަޒީފާގެ މާހައުލެއް ހޯދައިދިނުމާއި، "ވޯކިން މަދާސް" އަށް ޚާއްސަކޮށްގެން ސިޔާސަތުތަކެއް އެކުލަވާލުން ފަދަ މުހިންމު ކަންތައްތަކެއް ވަނީ ހިމަނާފައި ވެއެވެ.