އެމްއެންޔޫއިން ބައިނަލްއަޤުވާމީ ހަތަރު ތަމްރީނު ޕްރޮގްރާމެއް ފުރިހަމަކުރި ކާމިޔާބީ ފާހަގަކޮށްފި

ދިވެހިރާއްޖޭގެ ޤައުމީ ޔުނިވާސިޓީ (އެމްއެންޔޫ) އިން ބައިނަލްއަޤުވާމީ އެކި މުއައްސަސާތަކާ ގުޅިގެން ކުރިއަށް ގެންދިޔަ ހަތަރު ޕްރޮފެޝަނަލް ޑިވެލޮޕްމަންޓް ޕްރޮގްރާމެއްގެ ކާމިޔާބީ ފާހަގަކުރުމަށް މިއަދު ޚާއްޞަ ރަސްމިއްޔާތެއް ބާއްވައިފިއެވެ.

އެ ރަސްމިއްޔާތުގެ ޝަރަފުވެރި މެހެމާނުންގެ ގޮތުގައި ބައިވެރިވެވަޑައިގެންނެވީ ޖަޕާނުން ރާއްޖެއަށް ކަނޑައަޅުއްވާފައިވާ ސަފީރު އިޝިގާމީ ރޫމިކޯ އާއި އޮސްޓްރޭލިއާއިން ރާއްޖެއަށް ކަނޑައަޅުއްވާފައިވާ ހައި ކޮމިޝަނާ ޑޭވިޑް ޖެސަޕެވެ.

އެ ރަސްމިއްޔާތުގައި ފާހަގަކުރި ޕްރޮގްރާމްތަކުގެ ތެރޭގައި ޖަޕާން ފައުންޑޭޝަނާ ގުޅިގެން މޯލްޑިވްސް ކަސްޓަމްސް ސާވިސްގެ އޮފިސަރުންނަށް 2026 ވަނަ އަހަރުގެ އޮގަސްޓް 10 އިން ސެޕްޓެމްބަރު 21 އަށް ހިންގި 30 ގަޑިއިރުގެ ޖަޕާނު ބަހުގެ ކޯހެއް ހިމެނެއެވެ.

އޭގެ އިތުރުން މެލޭޝިއާގެ ޔުނިވާސިޓީ ސައިންސް އިސްލާމް މެލޭޝިއާ (ޔޫއެސްއައިއެމް) އާ ގުޅިގެން ސެޕްޓެމްބަރު 6 އިން 9އަށް އެމްއެންޔޫގެ ޢަރަބި ބަހުގެ ޑިޕާޓްމަންޓުގެ ލެކްޗަރާއިންނަށް ޚާއްޞަ ޕްރޮގްރާމެއް ހިންގައިފައިވެއެވެ.

ހަމައެއާއެކު އޮސްޓްރޭލިއާގެ ކާޓިން ޔުނިވާސިޓީއާ ގުޅިގެން ޕާތުގައި އެމްއެންޔޫގެ ފެކަލްޓީ އޮފް އާޓްސްގެ މުވައްޒަފުންނަށް ފެކަލްޓީ ޑިވެލޮޕްމަންޓް ޕްރޮގްރާމެއް ވެސް ހިންގައިފައިވެއެވެ.

ހަތަރުވަނަ ޕްރޮގްރާމެއްގެ ގޮތުގައި މޯލްޑިވްސް ލައިބްރަރީ އެސޯސިއޭޝަނާއި ކާޓިން ޔުނިވާސިޓީއާ ގުޅިގެން ސެޕްޓެމްބަރު 9 އިން 19 އަށް ޕާތުގައި ލައިބްރަރީ އެންޑް އިންފޮމޭޝަން ސާވިސަސްއާ ބެހޭ ވޯކްޝޮޕެއް ކުރިއަށް ގެންގޮސްފައިވެއެވެ.

ޖަޕާނު ބަހުގެ ކޯހުން ކަސްޓަމްސް އޮފިސަރުންނަށް ބަހުގެ ހުނަރާއި ފަންނީ ޢިލްމު ތަރައްޤީކުރުމުގެ ފުރުޞަތު ލިބިފައިވާ އިރު ފަތުރުވެރިކަމުގެ ދާއިރާއާ ގާތް ގުޅުންތަކެއް އޮތް ޤައުމެއްގެ ހައިސިއްޔަތުން މި ތަމްރީނުތައް ފައިދާކުރާނެ ކަމަށް އެމްއެންޔޫއިން ފާހަގަކޮށްފައިވެއެވެ. ޔޫއެސްއައިއެމް ޕްރޮގްރާމުން ދިރާސާ މުޤައްރަރު ތައްޔާރުކުރުން އަދި ޘަޤާފީ ބައްދަލުވުންތަކުގެ ފުރުޞަތު ހޯދައިދީފައިވެއެވެ. އޮސްޓްރޭލިއާގެ ޕްރޮގްރާމްތަކުން ބައިނަލްއަޤުވާމީ ތަޖުރިބާ ހޯދައި ދިރާސާ ހުށަހެޅުމުގެ ފުރުޞަތު ލެކްޗަރާއިންނާއި ދަރިވަރުންނާއި ދަސްވެނިންނަށް ލިބިފައިވެއެވެ.

އެ ރަސްމިއްޔާތުގައި ފެކަލްޓީ އޮފް އާޓްސްގެ ޑީން ޑރ. އާމިނަތު ރިޔާޒް ވިދާޅުވީ ޕްރޮފެޝަނަލް ޑިވެލޮޕްމަންޓަކީ ހަމައެކަނި ސެޓްފިކެޓް ހާސިލުކުރުމަށް ވުރެ މާ ފުޅާ ދާއިރާއެއް ކަމަށާއި އާ ނަޒަރިއްޔާތައް ދެނެގަތުމާއި ޢަމަލީ ހުނަރު ތަރައްޤީކުރުމާއި އާ ޚިޔާލުތައް މުޖުތަމަޢަށާއި ފަންނީ ދާއިރާތަކަށް ގެނެސްދިނުމުގެ ފުރުޞަތު އެކަމުން ފަހިވާ ކަމަށެވެ.

މި ހަތަރު ޕްރޮގްރާމް ކާމިޔާބުކަމާ އެކު ހިންގުމުގައި ކާޓިން ޔުނިވާސިޓީ އޮސްޓްރޭލިއާގެ ހައި ކޮމިޝަން ޖަޕާން ފައުންޑޭޝަން ޖަޕާން އެމްބަސީ ޔޫއެސްއައިއެމް މޯލްޑިވްސް ލައިބްރަރީ އެސޯސިއޭޝަން އަދި ބައިވެރިވި ހުރިހާ މުވައްޒަފުންގެ އެއްބާރުލުން ލިބިފައިވާ ކަމަށް އެމްއެންޔޫއިން ފާހަގަކޮށްފައިވެއެވެ.