ނަފްސާނީ ބަލީގެ މީހުން ބާކީކޮށްލުމުގެ ވިސްނުން ދޫކޮށްލަންޖެހޭ: މިނިސްޓަރ
ނަފްސާނީ ބަލީގެ މީހުންނާމެދު މުޖުތަމަޢުއިން ދެކޭގޮތް ބަދަލުކޮށް، އެފަދަ މީހުން ބާކީކޮށްލުމުގެ ވިސްނުން ދޫކޮށްލަންޖެހޭކަމަށް މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހީމް ޙަސަން ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ދުނިޔޭގެ ނަފްސާނީ ޞިއްޙަތުގެ ދުވަސް ފާހަގަކުރުމުގެގޮތުން ހުޅުމާލޭ ސެންޓްރަލް ޕާކުގައި ކުރިއަށްގެންދިޔަ ހަރަކާތް ޝަރަފުވެރިކޮށްދެއްވާ ވާހަކަފުޅުދައްކަވަމުންނެވެ.
މިނިސްޓަރ ވިދާޅުވީ، ރާއްޖޭގައިވެސް ނަފްސާނީ ބަލިމަޑުކަމަށް ފަރުވާ ބޭނުންވާ ގިނަ ބަޔަކު އެބަތިބި ކަމަށާއި، ނަފްސާނީ ދުޅަހެޔޮކަން ފޯރުކޮށްދިނުމަށްޓަކައި ދެވޭ ޚިދުމަތްތައް ފުޅާކުރަންޖެހޭކަމަށެވެ. އަދި ރައްޔިތުންނާއި ގާތުން އަގުހެޔޮކޮށް މި ޚިދުމަތްތައް ލިބެންޖެހޭނެކަން މިއަދު ޤަބޫލުކުރަންޖެހޭކަމަށްވެސް މިނިސްޓަރ ވިދާޅުވިްއެވެ.
އަދި ހަމައެހެންމެ މިއީ ހަމައެކަނި ވަކިބައެއްގެ ޒިންމާއެއް ނޫން ކަމަށާއި، މުޅި މުޖުތަމައުވެސް އެކަމެއްގަިއ ބައިވެރިވާން ޖެހޭ ކަމަށް މިނިސްޓަރ ވިދާޅުވިއެވެ.
"އަޅުގަނޑުމެންގެ މުޖުތަމަޢުގައި ތިބި ނަފްސާނީ ބަލިމީހުންނަކީ އެކަހެރި މީހުންކަމުގައި ނުހަދާ، އެމީހުންނަކީވެސް މުޖުތަމަޢުގެ ހުރިހާ ކަމެއްގައި ބައިވެރިވުމުގެ ފުރުޞަތު އޮތްބައެއްކަމުގައި ހެދުމަކީ އަޅުގަނޑުމެން ކޮންމެ މީހެއްގެ ވާޖިބެއް" ހަޔަރ އެޑިއުކޭޝަން މިނިސްޓަރ ވިދާޅުވިއެވެ.
"ވޯލްޑް މެންޓަލް ހެލްތު ޑޭ" ފާހަގަކުރުމަށް ހެލްތު ޕްރޮޓެކްޝަން އޭޖެންސީ (އެޗް.ޕީ.އޭ)އާއި ދުނިޔޭގެ ޞިއްޙަތު ޖަމިއްޔާ އަދި ސެންޓަރ ފޯރ މެންޓަލް ހެލްތުން އިސްނަގައިގެން ކުރިއަށްގެންދިޔަ މި ހަރަކާތުގައި އެޑިއުކޭޝަން މިނިސްޓްރީއާއި، ޖެންޑަރ މިނިސްޓްރީގެ އިތުރުން ސަރުކާރާއި އަމިއްލަ ބައެއް މުއައްސަސާތަކާއި، ހިލޭ ސާބަހަށް މަސައްކަތް ކުރާ ޖަމިއްޔާތަކުން ބައިވެރިވެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
