އިންޑިއާ ސިފައިން ރާއްޖޭގައި ބައިތިއްބާނެ ކަމަށް ރައީސް ނަޝީދު ދެއްކެވި ވާހަކަތަކަށް ތަރުޖަމާނު ރައްދުދެއްވައިފި!

އިންތިޚާބީ ރައީސް ޑރ. މުހައްމަދު މުޢިއްޒު ގެ ވެރިކަމެއްގައިވެސް ދިވެހިރާއްޖޭގައި އިންޑިއާ ސިފައިން ތިބޭނެ ކަމަށް ވިދާޅުވެ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދެއްކެވި ވާހަކަތަކަށް އިންތިހާބީ ތަރުޖަމާނު މުޙައްމަދު ފިރުޒުލް ރައްދު ދެއްވައިފި އެވެ.

އިންޑިއާގެ "ދަ ހިންދޫ" ނޫހަށް ދެއްވި ބަސްދީގަތުމެއްގައި ރައީސް ނަޝީދު ވަނީ މ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަން ފަދައިން، ޑރ. މުޢިއްޒުގެ ވެރިކަމުގައިވެސް އިންޑިއާގެ ސިފައިން ރާއްޖޭގައި ތިބޭނެ ފަދަ މޭރުމަކުން ވަނީ ވާހަކަދައްކަވާފައެވެ. އެގޮތުން މުއިއްޒާއި ހަވާލާ ދެއްވައި، އެމަނިކުފާނުގެ ވެރިކަމުގައި ވެސް، އިންޑިޔާ ސިފައިންގެ 75 ވަރަކަށް މީހުން ރާއްޖޭގައި ތިބުމަށް މުޢިއްޒު ރުހިވަޑައިގަންނަވާ ފަދަ މޭރު ނަޝީދު ވަނީ ވާހަކަދައްކަވާފައެވެ.

އެކަމާއި ގުޅިގެން އިންތިޚާބީ ރައީސްގެ އޮފީހުގެ ފަރާތުން މިއަދު ބޭއްވުނު ނޫސްވެރިންގެ ބައްދަލުވުމުގައި ވާހަކަދައްކަވަމުން ފިރުޒުލް ވިދާޅުވީ، ނަޝީދުގެ އެވާހަކަތަކަކީ އިންތިހާބީ ރައީސްއާއި އެއްވެސް ގޮތަކުން މަޝްވަރާކުރެވިގެން ދެއްކެވިވާހަކައެއް ނޫން ކަމަށެވެ.

"އިންތިހާބީ ރައީސުލްޖުމްހޫރިއްޔާ ގެ ސްޓޭންޑް އަކީ އިންޑިއާ އަދި ކީއްކުރަން އެހެން އެއްވެސް ގައުމެއްގެ ސިފައިން ދިވެހި ފަސްގަނޑުގައި ހުރުމަކަށް ދުވަހަކުވެސް ނުރުހެވޭނެއޭ. އެއީ ދިވެހި ރައްޔިތުން ނިންމަވާފައިވާ ނިންމެވުން. އަދި ހަމަ އެހެންމެ، އިންތިޚާބީ ރައީސުލްޖުމްހޫރިއްޔާގެ ވަރަށް ސާފު ޞަރީހަ ސްޓޭންޑް ވެސްމެ."

މުހައްމަދު ފިރުޒުލް

އެހެންކަމުން ދިވެހި ރައްޔިތުންގެ ނިންމެވުމާއި ފުށުއަރާ ގޮތަށް، ޑރ. މުޢިއްޒަށް ނިސްބަތް ކުރައްވާ ރައީސް ނަޝީދު ދެއްކެވި ވާހަތަކަށް ހިތާމަ ކުރައްވާ ކަމަށް ފިރުޒުލް ވިދާޅުވި އެވެ. އަދި އެފަދައިން ވާހަކަތައް ނުފެތުރުމަށްވެސް އޭނާ ވަނީ އިލްތިމާސް ކުރައްވާފައެވެ.

ދިވެހި ރައްޔިތުންގެ ނިންމުމާ ޚިލާފަށް ރައްޔިތުންގެ މަޖިލީހުގެ ރައީސް ދައްކަވާފައިވާ ވާހަކަފުޅުތަކާމެދު އަޅުގަނޑުމެން ހިތާމަކުރަން. އަދި ހަމައެހެންމެ، ޑރ.މުޢިއްޒަށް، އިންތިޚާބީ ރައީސުލްޖުމްހޫރިއްޔާއަށް އިޝާރާތްކޮށް އެވާހަކަދެއްކެވީތީ ވަކިން ބޮޑަށް ހިތާމަކުރަން. އަދި އެފަދައިން އެކަން ނުކުރުމަށް އެދެން

މުހައްމަދު ފިރުޒުލް

ރާއްޖޭގައި ޤާއިމުވެގެން ތިބި އިންޑިއާ ސިފައިން ރާއްޖެއިން ފޮނުވައިލެއްވުމަކީ ރިޔާސީ އިންތިޚާބުގައި ޑރ.މުޙައްމަދު މުޢިއްޒު ވެވަޑައިގެންފައިވާ އެންމެ މުހިއްމު އެއް ވައުދެވެ. އަދި އެ ވައުދު ފުއްދަވައި ރައްޔިތުންގެ ނިންމުން ތަންފީޒުކުރުމުގައި އިންޑިއާއިން އެހީތެރިކަން ދިނުމަށް އެމަނިކުފާނުވަނީ އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފީރު މުނޫ މަހާވަރަމްގެ އަރިހުންވެސް އެދިވަޑައިގެންފައެވެ.