އިންޑިޔާ ސިފައިން ތިބި އަދަދު އައު ސަރުކާރުން ހާމަކުރާނެ: ފިރުޒުލް

ދިވެހިރާއްޖޭގައި ގާއިމުވެތިބި އިންޑިޔާ ސިފައިންގެ އަދަދު އިންތިޚާބީ ސަރުކާރަށް އެނގުމާއެކު، އާއްމު ރައްޔިތުންނަށް އެކަން ހާމަކުރައްވާނެ ކަމަށް އިންތިގާލީ ތަރުޖަމާނު މުހައްމަދު ފިރުޒުލް ވިދާޅުވެއްޖެއެވެ.

އިންތިޚާބީ ރައީސުލްޖުމްހޫރިއްޔާގެ އޮފީހުން މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައި ރާއްޖޭގައި އިންޑިޔާ ސިފައިން ތިބި އަދަދާއި، އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ސަރުކާރުން އިންޑިޔާއާއި އެކު ވެފައިވާ އެއްބަސްވުން ތަކުގައިވާ ކަންކަން އައު ސަރުކާރުން ހާމަކުރާނެތޯ ނޫސްވެރިއަކު ވަނީ ސުވާލުކޮށްފަ އެވެ.

އެ ސުވާލަށް ޖަވާބުދެއްވަމުން ފިރުޒުލް ވިދާޅުވީ، ރާއްޖޭގައި އިންޑިޔާ ސިފައިން ތިބި އަދަދާއި، އިންޑިޔާއެކު ވެފައިވާ އެއްބަސްވުންތަކުގައި ހިމެނޭ ކަންކަން ހާމަކޮށްދެއްވުމަކީ އިންތިޚާބީ ރައީސުލްޖުމްހޫރިއްޔާ ޑރ މުހައްމަދު މުއިއްޒު ވެރިކަމަށް ވަޑައިގެންނެވުމުގެ ކުރިން ވެވަޑައިގެންނެވި ވައުދެއް ކަމަށެވެ. އަދި ވެރިކަމަށް ވަޑައިގެންނެވުމަށްފަހު އެ މައުލޫމާތު ތައް ހާމަ ކުރައްވާނެ ކަމަށް ފިރުޒުލް ވިދާޅުވި އެވެ.

އަޅުގަނޑުމެންގެ ވެރިކަމެއްގައި، އެހެން ހުރި އެއްބަސްވުންތަކުގައި ހުރި ކަންބޮޑުވާ ކަންތައްތައް އަދި ހަމައެހެންމެ އިންޑިޔާ ސިފައިން ތިބި އަދަދާއި ގުޅޭ މައުލޫމާތު އަޅުގަނޑުމެން ހާމަ ކުރާނެ. އެއީ ވަރަށް ސާފުކޮށް އިންތިޚާބީ ރައީސުލްޖުމްހޫރިއްޔާ ކެންޕެއިން ތެރޭގައިވެސް ވިދާޅުވެފައި އޮތް ވާހަކަފުޅެއް.

އިންތިގާލީ ތަރުޖަމާނު މުހައްމަދު ފިރުޒުލް

ރާއްޖޭގައި ޤާއިމުވެގެން ތިބި އިންޑިއާ ސިފައިންގެ އަދަދު ހާމަކޮށް، އިންޑިޔާއާއެކު ވެފައިވާ ގޮތް ނޭނގޭ އެއްބަސްވުންތައް ހާމަކުރުމަކީ އިމްތިޚާބީ ރައީސްގެ ވައުދު ފުޅެކެވެ.

އަދި މީގެ އިތުރުން އިންޑިޔާ ސިފައިން ރާއްޖެއިން ފޮނުވައިލެއްވުމަކީވެސް ރިޔާސީ އިންތިޚާބުގައި ޑރ.މުޙައްމަދު މުޢިއްޒު ވެވަޑައިގެންފައިވާ އެންމެ މުހިއްމު އެއް ވައުދު ތެރޭގައި ހިމެނޭ ކަމެކެވެ.

އަދި އެ ވައުދު ފުއްދަވައި ރައްޔިތުންގެ ނިންމުން ތަންފީޒުކުރުމުގައި އިންޑިއާއިން އެހީތެރިކަން ދިނުމަށް އެމަނިކުފާނުވަނީ އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފީރު މުނޫ މަހާވަރަމްގެ އަރިހުންވެސް އެދިވަޑައިގެންފައެވެ.