އެއާޕޯޓު މަޝްރޫއު ނިންމަން ބޭނުންވާ 1.2 ބިލިއަން ރުފިޔާ ޔޫއޭއީން ހަމަޖައްސައިދީފި

އިންތިޚާބީ ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ވަޢުދާއި އެއްގޮތަށް ރާއްޖޭގެ މައި ދޮރާށި، ވެލާނާ އިންޓަނޭޝަނަލް އެއާޕޯޓު ތަރައްޤީ ކުރުމުގެ މަޝްރޫޢު ނިންމުމަށް ޔޫއޭއީން 1.2 ބިލިއަން ދިވެހި ރުފިޔާ ދޭން ނިންމައިފިއެވެ.

އިންތިޚާބީ ރައީސްގެ އޮފީހުން މިއަދު ބޭއްވި ނޫސްވެރިންގެ ބައްދަލުވުމެއްގައި އެ އޮފީހުގެ ތަރުޖަމާނު މުހައްމަދު ފިރުޒުލް ވަނީ މި ފަހުން މުއިއްޒު ޔޫއޭއީއަށް ކުރެއްވި ނުރަސްމީ ދަތުރުފުޅަށް އަލިއަޅުއްވާލައްވައި ވާހަކަ ދައްކަވާފައެވެ.

އެގޮތުން އެ ދަތުރުފުޅުގެ ހަވާސާގައި، ވީއައިއޭ ތަރައްގީ ކުރުމުގެ މަޝްރޫއު ނިންމަން ބޭނުންވާ ފައިސާ، ޔޫއޭއީގެ އަބޫދާބީ ފަންޑު މެދުވެރިކޮށް ހަމަޖައްސަވައި ދެއްވުމަށް މުޢިއްޒު އެދިވަޑައިގެންފައިވާ ކަމަށް ފިރުޒުލް ވިދާޅުވި އެވެ.

އަދި، އެ އެދިވަޑައިގަތުމަށް އިޖާބަދެއްވައި، ވީއައިއޭ ތަރައްގީ ކުރުމުގެ މަޝްރޫއު ނިންމުމަށް ބޭނުންވާ 1.2 ބިލިއަން ދިވެހި ރުފިޔާ ހަމަޖައްސައިދޭން ޔޫއޭއީގެ ސަރުކާރުން ނިންމާފައިވާ ކަމަށްވެސް ފިރުޒުލް ވިދާޅުވި އެވެ.

"އެ ފައިސާ (އެއާޕޯޓް ނިންމަން ބޭނުންވާ ފައިސާ) ހަމަޖައްސައިދެއްވުމަށް ޔޫއޭއީ ސަރުކާރުގެ އަބޫދާބީ ފަންޑުގައި (މުޢިއްޒު) އެދިވަޑައިގެންފައިވޭ. އެ އެދިވަޑައިގަތުމަށް އިޖާބަ ދެއްވައި، އަބޫދާބީ ފަންޑު ފޯ ޑެވިލޮޕްމަންޓް (އޭޑީއެފްޑީ)ން 80 މިލިއަން ޑޮލަރު، އެހެން ގޮތަކަށް ދަންނަވާނަމަ 1.2 ބިލިއަން ރުފިޔާ ހަމަޖައްސަވައިދެއްވާނެ ކަމުގެ ޔަގީންކަން ދެއްވާފައިވޭ. މި ފައިސާ ހަމަޖެހިގެން ދިއުމާ އެކު އެއާޕޯޓު މަޝްރޫއު ނިންމުމަށް ބޭނުންވާ ހުރިހާ ފައިސާއެއް ހަމަޖެހިގެން މި ދިޔައީ"

އިންތިގާލީ ތަރުޖަމާނު މުހައްމަދު ފިރުޒުލް

ފިރުޒުލް ވިދާޅުވީ، ޔޫއޭއީގެ މި އެހީއާ އެކު އެއާޕޯޓު މަޝްރޫއު ބާރަށް ކުރިއަށް ގެންގޮސް އައު ސަރުކާރުގެ އަމާޒާއި ހަމައަށް ވާސިލްވެވޭނެ ކަމުގެ ޔަގީންކަން ބޮޑުވެފައިވާ ކަމަށެވެ.

އެއާޕޯޓް މަޝްރޫއަށް ދޭން ނިންމި ފައިސާގެ އިތުރުން، ރާއްޖޭގެ ބަޖެޓު ސަޕޯޓަށާއި، އަދި އެހެނިހެން ދާއިރާތަކުން ކުރިއެރުންތައް ހޯދުމަށްވެސް ޔޫއޭއީން އެހީތެރިވާނެ ކަމުގެ ޔަގީންކަން ދެއްވާފައިވާ ކަމަށް ފިރުޒުލް ވިދާޅުވިއެވެ.

ޑރ މުޢިއްޒު ވެރިކަމަށް އިންތިޚާބުވެ ވަޑައިގެންނެވި ފަހުންވެސް އެމަނިކުފާނު ވަނީ ރާއްޖޭގެ އިގްތިސާދު ނަގައި ކޮޅަށް ޖެހުމަށް އެންމެ މުހިންމު ކަމަކީ ވެލާނާ އިންޓަނޭޝަނަލް އެއާޕޯޓު މަޝްރޫއުގެ މަސައްކަތް އަވަހަށް ނިންމުން ކަމަށް ވިދާޅުވެފައެވެ. އަދި އެމަނިކުފާނުގެ އަމާޒަކީ ދެން އަންނަ އަހަރުގެ ޕީކް ސީޒަނަށް އެއާޕޯޓްގެ މަސައްކަތް ނިންމައި، ދަތުރުކުރާ އެންމެހާ ފަރާތްތަކަށް އެއާޕޯޓްގެ ފުރިހަމަ ޓާމިނަލް ބޭނުން ކުރެވޭނެ މަގު ފަހިކޮށްދިނުން ކަމަށްވެސް އެމަނިކުފާނު ވަނީ ވިދާޅުވެފަ އެވެ.