ވިލިމާލޭ ހޮސްޕިޓަލް ޒަމާނީ ފެންވަރަށް ތަރައްޤީ ކުރާނަން: ޑރ މުއިއްޒު
މާދަމާ ބާއްވާ ރިޔާސީ އިންތިހާބު ކާމިޔާބުކޮށް ވެރިކަން ލިބިވަޑައިގެންފި ނަމަ ހާއްސަ އިސްކަމެއް ދެއްވައިގެން ވިލިމާލެ ހޮސްޕިޓަލް ޒަމާނީ ފެންވަރަށް ތަރައްގީ ކުރައްވާނެ ކަމުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވައުދުވެޑައިގެންފިއެވެ.
މުއިއްޒު މިފަދައިން ވިދާޅުވީ، ރިޔާސީ ކެމްޕެއިންގައި އިއްޔެ ވިލިމާލޭގައި ކުރިއަށް ގެންދިޔަ "ދޮރުން ދޮރަށް" ހިނގުމުގެ ހަރަކާތަށްފަހު، ބޭއްވި ޖަލްސާގައި ވާހަކަދައްކަވަމުންނެވެ.
މުޢިއްޒުގެ ވާހަކަފުޅުގައި ވިދާޅުވީ، އެމަނިކުފާނުގެ ވެރިކަމެއްގައި މާލޭގެ އެހެން އަވަށްތަކެކޭ އެއްގޮތަށް ވިލިމާލެ ތަރައްގީ ކުރުމަށް ހާއްސަ އިސްކަމެއް ދެއްވާނެ ކަމަށެވެ. އަދި ވިލިމާލެއަކީ ހުރިހާ ހިދުމަތެއް ލިބޭ ރަނގަޅު ފެންވަރުގެ ތަނަކަށް ހައްދަވާނެ ކަމަށް އޭނާ ވިދާޅުވި އެވެ. މީގެ އިތުރުން މުއިއްޒު ވިދާޅުވީ ނަންބޯޑުން ހޮސްޕިޓަލެއްގެ ގޮތުގައި ވިލިމާލޭ ހޮސްޕިޓަލް އޮތްއޮތުން ނިމުމަކަށް ގެނެސް ވިލިމާލެ ހޮސްޕިޓަލް ތަރައްގީކޮށްދެއްވާނެކަމެެވެ.
ވިލިމާލެއާ ކައިރީގައި އައިޖީއެމްއެޗް ހުރީތީ ސިއްހީ ނިޒާމުގައި އެ ނެގްލެކްޓް ކުރެވިފައި އޮތްއޮތުން ނިމުމަކަށް އިރާދަކުރެއްވިއްޔާ ގެނެސްދޭނަން، ކިތަންމެ ކައިރީގައި ތިއްބަސް އަދި ބްރިޖު އެޅުނަސް، މިތަނުގައި ތިބެގެން އެ ޒަރޫރީ ގޮތުން ލިބެން ޖެހޭ ސިއްހީ ހިދުމަތް ލިބުމަކަށް އޮތް ހުރަހަކަށް ވެސް އުޒުރަކަށް ދެއްކޭނެ ކަމަކަށް ވާން ޖެހޭ ކަމަށް ގަބޫލެއް ނުކުރަން
ޑރ މުހައްމަދު މުއިއްޒު
މީގެ އިތުރުން މުއިއްޒު ވިދާޅުވީ ވިލިމާލޭގެ ފެނާއި ނަރުދަމާގެ ނެޓްވޯކް ވެސް އޮތީ ޒަމާނީ ފެންވަރަށް ބަދަލު ކުރަން ޖެހިފައި ކަމަށާއި އެ އަވަށުގެ އާބާދީ އިތުރުވަމުން އަންނައިރު، އެއީ ވެސް ކުރަން ރޭވިފައިވާ ކަމެއް ކަމަށް ވިދާޅުވިއެވެ.
ވިލިމާލޭ ސިއްހީ މަރުކަޒު ހޮސްޕިޓަލަކަށް ބަދަލުކޮށްފައި ވަނީ ކުރީގެ ރައީސް ޔާމީން އަބްދުލްގައްޔޫމްގެ ވެރިކަމުގައެވެ. އެ ހޮސްޕިޓަލަކީ ޓާޝަރީ ފެންވަރުގެ ހޮސްޕިޓަލެއް ކަމަށް އޭރު ސަރުކާރުން ވަނީ ބުނެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
